Ézai 63 - Kazambale lé Sebe Sauunu 1979

Bale bɛntɛrɛnu kele

¹ Mi kyɛn ɛ ke sina Édom valé Bozra, ’té éé dan varɔ sɔɔn valé sɔ bile nyananyana nya é ta bɛɛ? Alé plɛplɛ blɛn lé é a fe, yé é ébo kɛla a gi blɛn bɛ, de léé? Maa lé; maa ɛ mi sile we gi fe yé mi vole éboma lé plɛplɛ a an lee.

² Mɛmalé ilé sɔnu a sɔɔn? Mɛmalé ilé varɔ a bélé mi lé éé dɔrɔ zɔn‐o é gane nya, alé varɔ zoo?

³ Yé é léé: Maa do ɛ dɔrɔ zɔn an gane nya; mi do kpen ’ka bɔ lɛ an va lo; an bliflile zi an wo zɔn; an wɛwɛ zi an wo wii. Wo nyɛ zén anlé sɔnu gi, yé anlé sɔ faa tiri dɔ a nya.

⁴ Naa, we lɛgi payi a an bli gi, yé anlé munu tabolɛɛ bɔ.

⁵ Maa nagini, yé an bɔvazan do kpen ’ka lo; an gi vuru léé, an dɔ zuozan ’ka lo, amalé anbozen bɛ bɔ an va, yé an wɛwɛ an fuu dɔ an ta.

⁶ An bli flile zi an munu zɔn an gane nya, an wɛwɛ wo gyɛ nwɛ zo, yé maa wo nyɛ zana tɛrɛ va.

Bale wezin kɛlɛ Izraɛl lɛ

⁷ Maa dan Gakelebale lé zinnu zana dɔɔ lɛ yé maa dan Gakelebale tɔ zin fe lɛ, We faa lé Gakelebale a kɛlɛ ko lɛ, a yɛrama. Zin blɛn lé é a kɛlɛ Izraɛlmunu lɛ, Élé nyanaizénle valé sɔlɛle blɛn yɛrama bɛ, maa dan a zuo fe lɛ.

⁸ Mizan léé: Weboen lé, wa anlé munu nya, wa nénu lé wo yuɛi ’ka dan blan lɛ lo, wo nya. Yé é kɛlɛ wo siéwegizan nya.

⁹ Wolé kleblele faa gi, lanje‐an wo si we gi lo; naa, Mizan boen ɛ wo tabo, élé sɔlɛle valé nyanaizénle gi é dɔ wo zuo yé é go wo nya yifaama, é li.

¹⁰ Naa, wo nwa a ma, yé wo a Léli Sauun bli kyɛ dɔ; yé é nɔla wo nyanézan nya, yé é guli dan wo va.

¹¹ We lé é kɛlɛ é li kwakwa Moizi bléyi va, a sele dɔ Bale lé munu gi; mi lé é wo si wɛyi va élé trubɛ tabinzan nya, é a kyɛɛn? Mi lé é Léli Sauun pa wo va,

¹² té éé zi gɔɔn‐an Moizi bɛyi lɛ ébo bɛ plɛplɛ nya, é a kyɛɛn? Mi lé é ’yi fén gyɛ wo ’lɛ, tɔ lé a glɛ ’ka lo, a yele we ma,

¹³ ’té é go wo nya ’yi fɔrɔle zi bélé mi lé éé vlanburuwo bwl la, ’té a sɔnéwɔlɛ ’ka saan lo, a zo, é a kyɛɛn?

¹⁴ Gakelebale Léli go wo nya flinna bélé wi lé é zun gɔ worona, a zo. ’Bɛ zo lé i go ilé munu nya, i tɔ kɛlɛle blɛn we ma.

Bɔle mi va valé nyanaizénle mi ta ma bazorole

¹⁵ Bii lé i ke lagi mi, ’té i nyanana ke sauun, ’té a tɔ ke é bɔle, bé nagini; i fuu dɔle i ta valé ilé plɛplɛ a kyɛɛn? I bli éé kɔɔan i gi fɛan zo, ’té i nyanai éé zén‐é an ta é vinin bɛ, é ’ka ’bɛ zo an vazia é dɛrɛ lo.

¹⁶ Duowo, bii ɛ ke ko ti nya. Naa, Abraam ’ka ko dɔɔa lo, yé Izraɛl ’ka a gi dɔɔa léé, ko ana lo; bii Gakelebale ɛ ke ko ti nya; a péli sia bléyi va ibo laan ko siéwegizan.

¹⁷ Oo Gakelebale, mɛmalé bé kɛlɛ léé, ko saan ilé zinu taa? Mɛmalé i ko bli kɛlɛ plɛplɛ yé ko ’ka kana lɛ i lee loo? ’I da é ziin, i wuozannu sɔle i lɛ we ma, bɛnnu lé ke ilé tɔnɔfɛ nya, wo sɔle i lɛ we ma.

¹⁸ Tɛrɛ ’ko kɛlɛ ilé munu zé nya bléyi sɛ nya; ko nyanézannu ilé fɛna sauun zɔn wo gane nya.

¹⁹ Ana mɔn, ko kɛlɛ bélé munu lé i ’ka plale wo nwiin lo, ’té wo ’ka wo laan i tɔ nya lo, wo zo. Oo, dé é a kɔɔn lé i la fee gyɛ yé i zun, gɔnu ma é dan nyɔɔn lɛ i ’lɛ,