Ézai 7 - Kazambale lé Sebe Sauunu 1979

Bale we fe minwiinzan blɛn Akaz lɛ

¹ Bléyian va lé Ozias be Jotam be Akaz a Juda munu nwiinzan nya, Sirinu nwiinzan Rɛsɛn nwa Jérusalɛm ma, a mabɛnle we gi; ’té Izraɛl munu nwiinzan Rémalia be Pékas péli a a va; naa, wo ’ka bɔ lɛ a lɛ lo.

² Munu da a fe lɛ David kulunu lɛ léé: Siri sunyanu ’wolé sɔkɔnnu dɔ Éfraim tɛrɛ la. Yé Akaz valé élé munu bli nano wo gi bélé fu éé pɔrɔ gi yilinu manyɔɔn‐an fɛan zo, a zo.

³ Yé Gakelebale lé Ézai lɛ léé: Bii valé i be Seaa‐Jasub, ’ka go Akaz ’lɛ, ’yidoo lé ke loru sɔgibɔzan lé zi ’léé, a yoro pélisiana.

⁴ Bé fe a lɛ léma: ’I dɔ flee, té i kana we do kpen lee lo. Té nyɛ é ’wii i zuru va kyɛ pééné fié lé wo goi éé bɔa é pla, wo lee lo; ’bɛ gi léé, Rɛsɛn koo, Sirinu koo, Rémalia be koo, té nyɛ é ’wii i zuru va ’bɛnu lee lo.

⁵ Sirinu a ’wo gi bɔrɔna léé, ’wo wenaané kɛlɛ i lɛ; ’té Éfraim munu valé Rémalia benu a fena léé:

⁶ Kaa nwa Juda munu ma, kaa wolé fla mabɛn, kaa wolé flagɔrɔ zana a gi, kaa Tabéél be dɔ ana mununwiinzan nya.

⁷ Amalé Mizan, Gakelebale léma: ’Bɛ ’ka dan bɔ lɛ lo, ’bɛ ’ka dan kɛlɛ lɛ lo.

⁸ Naa, Damas a Siri tɛrɛ la kuru ’léé nya, yé Rɛsɛn a Damas flanwiinzan nya. É sia ’ko, lɛɛ yɔ yaa wɔlɛ soru, Éfraim ’ka dan kɛlɛ lɛ bɛn nya é dɛrɛ lo.

⁹ Naa, Éfraim tɛrɛ la kuru ’léé a Samari nya, yé Rémalia be a Samari flanwiinzan nya. Dé ka ’ka dɔ lɛ a ta lo, ka ’ka dan vo lɛ ana lo.

Bale lé tɔmase — Émanuɛl

¹⁰ Gakelebale we fe Akaz lɛ é ziin yé é lé a lɛ léé:

¹¹ Bé laa Gakelebale ilé Bale lee léé, ’é tɔmase do kɛlɛ i lɛ; dé tɛrɛ wuo léé, dé la gi léé, ana.

¹² Akaz a zi vɔ léé: Maa ’ka dan we do laa lɛ lo, maa ’ka dan Gakelebale gi dan lɛ lo.

¹³ Naa, Ézai léé: ’Kaa David gɔnɔlazannu lé ka ke minwiinzannu nya, ’ka tɔné dɔ. Dé ka munu wɔlɛ gi nyaa ’wo ma, ’bɛ ’ka kazé bɔa loo? É a lé ka anlé Bale wɔlɛ gi nyaa é ziin?

¹⁴ Amalé Mizan bozen é dan tɔmase do kɛlɛ lɛ ka lɛ. Le boroné é dan bɔn si lɛ yé é dan négɔné yaa lɛ, yé é dan a tɔ laa lɛ Émanuɛl.

¹⁵ É dan dirinyɔyi valé zɔrɔnyɔnɔ ble lɛ fɔɔ yé é sɔnvɔle wenaané ma gi dɔɔ yé é wezin si a va.

¹⁶ Naa, dé né ’ko ’ka tan sɔnvɔle wenaané ma valé wezin sile a va gi dɔɔ lɛ lo, minwiinzan fiénu lé ka ke kanana wo lee bɛ, wolé tɛrɛ é dan kɛlɛ lɛ bwi nya.

¹⁷ Wenu lé Gakelebale é dan a kɛlɛ lɛ bii koo, ilé munu valé i ti kulunu koo, ka lɛ, é sia yian nya lé Éfraim valé Juda kini ékema fɔɔ kyɔ, wo ’ka ’bɛ zo wenu ye lɛ lo. É dan da lɛ Asirinu nwiinzan nya.

¹⁸ ’Bɛ yi la, Gakelebale é dan ’furu fɛn lɛ nyɔnɔtoronu lé wo ke Éjipiti tɛrɛ la yuunu nyaana, wo valé zɔrɔnu lé wo ke Asiri tɛrɛ la, wo lɛ.

¹⁹ Wo dan da lɛ, yé wo dan nyana lɛ gɔworona planu koo, gɔlɛ zansinanu koo, léliyilinu faa koo, trubɛ blena faa koo, wona.

²⁰ ’Bɛ yi la Mizan é dan nwin puiɛ sɛnné bɔɔ pa lɛ yé é dan wo nwin puiɛ lɛ a nya yé é dan wo ganemakyɛɛ puiɛ lɛ yé é dan wo puo ma gun puiɛ lɛ é ziin. Yee nwin puiɛ sɛnné a Asirinu nwiinzan nya.

²¹ ’Bɛ yi la, dirida do valé ’bla fié é dan kɛlɛ lɛ mi do do lee.

²² ’Bla valé diri nyɔyi é dan kɛlɛ lɛ kiɛre fɛan zo, wo dan dirinyɔyi nyɔnɔ ble lɛ; munu faa lé wo dan vo lɛ tɛrɛ ’ko la, wo dan dirinyɔyi nyɔnɔ valé zɔrɔnyɔnɔ ble lɛ.

²³ ’Bɛ yi la féi faa lé dɔrɔyili ke ana wuru soru, ’té wo vlɛ ke gɔɔlifu sikla wuru soru, danan valé léliyilinu é dan ana ble lɛ.

²⁴ Mi é dan go lɛ ana sa valé é wɔlɛ nya é lee, naa, ana tɛrɛ é dan kɛlɛ lɛ danan valé léliyilinu saa nya, azama.

²⁵ Yé gɔnu faa lé woo féi paan ana turu, mi ’ka dan go lɛ ana é dɛrɛ lo, danan valé léliyilinu lé we ma; naa, dirinu valé ’blanu é dan ana tɛrɛ zɔn lɛ.