Ézai 59 - Kazambale lé Sebe Sauunu 1979

Balelayezan munu lé weplenu fe

¹ Gakelebale bɛ éé sɔa ka sile we gi nya; a tɔné ’ka é ’wiile yé é ’ka we ’ma lo lo.

² Naa, kalé wenyané blɛn ka valé kalé Bale kini ékema. Kalé wenyané ɛ a yara yɔɔ ka lee, yé é a tɔné dɔle ka lɛ yi gaan.

³ Mi nyɛ ka bɛ tiri dɔ, yé wenyané ka bɛnwɔlɛnu tiri dɔ; ka lɔlu éé vié woo, woo weple maan ka nɛnɛ ta.

⁴ Ka do kpen ’ka mi tɔ fé tegele lo. Ka do kpen ’ka we sié ka nwiin we drɔle nya lo. Ka paan boawenu ta, ’té ka we fé vié nya. Ka wenaané bɔn sié yé ka né yaa wenyané blɛn nya.

⁵ Ka buaan bɔménéluzanuo nyɛné ta yé ka kolotɔné duaan vɔa. Mian é wo nyɛné blé, éé gaan; yé dé wa do ’wii, éé bɔraan a gi ménénwunu nya.

⁶ Kalé sɔ ’ka varɔ bɔa lo; sɔ lé ka tan, éé nyaan ka ma; ka kɛlɛwe a weple nya, glawe kɛlɛle ka bɛ faan.

⁷ Ka vlanburuwo wenaané vazia; ka ta a é kelekele weanwiinlozan nyɛ zanale ma; ka gibɔrɔle a weple gibɔrɔle nya; ’wiile fɛ ta valé guru zanale a gi a kalé zi ta.

⁸ Ka ’ka vole drɔɔ zi dɔɔa lo, yé ka kɛlɛwe do kpen ’ka tegele lo. Ka zi plinle sian. Miomian éé tawoo ’bɛna, é ’ka vole drɔɔ dɔɔa lo.

Munu wolé wenyané fe

⁹ Bɛwemalé ko vole koboma a ko ma baa, yé sile we gi ’ka ko lɛ é pu lo. Ko a san lɛbɛnna, ’té gunuti lo. Ko a fɛna fu lɛbɛnna, ’té ko tawoo gunu tiritiri va.

¹⁰ Ko bɛ daan, bélé yuɛwiizan ɛ ke é bɛ danna kɔnguru ma; ko bɛ daan bélé mi lé a yuɛ ’ka lo, a zo; ko sɔné éé saan é yiéyi bélé béli lé; ko a fɛ kiɛre méléna, ’té ko a bélé migalenu zo.

¹¹ Ko faa éé wé bélé wi blɛn urisi zo; ko dunnuan bélé plawuo zo. Ko a vole koboma lɛbɛnna, yé é ’ka ana lo; ko a sile we gi lɛbɛnna yé é a ko ma baa.

¹² Naa, ko ilé bélidɔwenu sɛrɛ kiɛre i yuɛ va, yé kolé wenyané a ko ma wefezan nya. Ko a kolé bélidɔwe sɛrɛlenu nya do, yé ko kolé wenyané blɛn dɔɔ.

¹³ Ko kɛlɛ wegyɛzannu valé yuɛgiblanzannu nya Gakelebale va; ko sɔn vɔ kolé Bale ma; ko kɛlɛ glakɛlɛzannu valé nwamimazannu nya; viéwe péli sia ko bli gi, ’té ko a bɔrɔan ko bɔn‐in.

¹⁴ Yé vole koboma gyɛ é zuo, yé sile we gi dɔ ko ma baa; yé webozen san ko lee flavuun la, yé we drɔle ’ka bɔa biéle lɛ ko lɛ lo.

¹⁵ Webozen ta saan; mi lé éé sié wenaané kɛlɛle ma baa, wo alé fɛnu si a lee. Gakelebale a ye léé, we drɔle ’ka é dɛrɛ lo, amalé a yara kɛlɛ é nyané.

Bale é dan élé munu béli lɛ

¹⁶ É a ye léé, mi do kpen ’ka ana yé ’bɛ é dɔ we ’ko gi lo, amalé a gi vuru, amalé é léé, ’é bɛ é dan bɔ lɛ ’é va, yé ’élé wetegele é dan dɔ lɛ ’é zuo.

¹⁷ É dan wetegele zén lɛ ’é ta gɔlɛtayɔɔfɛ nya, yé é dan silewegi wɔra lɛ ’é ’wuo ma bélé kanakoro zo; é dan welɛgipale zén lɛ ’é ta varɔ nya, yé é dan maawole zén lɛ ’é ta sɔ zo.

¹⁸ É dan mi faa do do banwo lɛ wo kɛlɛwe yɛrama; é dan é mazannu banwo lɛ é wɛwɛ nya; é dan é nyanézannu banwo lɛ yee duo zo; é dan wɛyiworona tɛrɛ la munu banwo lɛ yee duo zo.

¹⁹ Kanale Gakelebale lee é dan sia lɛ yirivɔnazia; kanale alé fuasan lee é dan sia lɛ yirinwanazia. É dan da lɛ bélé ’yiyoro plɛplɛ lé Gakelebale lé fu é go a nya, a zo.

²⁰ Mitabozan é dan da lɛ Siɔn lé we ma. Jakɔb lé munu lé wo bli nɔla wolé wenyané ma, é dan da lɛ wolé we ma; Gakelebale ɛ fe.

²¹ Gakelebale léé: An dan gi pa lɛ wo va ’ko zo: An Léli lé ke ka ta, ’bɛ valé an dére lé maa pa ka ’léé, wo ’ka dan si lɛ ka ’léé lo, wo ’ka dan si lɛ kalé nénu ’léé lo, wo ’ka dan si lɛ ka nénénu ’léé lo; é sia bléyi ’ko va, fɔɔ a glɛ ’ka lo. Gakelebale ɛ fe.