Ézai 57 - Kazambale lé Sebe Sauunu 1979

Bale we dɔ Izraɛlnu nwiin wolé miyili banle we ma

¹ Mi tegele éé gaan yé ’bɛ ’ka mi do yuɛgi bɔa lo. Woo mi zinnu sian yé é ’ka dɔ lɛ mi do kpen gi léé, wenaané zi lé wo mi zinnu sian lo.

² Mi lé éé tawoo zi drɔle ta, é dan wɔra lɛ vole drɔɔ na, yé é dan flin lɛ élé yialafɛ ta.

³ Naa, ’kaa yokɛlɛ le benu, leginizan valé bɔrɔdɛ dɔgɔnɔ, ’ka bié ze.

⁴ Ka a we nanana de ɛ maa? Ka ’léé blɛn fuoan de ɛ ma, ’té ka nɛnɛ bɔraan ’bɛ lɛɛ? Ka ’ka wenyané kɛlɛnénu valé viéwobɛn nya loo?

⁵ Ka kyɛ paan ka ke ma térébɛnt yilinu sɔnɔ, yili drɔɔdrɔɔ faa wuo, ’té ka nénu bɔrɔ boo pɛnguru gi, gɔlɛ fɛn gyɛnanu na. Yee kaan loo?

⁶ Izé a yuu va naaninvɔlagɔlɛnu nya; izé ’bɛoo ’bɛ. Wo ta lé ka kalé yoban’yi zanaan; kalé blɛfɛnu kɛlɛ wo ɛ lɛ. We ’ko ’ka ’naan an ma loo?

⁷ Ka kalé yialafɛ plaan gɔblɛn torole nwiin; yee fɛkona lé ka yo baan.

⁸ Ka kalé yonu plaan duoli valé duolivɔiyili zuo, naa, ka a an ma baa, ka ’ka kalé yialafɛ ma’lɛrɛ lɛ anlé we ma lo. Ka a yiina mi kiɛre va, yé ka gi pa wo va; wolé yaawole sɔ ka lɛ, ka tiri dɔ wo naginile nya.

⁹ Ka goo nyɔnɔ nya minwiinzan blɛn va; kalé zianbla ginzannu bo bɔ. Ka munu nwunvɔa baa, ka goo kalé wenyané kɛlɛna fɔɔ yé kabo zun gamunu nyanana.

¹⁰ Kalé ta kiɛre wole ma lé ka wɔ lɛ gi nyaa ka ma, yé ka ’ka a fé léé, ka sɔn vɔ a ma, lo. Plɛplɛ a tan ka lee, amalé ka ’ka gi dɔɔa léé, gyɛ a ka ma lo.

¹¹ Ka a kanana de ɛ lee yé ka gɔné bɛ ginian an wuo yé an sele ’ka dɔa ka gi lo, yé ka ’ka ka gi bɔrɔan an ma loo? An tadɔna ka zi ’ka mɔn lɛ loo? Bɛwemalé ka ’ka kanaan an lee lo.

¹² Maa dan kalé we tegele zana dɔɔ lɛ, yé ka ’ka dan tɔnɔ ye lɛ ka kɛlɛwenu gi lo.

¹³ Dé ka siaa, kalé miyili kiɛre wo dan ka si lɛ we gii? Fu é dan go lɛ wo faa nya, fu fɛɛle do é dan wo sia lɛ. Mian éé paan an ta, é dan tɛrɛ ye lɛ tɔnɔfɛ nya; anlé gɔ sauun é dan kɛlɛ lɛ azé nya.

Bale léé, ’é dan wo béli lɛ

¹⁴ Wo dan a fe lɛ léé: ’Ka zi ma’lɛrɛoo, ’ka zi ma’lɛrɛ yɔrɔyɔrɔ! ’Ka fɛ polunu si anlé munu ’lɛ zia.

¹⁵ Loruzan lé a nyanana ke ana lɛɛfaama, ’té a tɔ ke sauun, é léma: An nyanaan fɛna lorunu na, fɛna sauun na, naa, an nyanaan é ziin, mi lé a bli kyɛ ke é dɔle, ’té ébo kɛlɛ kiéné, a va, léé, maa fuu dɔ bokiénézan ta, yé maa blikyɛdɔzan tɔrɔ paa.

¹⁶ Munu lé maa wo kɛlɛ, dé wo dia an ’lɛ wo fuu sile nya wo ta, é ’ka sɔ lɛ an lɛ léé, maa vo za kɛlɛna yifaama lo; é ’ka sɔ lɛ an lɛ léé, an bli é vo flina yifaama lo.

¹⁷ An bli fli wo ma yé maa wo bla wo bli blɛn lé we ma; an wɛwɛ lé we ma lé maa yɔɔ wo lee, yé bɔrɔvɔɔzan go élé blibɔmazi ta.

¹⁸ Maa a kɛlɛwenu ye, yé maa dan a béli lɛ. Maa dan zi gɔɔn lɛ a lɛ; maa dan a tɔrɔ paa lɛ, yee valé munu lé woo wuvɔa wo nya, wo nya.

¹⁹ Maa dan an tɔ zin fele pa lɛ a ’léé. Mi lé ke baa valé mi lé ke é pu, ’wo vo drɔɔoo, ’wo vo drɔɔ; maa dan wo béli lɛ. A zo lé Gakelebale a fe.

²⁰ Naa, mi nyanénu a bélé wɛyi lé éé nanoan, a zo. É ’ka bɔalɛ léé, é vo drɔɔ lo, ’té alé ’yinu éé nanoan fɛ naanénu nya;

²¹ mi nyanénu ’ka vo drɔɔ lo. Anzé Bale ɛ fe.