Ézai 8 - Kazambale lé Sebe Sauunu 1979

Asirinu nwiinzan blɛn a dana

¹ Gakelebale lé an lɛ léé: ’I gɔlɛfee blɛn do si yé bé gyɛ a ta wéiin léé: ’Ka go fɛ si gla nya fiéfié; ’ka ’wii gulizarafɛ ta.

² Wenayezan fié lé a yara lé mi é pa wo ta, maa wo pa an va. Balebanzan Uri valé Bérékia be Zakari lé.

³ An go balelaye le va; é bɔn si yé é né yaa gɔné nya. Gakelebale lé an lɛ léé: Bé tɔ pa Maɛɛ‐Salal‐Sas‐Baz.

⁴ Naa, dé né ’ko ’ka tan bɔa a fele lɛ an ti valé an bu lo, wo dan go lɛ Damas lé fuafɛnu valé Samari lé gulizarafɛnu nya Asirinu nwiinzan blɛn ’lɛ.

⁵ Gakelebale we fe an lɛ é ziin yé é léé:

⁶ Munu ’ko serele bo Siloé ’yi lé éé yoroan drɔɔ, a ma, yé Rɛsɛn valé Rémalia be kɛlɛ wo ginanamazannu nya,

⁷ amalé, Mizan é dan yuu lɛ blɛn plɛplɛ nwa lɛ wo ma; ’bɛ gi léé, Asirinu nwiinzan blɛn valé élé plɛplɛ. Yee yuu ’ko, é dan fan lɛ yé é bɔra é gɔ la.

⁸ É dan go lɛ Juda tɛrɛ la, yé é dan ana mini lɛ fɔɔ yé é bɔ mi bɔrɔ ma. Yiba, Émanuɛl, é dan é bɛa soi lɛ yé é dan ilé tɛrɛ faa ta bua lɛ.

⁹ Munu, ’ka siaa gulidandére plɛplɛ nya, yé wo dan ka ’wii lɛ. Ka lé ka ke é nyanale baa, ’ka an ban ka tɔné nya. ’Ka ma’lɛrɛ gulidanle we ma, yé wo dan ka ’wii lɛ. ’Ka ma’lɛrɛ gulidanle we ma, yé wo dan ka ’wii lɛ.

¹⁰ ’Ka gi bɔrɔ, é dan kɛlɛ lɛ ka ma we pla nya. ’Ka fe munu lɛ léé, ’wa kɛlɛ ’koo, ’wa kɛlɛ ’koo, a faa é dan vo lɛ é pla. Naa, Bale a ko va, azama.

Bale we lɛ kini wo lɛ

¹¹ Dé Gakelebale an kun bléyian va yé é we pla an lɛ léé, té maa tawo munu ’ko lé tawobɛ gi lo, é lé an lɛ léé:

¹² Dé munu ’ko a fe léé, wo gi pa ko ma, té bii a fe a zo lo; woo kanaan fɛan lee, té i kana ’bɛ lee lo, té di é kini i gi lo.

¹³ ’Ka lai sunyanu lé Gakelebale ye blɛn, ’ka kana yee ɛ lee, yee ɛ tun dɔ ka gi.

¹⁴ É dan kɛlɛ lɛ miyɔɔna nya, naa, é dan kɛlɛ lɛ é ziin mi sɔnésanmagɔlɛ nya, yé é dan kɛlɛ lɛ Izraɛl lé kɔn fié gimunu diagɔlɛ nya. É dan kɛlɛ lɛ Jérusalɛm munu kunséli valé wo kunsan nya.

¹⁵ Mi kiɛre sɔné é dan san lɛ a ma; wo dan dia lɛ yé wo dan ’wii lɛ; wo dan vɔ lɛ séli gi yé é wo kun.

¹⁶ ’I gɔlɛfee ’ko pa fɛ gi; ’i wegɔɔnle ’ko paa an zuomunu gi.

¹⁷ Gakelebale lé éé yara yɔɔan Jakɔb lé munu ma, an bli a yee ɛ lɛ; an pale a yee ɛ ta.

¹⁸ Bé ye, maa valé nénu lé Gakelebale wo nɔ an lɛ, ko a tɔmasenu valé weyɔɔle bɔrazannu nya Izraɛlnu lɛ; lai sunyanu lé Gakelebale lé éé nyanaan Siɔn gɔ nwiin, yee ɛ ko kɛlɛ a nya.

¹⁹ Dé mi do lé ka lɛ léé: Kaa we laa miléli laamunu valé tɛlɛ tɛlama wefezannu lee, ’monédɔ ’furufɛnzannu valé gungyɛzannu lee, ’ka fe ’bɛzan lɛ léé: Mi ’ka we laan élé Bale lee loo? Woo mi yuɛmalenu lé we laan migalenu lee?

²⁰ ’Ka go bélidɔwe valé wenayedére va, dé ’bɛ ’ka a fe lɛ a zo lo, ’té munu ’ko va ’ka é kinile lo.

²¹ Munu é dan nɔɔ lɛ tɛrɛ ’ko la, ’té we éé bɔa wo ma, ’té lɔrɔ éé wo gya; yé dé lɔrɔ wo gyɛ, wo bli é dan fli lɛ, yé wo dan bale pa lɛ ’wo nwiinzan blɛn valé ’wolé Bale ma; wo dan wo yuɛ vɔ lɛ loru.

²² ’Bɛ zuo wo dan ’wo yuɛ vɔ lɛ tɛrɛ va, yé bé ye, nyanéblele koo, gunuti koo, kleblele blɛn koo, wo saa ɛ ke ana; yé wo dan go lɛ gunuti tiritirinu va.

²³ Naa, gunu ’ka dan dɔra lɛ yifaama tɛrɛ lé wo ke nyané blena a ta sin ’ko, a ta lo; dé Bale Zabulɔn tɛrɛ valé Néfitali tɛrɛ gyɛ yara nya é kyɛn, tɛlɛ tɛlama, tɛrɛ lé ke wɛyi sɔnɔ, Juudɛn yuu zi, bɛnnu lé tɛrɛ, é dan a ta sɔɔla lɛ é tɔbɔle nya.