Ézai 58 - Kazambale lé Sebe Sauunu 1979

Lɔrɔsɔnle bozen

¹ ’I siaa plɛplɛ, té ibo kun lo; ’i dére nwa plɛplɛ bélé béli zo; ’i anlé munu lé weple fe ’wo lɛ, ’i Jakɔb lé munu lé wenyané fe ’wo lɛ.

² Yifaama woo an naginian. É sɔ wo lɛ léé, wo an kɛlɛwenu dɔɔ. Woo we fé an lɛ bélé bɛn lé woo we tegele kɛla, ’té wo ’ka sɔn vɔa wolé Bale lé bélidɔwe ma lo, wo zo, yé wo léé, ’maa we gi bɔi é bɔina. É sɔ wo lɛ léé, ’wo bié ’wolé Bale ma.

³ Dé ko lɔrɔ sɔn yé i ’ka a yé lo, ’bɛ tɔnɔ ɛ ke mɛ nyaa? Dé kobo kɛlɛ kiéné yé i yuɛ sia ko la, ’bɛ tɔnɔ ɛ ke mɛ nyaa? Ka ye, kalé lɔrɔsɔnyi la, ka kabo no kalé bɔn‐in bɔrɔmawenu lɛ, yé ka nyané paan kalé nyanamapazannu ta.

⁴ Ka ye, ka lɔrɔ sɔn‐o zavɔle valé we siale we gi, yé ka fɔlɛ duun‐an bli nyané nya. Ka ’ka lɔrɔ sɔn‐o lɔrɔsɔnbɛ yɛrama lo; ka kɛla léé, wo ka dére ’ma loru baa.

⁵ ’Bɛ zo lɔrɔsɔnle ’ko, ’bɛ an gi nanaan? Yé ’bɛ zo lé mi ébo kɛla kiénéé? Ka ’wuo tua bélé blawɔlɛ zo yé ka yia bɔlɔ valé kyɛyee zénle nya ka ta. ’Bɛ a Gakelebale sɔlɛyi nya é wo laa, yé ka a laa lɔrɔsɔnlee?

⁶ Lɔrɔsɔnle lé éé an gi nanaan, yee lé ke ’ko: Munu lé ka wo vɔ bokɔn gi é pla, ’ka wo bɔra; ’ka luubale kini munu bɔrɔ ma; munu lé ka yaan wo ta, ’ka wo vo woboma; munu lé ka kɔné blɛn dɔ wo nwiin, ’ka wo vo woboma.

⁷ Mi lé lɔrɔ ke a gyɛna, bé zé fɛblele nɔ; nyanaizénlazan lé a yiana ’ka lo, bé wɔra ka va; dé ka mi do ye é porole, ’ka sɔ zén a ta; té ka nwunzi dɔ kabo lé mi ta lo.

⁸ Dé bé kɛlɛ, i san é dan bɔra lɛ bélé tukinile zo, yé i dan béli lɛ é kele. Ilé wetegele é dan tawo lɛ i ’lɛ, yé i dan tawo lɛ Gakelebale lé fuasan nya.

⁹ Yé i dan Gakelebale laa lɛ, yé é dan we lɛ; i dan siaa lɛ yé é dan a fe lɛ léé: Maa lo. Dé i daan yaale ma mi ta, dé i daan bon‐ɛnle ma mi nya, é valé mi sɔnɔdérenu fele ma,

¹⁰ dé ibo lé fɛblele nɔ lɔrɔgyɛzan lɛ, dé i nyanégyɛzan kan, i san é dan nwa lɛ gunutinu va, yé gunuti é dan kɛlɛ lɛ bélé yiéyi zo i nya.

¹¹ Gakelebale é dan zi gɔɔn lɛ i lɛ yifaama. É dan i boen kan lɛ fɛna gale na; é dan i wi faa dɔ lɛ plɛplɛ; i dan kɛlɛ lɛ bélé féi lé wo ’yi zén a ta, a zo, bélé ’yi’wuo lé a gi ’yi ’ka bélié lo, a zo.

¹² Ilé munu é dan fla pa lɛ fla kwa la; i dan a gane kyɛn vɔ lɛ; wo dan i laa lɛ fɛsɛrɛle ma’lɛrɛzan. Wo dan i laa lɛ zi kwa vuogizan, munu kɛlɛle tɛrɛ ’ko la we ma.

Flinyi sɔnné pale ma tɔnɔ

¹³ Dé ibo kun flinyi nya, dé i ’ka ilé blibɔmawe kɛla anlé yi nyané la lo, dé flinyi kɛlɛ i ginanamayi nya, yi ’ko lé ke Gakelebale lé yi nya, dé bé ye ilé yi nyané nya, dé i ’ka we bɛ kɛla yi ’ko nya lo, dé i ’ka ibo no ibo lé bɔn‐in bɔrɔmawe lɛ lo, yé i ’ka we pla fé lo, ’bɛ zo lé i yi ’ko kɛlɛ blɛn,

¹⁴ ’té Gakelebale é dan kɛlɛ lɛ i ginanamazan nya, yé maa dan i kɛlɛ lɛ tɛrɛ la mi blɛn nya. I gi é dan nana lɛ i ti Jakɔb zara blele ma. Naa, Gakelebale ɛ fe ébo ’léé.