Ézai 55 - Kazambale lé Sebe Sauunu 1979

Bale a bɛnnu faa laana

¹ ’Kaa faa lé ’yiminilɔrɔ ke ka gyɛna, ’ka da ’yi va, Dé gɔɔli ’ka mian lee looo, ’Ka da fɛ lɔ yé ka ble. ’Ka da, ’ka nwɛ valé dirinyɔyi lɔ, gɔɔli we kaan lo, yé a banwowe ’ka a gi lo.

² Mɛmalé ka gɔɔli sɛra fɛ lé é ’ka fɛblele nya lo, a maa? Mɛmalé ka nyanama paan fɛ lé é ’ka ka kaan lo, a maa? Amalé ’ka tɔné dɔ an lɛ yé ka dan fɛ zin ble lɛ, Yé fɛ lé a néné éé mi ’léli selean é ’léé, i gi é dan nana lɛ a blele ma.

³ ’Ka an ban ka tɔné nya, yé ’ka da an va, ’Ka tɔné dɔ yé kaboen é dan vo lɛ é yuɛma; Gipawe lé é ’ka nyaan lo, kaa dan a kɛlɛ lɛ, Yé zin lé maa fe léé, maa dan a kɛlɛ lɛ David lɛ, a yi ’ka dan ga lɛ lo.

⁴ Maa a dɔ wenayezan nya munu lɛ, Maa a dɔ munu nwiinzan valé wo bélidɔzan nya.

⁵ Bé ye, bɛnnu lé i ’ka wo dɔɔa lo, i dan wo laa lɛ, Yé bɛnnu lé wo ’ka i dɔɔa lo, wo dan go lɛ vlan nya i va, Gakelebale, ilé Bale lé we ma, Izraɛl lé Mi Sauun lé éé i tɔ kɛla blɛn, ’bɛ lé we ma.

⁶ ’Ka Gakelebale nagini, bléyian va lé ka bɔa a yele lɛ, a bléyi va; Bléyian va lé é ke ka sɔnɔ, ’ka a tɔ laa.

⁷ Mi nyané ’é si ’é kɛlɛwe zuo ma, Yé mi ple ’élé gibɔrɔle nɔla ma, ’É nɔla Gakelebale va ma, yé ’bɛ é dan nyanai zén lɛ a ta, ’É nɔla kolé Bale va ma, ’bɛ wɔlɛgi ’ka nyaan ’é ma mi ma we vole nya lo.

⁸ Gakelebale léé, ’É gibɔrɔle ’ka bélé ka gi bɔrɔle zo lo, Yé ka kɛlɛwe valé ’é kɛlɛwe ’ka bɔa ékema lo.

⁹ Fɛan zo lé la valé tɛrɛ ke é sile ékema baa, A zo duo lé an kɛlɛwe valé ka kɛlɛwe ke é sile ékema, Yé a zo duo lé an gibɔrɔle valé ka gibɔrɔle ke é sile ékema.

¹⁰ Lɛɛ valé glasépun éé sié la gi fɛan zo, Yé éé tɛrɛ kɛla drɔɔdrɔɔ yé éé fɛ dɔa yé é lunu gɔn bɔa, Yé éé fɛ no fɛwɔlɛ vɔzan lɛ, Yé éé blefɛ no fɛblezan lɛ faa Yé éé nɔlaan an va,

¹¹ A zo duo lé an dére lé éé sié an ’léé, É ’ka nɔlaan an va é pla lo, ’Té é anlé blibɔmawe Valé an bɔn‐in bɔrɔmawe faa lɛ sɔɔ é wo.

¹² Iin, ka dan bɔra lɛ ginanale nya, Yé maa dan go lɛ ka nya drɔɔ; Gɔblɛnnu valé gɔpanénu é dan fan lɛ ginanale nya ka ’lɛ, Yé féi yilinu faa é dan wo bɛ gyɛ lɛ.

¹³ Siprɛyili é dan bɔra lɛ léliyili pa gi, Yé miiteyili é dan bɔra lɛ danan pa gi; ’Bɛ é dan kɛlɛ lɛ Gakelebale tɔbɔwe nya, É dan kɛlɛ lɛ weseledɔmigi fɛ lé a glɛ ’ka lo, ’té é ’ka sɛra lo, a nya.