Ézai 65 - Kazambale lé Sebe Sauunu 1979

Bale éé we lɛdɔa nwamimazannu gi

¹ Munu lé wo ’ka we do laa lɛ an lee lo, maa wo dére ’ma. Maa anbo vo, munu lé wo ’ka an naginian lo, wolé an yele we ma. Bɛn lé an tɔ ’ka wo ma lo, maa lé wo lɛ léé: Maa looo, maa lo!

² Nwamimazannu lé woo tawoo zi naané ta wobozen lé bɔn‐in bɔrɔle yɛrama, maa an bɛ soian yifaama wo lɛ.

^3-4 An ’namawe lé ke léé, woo saraka boo zianféinu ta, woo lasikɔrɔpo kyɛ blé brikinu ta, woo wo nyanana kɛla mipana nya, ’té woo tu kinié suruwi blele nya gɔmagurunu gi, ’té wolé fɛble kananu gi tiri a, ’té wo ’ka daan a ma lo, wo nya. Naa, an bɛ soian wo lɛ yifaama.

⁵ Yé wo léé: ’I si ko ma, té i bié ko ma lo, ko a tegele. ’Bɛ zo wenu bɛ, woo ’naan an yuɛ ma bélé kyɛgoi zo, bélé kyɛ lé éé blé yifaama, a zo.

^6-7 We lé é dɔ maa gi yé maa dɔ a ta, yee lé ke ’ko: Maa ’ka dan tadɔ lɛ lo, maa dan wolé wenyané dɔ lɛ wo nwiin. Iin, kalé wenyané blɛn koo, ka tranu lé wenyané blɛn koo, maa dan a dɔ lɛ ka nwiin. Ka tranu lasikɔrɔpo kyɛ ble gɔnu nwiin yé wo an sɔnɔ gɔpanénu nwiin; maa dan wo banwo lɛ wo kɛlɛwe kyɛnnu yɛrama ’té. Gakelebale ɛ fe.

⁸ Gakelebale léma: Dé wo dɔrɔporo do ye, ’té a ’yi a a gi, wo léé: Té bé sɛrɛ lo, naa, mi drɔɔvofɛ lé. Yee duo yɛrama lé maa dan a kɛlɛ lɛ, an wuozannu sɔle an lɛ we ma, léé, maa ’ka dan wo faa kulu ga lɛ lo.

⁹ Maa dan Jakɔb kulu kɛlɛ lɛ, yé maa dan an zaragɔ kɛlɛ lɛ Juda punlazan do zé nya; munu lé maa wo si a va, tɛrɛ ’ko é dan kɛlɛ lɛ wozé nya, yé an wuozannu é dan nyana lɛ ana.

¹⁰ Anlé trubɛnu é dan fɛ ble lɛ Sarɔn lé fɛna pɛblɛɛna. Pɛnguru lé wa laama Akɔɔ, é dan kɛlɛ lɛ anlé dirinu blena nya; munu lé wo dan an nagini lɛ, wozé lé.

¹¹ Naa, ka lé ka sɔn vɔ Gakelebale ma, ’té ka gi éé saan anlé gɔ sauun ma, ’té ka fɛblele no miyili Gad lɛ yé ka nwɛ no miyili Méni lɛ,

¹² kazé é dan kɛlɛ lɛ gwɔun nya, yé ka faa é dan powuo zun lɛ yé wo ka bɔrɔ bo. Naa, maa ka laa, yé ka ’ka we lɛ an zi lo; maa we fe, yé ka ’ka tɔné dɔ lɛ an lɛ lo; naa, ka wenaané kɛlɛ an yuɛ gi. We lé é ’ka an ginanawe nya lo, yee lé ka si a va.

¹³ Bɛwemalé Mizan Gakelebale léma: Ka ye, an wuozannu é dan fɛ ble lɛ yé lɔrɔ é dan ka gyɛ lɛ; ka ye, an wuozannu é dan ’yi mini lɛ, yé ’yiminilɔrɔ é dan ka gyɛ lɛ; ka ye, an wuozannu gi é dan nana lɛ yé ka gi é dan blin lɛ ka ma;

¹⁴ ka ye, an wuozannu é dan lɛrɛ vɔ lɛ wo gi nanale saa zi, naa, ’kaa, ka dan wuvɔ lɛ ka gi kyɛ dɔle we ma yé ka dan gyɛ wuvɔ lɛ ka fuu sile ka ta we ma.

¹⁵ Ka tɔ é dan vo lɛ bale pa mi ma tɔ nya anlé munu lé maa wo si a va, wo lɛ. Mizan Gakelebale é dan ka gyɛ lɛ yé é dan tɔ dɛrɛ pa lɛ é wuozannu ma.

¹⁶ Mi lé é sɔ a lɛ léé, ’é drɔɔ ’é vo tɛrɛ ’ko la, é dan sɔ lɛ a lɛ léé, Webozen Bale ɛ ’é drɔɔ vo; dé mian é dan bale ’nyɔɔn lɛ tɛrɛ ’ko la, é dan Webozen Bale ’nyɔɔn lɛ; naa, kle kyɛn lé ka ble bɛ, ka gi é dan san lɛ ’bɛ ma, ’té wo ta saan an yuɛ gi.

Fɛ dɛrɛ kɛlɛle

¹⁷ Naa, maa dan la dɛrɛ valé tɛrɛ dɛrɛ kɛlɛ lɛ. We kyɛnnu lé wo gié bɛ, wo ’ka dan ’bɛ tɔ fe lɛ é dɛrɛ lo, yé a sele boen ’ka dan dɔ lɛ mi gi é dɛrɛ lo.

¹⁸ A fila vɔ léé, ka gi ’é nana ginanale blɛn nya, we lé maa dan a kɛlɛ lɛ, a we ma. Naa, maa dan Jérusalɛm kɛlɛ lɛ mi ginanale baba we ma, yé maa dan a tamunu kɛlɛ lɛ ginanazannu nya.

¹⁹ Maa dan Jérusalɛm kɛlɛ lɛ an ginanafla nya; maa dan anlé munu kɛlɛ lɛ an ginanamazannu nya. Wo ’ka dan wuvɔle valé siaale vun ’ma lɛ ana é dɛrɛ lo.

²⁰ Né kiéné valé mi segele lé wo yi lɛ ’ka dan sɔɔ lɛ lo, ’bɛ ’ka dan kɛlɛ lɛ ana lo; dé lɛɛ yɔ soruzan ga, ’té né kiéné bɛ, yé wenyanékɛlɛzan lé a lɛɛ kɛlɛ yɔ soru, wo dan bale pa lɛ ’bɛzan ma.

²¹ Wo dan kɔn dɔ lɛ yé wo dan nyana lɛ a gi; wo dan dɔrɔféi pa lɛ, yé wo dan a poro ble lɛ.

²² Wo ’ka dan kɔn dɔ lɛ yé mi bɛ é nyana ’bɛ gi lo; wo ’ka dan dɔrɔféi pa lɛ yé mi bɛ a poro ble lo. Naa, anlé munu lé yinu é dan kɛlɛ lɛ bélé yilinu zé zo, yé munu lé maa wo si a va, wo gi é dan nana lɛ ’wo bɛ panyanama ma.

²³ Wo ’ka dan nyanama pa lɛ yé ’bɛ é vo é pla lo, yé wo ’ka dan né yaa lɛ yé ’bɛnu é zamaga wo wo yuɛ va lo; wo dan kɛlɛ lɛ bɛn lé Gakelebale a drɔɔ vo, a nya, ’bɛzama, yé wo valé wolé nénu é dan vo lɛ ékeva.

²⁴ An tɔ laale é vo wo bɔrɔ gi mi, yé maa a zi pa; dé wa tan wefena an lɛ, ’té maa a nyi si é kwakwa.

²⁵ Glau valé ’blané é dan lu ble lɛ ékeva. Golizra é dan lu ble lɛ bélé diri zo, yé méné é dan vun ble lɛ. Wo ’ka dan fɛ tuo lɛ lo, yé wo ’ka dan fɛ sɛrɛ lɛ lo anlé gɔ sauun faa nwiin. Gakelebale ɛ fe.