Ézai 62 - Kazambale lé Sebe Sauunu 1979

¹ Siɔn sɔle an lɛ lé we ma léé, an ’ka dan tadɔ lɛ lo; Jérusalɛm sɔle an lɛ lé we ma léé, an ’ka dan flin lɛ pelo, Fɔɔ yé munu faa a silewegi ye bélé tukinile zo, Fɔɔ yé munu faa a vole éboma ye bélé sona bile zo.

² Yé bɛnnu é dan i sile we gi ye lɛ, Yé minwiinzannu faa é dan ilé fua tɔ bɔ lɛ; Yé wo dan i laa lɛ tɔ dɛrɛ lé É si Gakelebale ’léé, a nya.

³ I dan bi lɛ nyananyana Gakelebale lee, bélé kyankoro zo. I dan kɛlɛ lɛ bélé minwiinzan blɛn lé nɔɔn zo, ilé Bale lee.

⁴ Wo ’ka dan i laa lɛ, lebɔrale, é dɛrɛ lo; Wo ’ka dan ilé tɛrɛ laa lɛ, boatɛrɛ, é dɛrɛ lo; Wo dan i laa lɛ Esiba, ’bɛ gi léé, é sɔ an lɛ, Yé wo dan ilé tɛrɛ laa lɛ, Bula, ’bɛ gi léé, bofla le; I sɔ Gakelebale lɛ, ’bɛzama, Yé ilé tɛrɛ zana é dan kɛlɛ lɛ.

⁵ Pɛniɛ éé blɛnzan sié fɛan zo, A zo duo lé i benu é dan i si lɛ. Fɛan zo lé bodɛrɛsizan é zana gi nana, A zo lé i dan ilé Bale gi nana lɛ.

⁶ Jérusalɛm, maa fla taginizannu dɔ ilé gɔrɔnu ta; Wo ’ka dan ’wo tadɔ lɛ béli valé yiéyi lo. Ka lé ka ke a sele dɔna Gakelebale gi, Té ka flin lo.

⁷ ’Ka vo Bale ma kyɛdɔna, Fɔɔ ’té é Jérusalɛm dɔ é wo é pa gi Yé a tɔ é bɔ tɛrɛ faa la.

⁸ Gakelebale é bɛyi valé é bɛ plɛplɛ ’nyɔɔn léé: Maa ’ka dan ilé ’sa nɔ lɛ i nyanézannu lé fɛblele nya é dɛrɛ lo, Ilé dɔrɔ lé ke ilé nyanama tɔnɔ nya, Bɛnnu ’ka dan a mini lɛ é dɛrɛ lo.

⁹ Naa, munu lé woo ’sa gya, wo ɛ dan a ble lɛ Yé wo Gakelebale tɔ zin fe, Munu lé woo dɔrɔ soo, wo dan a mini lɛ Anlé fɛna sauun na gɔrɔ gi.

¹⁰ ’Ka giéoo, ’ka gié flagɔrɔ ’léé! ’Ka zi ma’lɛrɛ munu lɛ. Ka zi ta kɛlɛoo kɛlɛ! ’Ka gɔlɛnu si zi ta. ’Ka drapo nwa munu vazia.

¹¹ We lé Gakelebale a zana dɔɔ fɔɔ tɛrɛ glɛ sina, yee lo; É léé, ’Ka fe Siɔn munu lɛ léé, Ka yua, ka siwegizan lé é dan bɛ; Ka ye, ka gooli a a lee, Yé a ’lɛvlɛ lé ke mibanwole nya.

¹² Wo dan wo laa lɛ, munu sauun lé Gakelebale wo tabo, Yé bii, wo dan i laa lɛ, blibɔmafla lé wo ’ka sɔn vɔa a ma lo.