Ézai 66 - Kazambale lé Sebe Sauunu 1979

Bale éé bɛnnu lé we blé

¹ Gakelebale léma: La a an nyanala blin nya, yé tɛrɛ a a ganedɔralafɛ nya. Mɛ kɔn lé ka dɔa an lɛ yé fɛ kyɛnna lé ka ana nɔ an lɛ an nyanana nyaa?

² An bɛan fɛ ’konu faa kɛlɛ loo? Maa‐an an fɛ ’konu faa bɔra loo? Mi lé maa dan yuɛ pa lɛ a ta, yee lé ke ’ko: Mi lé éé nyané blé yé a fuu si a ta, yee lé; mi lé éé kanaan an dére lee, yee lé.

³ Dé wa an banna diri nya, an ’bɛ yé bélé migyɛle zo; dé wa saraka bona an lɛ ’bla nya, an ’bɛ yé bélé blén bɔrɔ yélile zo; dé wa blɛfɛ nɔna an lɛ, an ’bɛ yé bélé suru nyɛ zanale zo; dé wa lasikɔrɔpo kyɛ blena an lɛ, an ’bɛ yé bélé miyili banle zo; wo faa bɛ, wo kɛlɛwe sɔ wo lɛ, yé wo gi éé nanaan ’wolé bozowe kɛlɛle ma.

⁴ Maa é ziin, an gi é dan nana lɛ we tɔntɔn lé é dan bɔ lɛ wo ma bɛ, a ma, yé maa dan da lɛ wo kanamawe nya wo lɛ; maa wo laa, yé wo ’ka we lɛ lo, azama; maa we fe wo lɛ yé wo ’ka tɔné dɔ lɛ an lɛ monomono lo, azama. Naa, wo wenaané kɛlɛ an yuɛ gi; we lé é ’ka an gi nanaan lo, yee lé wa si a va wozé nya.

⁵ Ka lé ka kanaan Gakelebale dére lee, ’ka tɔné dɔ a dére lɛ. Ka bwenu lé woo ka za paan, ’té woo ka nyunuan an tɔ lé we ma, wo léma: Gakelebale ’élé fua nagɔɔn ma, ye ko kalé ginanale ye ma. Naa, wo gi é dan blin lɛ wo ma.

⁶ Dére gléglé do we fla, dére do we Balebangikɔn gi. Gakelebale lé éé nyanézannu gooli paan, a dére lé.

⁷ A bli plɛnle ’lɛ, é né yaa; é négɔné yaa, ’té nyanéblele ’ka tan bié lɛ a ma lo.

⁸ Wo ’bɛ zo we maan turuu? Wo ’bɛ zo we yé turuu? Wo tɛrɛ do la munu yaan yi doo? Woo bɛn do yaan bléyi do kpen nyaa? A bli plɛnle sia tɔɔn, Siɔn négɔnénu yaa.

⁹ Maa ɛ bɔa le va yé é né yaa ’naan, yé maa né yaale yi gaa? Maa lé maa né kɛlɛle pélisian, ’naan, maa ɛ fé léé, té é da tɛrɛ la loo? Ilé Bale ɛ fe.

¹⁰ ’Kaa faa lé Jérusalɛm sɔ ka lɛ, Ka gi ’é nana a tamunu va ma, ’É kɛlɛ ka ginanamazan nya. ’Kaa faa lé ka a gyɛ bo, Ginanale ’é ka kun a va, léé,

¹¹ A tɔrɔpaale ’É kɛlɛ kalé fɛblele valé ka kanfɛ nya, Yé alé fuasan tɔ blɛn ’É ka ’léli sele ka ’léé a néné zi.

¹² Gakelebale léma: Maa dan vole drɔɔ nɔ lɛ a lɛ bélé yuu zo. Maa dan bɛnnu lé fua nɔ lɛ a lɛ bélé ’yiyoro lé é bɔra ’é gɔ la, a zo. Yé ’bɛ é dan kɛlɛ lɛ kalé fɛblele nya; wo dan ka si lɛ ’wo bɛ gi, wo dan ka si lɛ ’wo bɔrɔ la.

¹³ Maa dan ka tɔrɔ paa lɛ bélé nébu é be tɔrɔ paan fɛan zo, a zo. Maa dan ka tɔrɔ paa lɛ Jérusalɛm.

¹⁴ Ka dan a ye lɛ, yé ka dan fan lɛ ginanale nya, yé ka wɔlɛi é dan dɔ lɛ ka ma bélé lutolu zo. Gakelebale é dan élé plɛplɛ nagɔɔn lɛ é wuozannu lɛ, naa, a nyanézannu é dan alé bliflile dɔɔ lɛ ’wo kɔlɛ ma.

¹⁵ Ka yua, Gakelebale a dana kyɛ gi; alé goro a bélé barikoko zo; alé bliflile a bélé kyɛnyɛ zo; alé bon‐ɛnle?-?nu a bélé kyɛnɛnɛ zo.

¹⁶ Kyɛ nya lé Gakelebale élé we lɛgi paan; alé gwɔun éé we lɛdɔa mi faa gi, yé Gakelebale é dan mi kiɛre gyɛ lɛ.

¹⁷ Munu lé woo wobo kɛla tegele zianféinu ta balebanle we ma, ’té wa wo ke zuo é yɔrɔ nya, ’té suruwi koo, bozowi koo, ’moné koo, ’té woo wo blé, munu faa ’ko, wo dan zamaga wo lɛ. Gakelebale ɛ fe.

¹⁸ Maa wo kɛlɛwenu valé wo bɔn‐in bɔrɔle dɔɔ. Bɛn faa zén ékeva bléyi bɔ, wo valé dére faa gimunu nya; wo dan da lɛ yé wo dan anlé fua tɔbɔle ye lɛ.

¹⁹ Maa dan tɔmase do pa lɛ wo ma. Wonu lé wo so we lee, maa dan wo pa lɛ zia bɛnnu va; Taasis koo, Pul valé Lud munu lé woo sa vulian, wo koo, Tubal valé Javan munu koo, wɛyiworona tɛrɛ baanu koo, maa dan wo pa lɛ zia bɛnnu va. Bɛnnu ’ko, wo ’ka an tawe ’ma lɛ monomono lo, yé wo ’ka an tɔbɔle ye lɛ lo; maa dan anlé munu pa lɛ zia wo va, yé wo dan an tɔ ma gyɛ lɛ yee bɛnnu méléna.

²⁰ Wo dan ka bwenu faa si lɛ bɛnnu faa va, yé wo dan da lɛ wo nya Gakelebale lé blɛfɛ nya; wo dan da lɛ wisoonu ta, wo dan da lɛ goronu valé sélinu gi; wo dan da lɛ wi lé wa laama mulɛ, a ta, ’bɛ valé nyɔgɔménu ta, yé wo da anlé gɔ sauun va Jérusalɛm. Izraɛl lé munu woo dan balebanfɛnu nya fɛan zo, kana gibɔle gi Gakelebale lé kɔn gi, a zo lé wo dan da lɛ. Gakelebale ɛ fe.

²¹ Yé Gakelebale léé: Maa dan wo va mi kenu si lɛ Balebanzannu valé Lévinu nya.

²² Naa, la dɛrɛ valé tɛrɛ dɛrɛ lé maa dan wo kɛlɛ lɛ, wo dan vo lɛ yifaama an yuɛ gi fɛan zo, a zo lé ka kulu valé ka tɔ é dan vo lɛ ana yifaama. Gakelebale ɛ fe.

²³ Gakelebale léma: Mi faa é dan dia lɛ an ’lɛ moné dɛrɛ do do faa bɔrale valé flinyi do do faa nya.

²⁴ Yé dé wo bɔra, munu lé wo nwa an ma, wo dan wo galenu ye lɛ; naa, wo ziri ’ka gaan pelo, yé wo kyɛ ’ka dan diri lɛ pelo, yé wo dan kɛlɛ lɛ mi faa tadanmafɛ nya.