Ézai 54 - Kazambale lé Sebe Sauunu 1979

Izraɛl sɔ Bale lɛ

¹ Bii sɔnzan lé i ’ka né yaan lo, i gi ’é nana, Bii lé i ’ka vɔle lu zi dɔɔa lo, ’i fɔrɔ ginanale blɛn nya; Naa, lebɔrale benu é dan kɛlɛ lɛ kiɛre Yé é mini bofla le benu ta, azama. Gakelebale ɛ fe.

² Ilé sɔkɔn dɔna gi ’é gyɛ; ’Wo sɔ fwila i nyanana ta; Té i dɔ lo. ’Ilé sɔkɔn kunbale toro; ’Ilé sɔkɔn poludɔmayili suru plɛplɛ.

³ I gi é dan gyɛ lɛ i bɛyila valé i bɛbola, azama. I kulu é dan fan lɛ bɛnnu gi, Yé flanu lé wo vo bwi nya, wo dan nyana lɛ wo ta.

⁴ Té i kana lo, naa, i gi ’ka dan blin lɛ i ma lo, Té i yuɛ é tana lo, naa, i yuɛ bɛ ’ka dan tana lɛ é dɛrɛ lo; Yara lé é i gyɛ i boronéla bléyi va, i gi é dan san lɛ ’bɛ ma, Yara lé ke i ’wuo ma, i kɛlɛle gyɛzarale nya we ma, a sele ’ka dan dɔ lɛ i gi é dɛrɛ lo.

⁵ I kɛlɛzan a i zana nya, azama. A tɔ lé, lai sunyanu lé Gakelebale; Izraɛl lé Mi Sauun a i tabozan nya; A tɔ lé, tɛrɛ faa la munu lé Bale;

⁶ Naa, Gakelebale i laa bélé le lé wa vo, ’té a bli kyɛ dɔ, a zo, Bélé le lé é boronéla bo si, yé a zana sɔn vɔ a ma, a zo. Yee lé ilé Bale a fe.

⁷ Maa i vo bléyi sɛ nya, Naa, maa dan i si lɛ é ziin sɔlɛle blɛn nya;

⁸ An bliflile do gi, maa yara yɔɔ i ma bléyi sɛ nya, Naa, i sɔle an lɛ glɛ ’ka lo, amalé an nyanai é dan zén lɛ i ta; I tabozan, Gakelebale ɛ fe.

⁹ Maa dan we ’ko kɛlɛ lɛ bélé ’yinu lé we zo Noé bléyi va; Maa anbo ’nyɔɔn léé, ’yinu ’ka dan nwɛɛn lɛ tɛrɛ la é dɛrɛ bélé Noé bléyi va ’yinu zo lo; ’Bɛ bɛ duo gi léé, anbo ’nyɔɔn léé, an bli ’ka dan fli lɛ i ma é dɛrɛ lo, Yé maa ’ka dan bon‐ɛn lɛ i nya é dɛrɛ lo.

¹⁰ Dé gɔblɛnnu go baa, Dé gɔpanénu ma nyɔɔn, I va sɔlɛle ’ka sié an gi pelo, Yé anlé gipawe lé ke ka vole drɔɔ nya, é ’ka dan sɛrɛ lɛ pelo. Gakelebale lé a nyanai éé zén‐é i ta, yee ɛ fe.

Jérusalɛm dɔbɛ voéla

¹¹ Nyanaizénlazan, fu ’lɛ plɛplɛ i gyɛ yé i tɔrɔpaazan ’ka lo. Bé ye, maa dan ilé gɔlɛnu pla lɛ laso wezan nya Yé maa dan i gane vɔ lɛ safiigɔlɛ nya;

¹² Maa dan san wɔrana kɛlɛ lɛ rubigɔlɛ nya; Maa dan ilé duolinu kɛlɛ lɛ ɛsikabuklegɔlɛ nya, Yé maa dan glɛ dɔ lɛ i zi gɔlɛwezannu nya.

¹³ I benu faa é dan kɛlɛ lɛ Gakelebale zuozannu nya, Yé wenu nyian é dan wo lɛ i benu lɛ kiɛre.

¹⁴ We tegele é dan i dɔ lɛ gligli; I kanamawe ’ka lo, amalé gibɔrɔ ’ka i ma lo. Kana blɛn ’ka dan bié lɛ i lɛ é pu lo.

¹⁵ Dé munu i ma vɔɔ, ’bɛ ’ka sié maa va lo; Dé miomian péli vɔ i ma, i dan a ye lɛ é diale i wuo.

¹⁶ Nyanamapazan lé éé bɔnbɔn gya, ’Té éé gulidanfɛ folian, maa ɛ kɛlɛ; Naa, maa a sɛrɛzan kɛlɛ é ziin, ’bɛ lé a sɛrɛle we ma.

¹⁷ Gulidanfɛ faa lé wa foli i gyɛle we ma, é ’ka dan we do kɛlɛ lɛ i lɛ lo; Yé mi faa lé wo nwa i tɔ fele we ma, I dan wo gyɛ lɛ we nya. ’Bɛ zo lé Gakelebale wuozannu lé tɔnɔ ke, ’Bɛ zo lé maa dan wo si lɛ we gi. Gakelebale ɛ fe.