Ézai 9 - Kazambale lé Sebe Sauunu 1979

Minwiinzan blɛn lé é dan da lɛ, alé we

¹ Munu lé woo tawoo gunutinu va, Wo san blɛn ye; Munu lé wo ke é nyanale ga furɔ wuo, San bi wo ta.

² I munu ’ko kɛlɛ kiɛre, I ginanamawe kɛlɛ wo lɛ. Wo gi a nanana i ’lɛ bélé ’sagyɛmunu gi nanale zo, Woo siaan ginanale nya, bélé gulizarafɛ gulizannu zo.

³ I luubale kini wo bɔrɔ ma, Wo blayili koo, Yaawotazannu lé vlewɔlɛ koo, I wo yéli, i Madian zé kɛlɛ fɛan zo yi la, a zo, amalé wo gi nana.

⁴ Naa, guli ma sawala faa koo, Guli ma varɔ faa lé wa burula nyɛ va koo, Wo dan wo vɔ lɛ kyɛ va, Yé kyɛ é wo ble.

⁵ Naa, wo né do yaa ko lɛ, Bale négɔné do nɔ ko lɛ, É dan pla lɛ munu nwiin, Wo dan a laa lɛ, lɛamazan, weplamilɛzan Bale plɛplɛ, Lɛɛfaama Ti, vole drɔɔ ’wuo.

⁶ Alé plale mi nwiin tɛrɛ glɛ buru é dan so lɛ é zuo, David lé plale mi nwiin se valé plaleminwiin tɛrɛ, é ’ka dan ’bɛ vole drɔɔ glɛ dɔ lɛ lo, É dan a dɔ lɛ gligli wedrɔle valé we tegele kɛlɛle nya, A pélisia sin yé a glɛ ’ka lo; Lai sunyanu lé Gakelebale fuu a é ta we ’ko kɛlɛna.

Bale é dan we lɛdɔ lɛ Izraɛlnu gi

⁷ Mizan we do pa Jakɔb lɛ zia yé a bɛ dia Izraɛl ta.

⁸ Éfraim tɛrɛ la munu valé Samari munu wo faa é dan we ’ko dɔɔ lɛ. Wa fena boblɛn nya léé:

⁹ Brikikɔn zana, naa, ko dan gɔlɛ ma nyaale kɔn dɔ lɛ; wo sikomɔyilinu vɔ, naa, ko dan sɛdrɛyilinu suru lɛ wo pa gi.

¹⁰ Gakelebale é dan Rɛsɛn nyanézannu nwa lɛ Izraɛlnu ma, yé é dan gulidanfɛnu pa lɛ ’bɛnu lee.

¹¹ Sirinu a yirinwanazia, yé Filisitinu a yirivɔnazia, yé wo ’léé é dan fan lɛ Izraɛlnu sɛrɛle ma. Dé ’bɛ faa bɔoo, ’bɛ ’ka alé bliflile ta zanaan lo, ’té a bɛ a wo gyɛn gi duowo.

¹² Duowo, munu ’ka dan ’wo blazan va lo, yé wo ’ka lai sunyanu lé Gakelebale naginian lo.

¹³ Gakelebale é dan Izraɛl woli valé a ’wuo bɔi lɛ yé é dan yɔ valé gyan soowɔla lɛ yi do kpen nya.

¹⁴ Mi segele valé weblezan, ’bɛ ɛ ke a ’wuo nya, yé balelayezan lé éé we paan munu gi vié nya, ’bɛ ɛ ke a woli nya.

¹⁵ Munu ’ko lé zigɔɔnzannu ’wo saan, yé munu lé wo yee zi gɔɔnle ’wo lɛ nyi si, wo saan.

¹⁶ Bɛwemalé Mizan gi ’ka nanaan wolé pɛniɛnu ma lo, yé a nyanai ’ka zén‐é wolé ti valé bugalazannu valé wolé gyɛzaralomu ta lo. Naa, wo faa a Bale lé zi ma wenyanéfezannu valé mi naanénu nya, yé weple éé bɔraan wo faa ’léé. Dé ’bɛ faa bɔoo, ’bɛ ’ka alé bliflile ta zanaan lo, ’té a bɛ a wo gyɛn gi duowo.

¹⁷ Naa, wenyané kɛlɛle éé mi blé bélé kyɛ lé éé danan valé léliyilinu blé, a zo; éé kyɛ vɔa pɔrɔwɔlɛ ’léé, ’té a goi éé nwaan zuuu.

¹⁸ Lai sunyanu lé Gakelebale lé bliflile éé tɛrɛ ta kyɛ dɔa yé munu a bélé kyɛblefɛ zo; mi do kpen ’ka é bwe vo lo.

¹⁹ Woo fɛ siaan gla nya wo bɛyilazia, ’té lɔrɔ éé wo gya; woo fɛ blé wo bɛbolazia, ’té wo ’ka kaan lo. Wo faa do do ’wobo bɛ blé.

²⁰ Manasé munu woo Éfraim munu blé, ’té Éfraim munu wooé Manasé munu blé, yé wo fiénu éé ’wiié Juda munu ta. Dé ’bɛ faa bɔoo, ’bɛ ’ka alé bliflile ta zanaan lo, ’té a bɛ a wo gyɛn gi duowo.