Ézai 61 - Kazambale lé Sebe Sauunu 1979

Sile we gi ma we néné

¹ Mizan Gakelebale Léli a an ta, Naa, Gakelebale an suu nyɔnɔ nya, anlé wenéné fele we tɔntɔn?-?bɔmazannu lɛ we ma. É an pa zia, munu lé blikyɛdɔwe blɛn bɔ wo ma, wo bélile we ma; A fele luugimunu valé bokɔngimunu lɛ léé, Wo vo woboma.

² É an pa zia Gakelebale lé zin‐yelɛɛ zana dɔɔle we ma, ’Bɛ valé kolé Bale lé welɛgipayi nya. É an pa zia nyanéblemunu faa tɔrɔpaale we ma,

³ Yé an kyankoro nɔ Siɔn lé nyanéblemunu lɛ kyɛyee pa gi, Yé maa ginanale nɔ gyɛbole pa gi, Yé maa Bale tɔzinfele nɔ wo lɛ bélé varɔ zo, fuu sile wo ta pa gi, Amalé wo dan wo laa lɛ wetegele lé térébɛnt yili lé Gakelebale a féi pa, é tɔ bɔle we ma.

⁴ Wo dan fla kwa pa lɛ é pa gi, Fɛ lé a guru zana a gi é kyɛn, wo dan a nwa lɛ é pa gi; Fla lé wo ’wii a ta ana mɔn yé é sɛrɛ, Wo dan a dɛrɛ pa lɛ.

⁵ Bɛnnu é dan da lɛ bɛ, ’té woo fɛ no kalé trubɛ lɛ, Bɛnnu benu é dan kɛlɛ lɛ kalé nyanamapamunu valé dɔrɔféi pazannu nya.

⁶ Naa, ’kaa, wo dan ka laa lɛ Gakelebale banzannu, Wo dan tɔ pa lɛ ka ma léé, kolé Bale wuozannu; Ka dan bɛnnu lé fuafɛnu ble lɛ, Yé ka dan kabo tɔ bɔ lɛ wo tɔbɔfɛnu gi.

⁷ Ka dan tɔnɔ ble lɛ gɔnɔ fié, serele bole ka ma pa gi; Wo gi é dan nana lɛ, yaragyɛwe lé é bɔ wo ma, ’bɛ pa gi; Wo dan tɔnɔ ble lɛ gɔnɔ fié wolé tɛrɛ la, Yé wo ginanale glɛ ’ka lo.

⁸ Naa, maa, Gakelebale, we tegele sɔ an lɛ, ’Wiile fɛ ta kyeenwole nya valé weple za a an gi; An yuɛgi ’ka dan blan lɛ wo banwole ma lo. Gipawe lé é ’ka nyaan lo, maa dan a kɛlɛ lɛ wo va.

⁹ Wo dan wo bɛn dɔɔ lɛ bɛnnu va, Munu é dan wo kulu dɔɔ lɛ; Munu faa lé woo wo yé, wo dan a gi dɔɔ lɛ léé, Bɛn lé Gakelebale a drɔɔ vo, wo lo.

¹⁰ An gi é dan nana lɛ Gakelebale gi, An boen ginanale anlé Bale gi é dan an gi san lɛ an ma; Naa, é sile we gi zén an ta varɔ nya, É vole éboma zén an ta sɔ nya Bélé lesizan éé kyan zén‐é ’é ta fɛan zo, a zo, Bélé bosizan éé ’lɛrɛfɛ zén‐é ’é ta fɛan zo, a zo.

¹¹ Naa, tɛrɛ éé fɛ kɛla fɛan zo, Yé zian féi gɔn éé bɔa fɛan zo, A zo duo lé Mizan Gakelebale é dan silewegi valé tɔzinfele bɔra lɛ, Bɛnnu faa yuɛ va.