Ézai 60 - Kazambale lé Sebe Sauunu 1979

Jérusalɛm tɔ é dan bɔ lɛ

¹ I nwa, i va ’é kini ma, naa, i vakinisan a dana, Yé Gakelebale lé fuasan a i ta.

² Ka ye, gunuti éé tɛrɛ ta sɔɔlaan, Yé munu a gunu tiritiri va; Naa, Gakelebale a i ta, Alé fuasan bɔra bii ɛ va.

³ Bɛnnu é dan tawo lɛ i san va, I bile é dan minwiinzan blɛnnu va kini lɛ.

⁴ ’I yuɛ bɔrɔ i zi, bé nagini; Mi faa a zénna ékeva, wa dana i va, I benu a sina baa yé wo da, Wa dana i lunu nya ’wo bɛ gi.

⁵ Dé wɛyi va fuafɛnu da i vazia, Dé bɛnnu lé fɛwezannu da i va, I gi é dan nana lɛ a ma, I zuru é dan vɔ lɛ yé i bli é dan fan lɛ ginanale nya.

⁶ Nyɔgɔmé kiɛre é dan kɛlɛ lɛ ilé tɛrɛ la, Nyɔgɔménu lé wo si Madian valé Éfa, woo lé. Wo dan si lɛ Séba tɛrɛ la, Wo ta kɔné lé ke kyan valé lasikɔrɔpo nya. Yé wo dan Gakelebale tɔ ma gyɛ lɛ.

⁷ Kédaa tɛrɛ la trubɛnu faa é dan zén lɛ ékeva i va; Nébajɔt tɛrɛ la ’blagɔnénu é dan kɛlɛ lɛ izé nya; Wo dan an ban lɛ wo nya, yé ’bɛ é dan an gi nana lɛ, Yé maa dan an tɔbɔkɔn tɔ bɔ lɛ.

⁸ Wo lé wo ke giéna bélé lati zo bɛ, de lé ke wo nyaa? Wo lé wo ke sina bélé plawuonu lé ke gona ’wo kɔn va, wo zo, denu léé?

⁹ Naa, wɛyiworona tɛrɛ la munu lé wo bli ke an lɛ, wonu lé; Taasis lé ’yitagoronu a zi ’lɛ, ’Té wo si ilé nénu nya baa, Wo valé wolé gɔɔlifu valé wolé kyan nya, Gakelebale, ilé Bale tɔ lé we ma, Izraɛl lé Mi Sauun lé é i tɔ kɛla blɛn, alé we ma.

¹⁰ Bɛnnu é dan ilé kɔngurunu dɔ lɛ wo pa gi, Yé wo nwiinzan blɛnnu é dan kɛlɛ lɛ i wuozannu nya; I an bli fli, amalé maa i bla, Naa, an nyanai é dan zén lɛ i ta duowo.

¹¹ Ilé flagɔrɔ ’léé lɛ é dan vo lɛ é sole bléyi faa va; A lɛ ’ka dan tan lɛ é yiéyi valé é béli lo, léé, Bɛnnu ’é da ’wolé fɛwezannu nya i va, Wo nwiinzan blɛnnu valé ’wo bɛgizannu nya.

¹² Dé bɛn‐o bɛn‐an é a fe léé, ’é ’ka plaan i wuo lo, é dan zamaga wo lɛ, ’Bɛ bɛn ’konu kulu é dan ga lɛ.

¹³ Liban lé fuafɛnu é dan da lɛ i va; Siprɛyili koo, ɔɔmeyili koo, buiyili koo, Wo faa é dan anlé fɛna sauun kɛlɛ lɛ é nɔnɔmi; An dan an gane dɔrana tɔ kɛlɛ lɛ blɛn;

¹⁴ Yaaitazannu é dan dia lɛ i ’lɛ; Wo lé wo serele bo i ma, wo dan ’wo ’wuo wɔra lɛ i gane wuo. Wo dan i laa lɛ Gakelebale lé fla; Wo dan i laa lɛ Izraɛl lé Mi Sauun lé Siɔn fla.

¹⁵ Fɛana lé wo i za pa yé wo i vo, ’Té mi do ’ka bɔrɔwona i ta lo, ’Bɛna lé maa dan i kɛlɛ lɛ bélé mi’lɛrɛkyan zo lɛɛfaama; Ma dan i kɛlɛ lɛ mi ginanama fla nya mi kulu faa zé nya.

¹⁶ I dan bɛnnu lé fɛ nyɔnɔzannu ble lɛ Yé minwiinzannu é dan i pa lɛ, Yé i dan a gi dɔɔ lɛ léé, maa a Gakelebale, i siéwegizan nya, I tabozan nya, Jakɔb lé Mi plɛplɛ nya.

¹⁷ Maa dan kyan nɔ lɛ i lɛ zéné pa gi, Maa dan gɔɔlifu nɔ lɛ i lɛ foliɛwɔlɛ pa gi, Maa dan zéné nɔ lɛ i lɛ yili pa gi, Maa dan foliɛwɔlɛ nɔ lɛ i lɛ gɔlɛ pa gi, Maa dan vole drɔɔ saa kɛlɛ lɛ izé nya; Wo dan wetegele saa kɛlɛ lɛ i va.

¹⁸ Wo ’ka dan glawe ’ma lɛ ilé tɛrɛ la é dɛrɛ lo, Wo ’ka dan ’wiile fɛ ta valé fɛ sɛrɛle vun ’ma lɛ ilé fɛna é dɛrɛ lo; Wo dan i gɔrɔ laa lɛ, sile we gi; Wo dan i gɔrɔ ’léénu laa lɛ, tɔzinfele.

¹⁹ Yiri ’ka dan bi lɛ i ta é yiéyi é dɛrɛ lo; Moné ’ka dan i va kini lɛ é dɛrɛ lo. Naa, Gakelebale é dan kɛlɛ lɛ ilé san nya yifaama, Ilé Bale é dan kɛlɛ lɛ i tɔbɔmazan nya.

²⁰ Yiri ’ka dan vɔ lɛ i ta é dɛrɛ lo, Moné ’ka dan vɔ lɛ i ta é dɛrɛ lo; Naa, Gakelebale é dan kɛlɛ lɛ ilé san nya yifaama, Yé ilé gyɛboyinu é dan gié lɛ.

²¹ Mi tegele saa ɛ dan kɛlɛ lɛ i va; Ana tɛrɛ é dan vo lɛ wozé nya yifaama; Munu ’ko lé maa wo suru, wo dan fɔn lɛ a la, An wo kɛlɛ an tɔbɔzannu nya.

²² Mi do é dan kɛlɛ lɛ mi wuru soru nya, Yé bɛn tɔɔtɔɔ é dan kɛlɛ lɛ bɛn plɛplɛ nya. Maa, Gakelebale, maa dan we ’ko kɛlɛ lɛ é kele wozé bléyi va.