Ézai 53 - Kazambale lé Sebe Sauunu 1979

¹ Wenu lé wa zuo fe ko lɛ, de ɛ bli vo ’bɛ lɛɛ? De ɛ Gakelebale lé plɛplɛ dɔɔ?

² É tin Gakelebale yuɛ va bélé lutolu zo, Bélé yili lé ke fɔnna tɛrɛ gale ta, a zo; É ’ka nɔnɔmi lo, yé a yara ’ka bié yé é mi sia ana lo, A yara dɔbɛ ’ka ko gi nanama lo.

³ Munu serele bo a ma yé wo sɔn vɔ a ma, Kleblezan lé, nyanéblezan lé, Bélé mi lé wo yara si a ta, a zo; Ko lɔlu plɛn a ma, yé é ’ka ko yuɛgi bɔ lɛ lo.

⁴ É kolé gyɛnu si, Yé é kolé kleblelenu kɔné si; É a ko yuɛ gi bélé wegyɛzan lé Kazambale a bla, ’té é a kɛlɛ kiéné, a zo.

⁵ Kolé wenyané ma lé é tuo, Kolé weplenu ma lé wa ’wii; We lɛ lé é a kɔɔn lé wa dɔ ko gi, é dia yee ɛ ta, yé ko vo drɔɔ, Yé a tuolenu ma lé ko béli.

⁶ Ko faa zi saan bélé ’blanu zo, Ko faa do do kobo lé zi sia, Yé Gakelebale kolé weplenu faa dɔ a nwiin.

⁷ Wo nyané pa a ta yé wo yaa a ta, Yé é ’ka é ’léé fuo lɛ lo, É a bélé ’blané lé wa gona a gyɛna, a zo, É a bélé ’bla lé é ’ka wé ’é kyɛɛ bɔi?-?zan lɛ lo, a zo. É ’ka é ’léé fuo lɛ lo.

⁸ Kleblele valé we lɛdɔle a gi a si tɛrɛ la, Munu lé wo tin wo nya ékeva, Wo va mi kyɛn ɛ bli vo a lɛ léé, Wa si mi yuɛmale lé tɛrɛ la Yé wa gyɛ anlé munu lé wenyané maa?

⁹ Wa pa mi nyanénu pana, A vun a fuazannu va, Dɔlé ’té é ’ka glawe kɛlɛ lɛ lo, Yé dablidére do kpen ’ka a ’léé lo.

¹⁰ Élé tɛrɛla nɔ wenyané ’yibofɛ nya, Yé Gakelebale a ’wii nyanéblele nya, é sɔ a lɛ fɛan zo, a zo; A kulu é dan kɛlɛ lɛ yé a yinu é dan kɛlɛ lɛ di, Yé Gakelebale lé nyanama va é dan gyɛ lɛ a lee.

¹¹ É dan élé nyanéblele ma tɔnɔ ye lɛ yé ’bɛ é dan a fan lɛ ginanale nya; Alé wedɔɔle nya lé an wuozan tegele é dan mi kiɛre kɛlɛ lɛ tegele, Yé é dan wolé weplenu kɔné si lɛ.

¹² Bɛwemalé maa dan azé nɔ lɛ a lɛ mi blɛnnu va; Maa dan gulizarafɛ guli lɛ yee valé mi plɛplɛnu ma, Ébo nɔ ga lɛ Yé wa pa wenaané kɛlɛzannu va, ’bɛzama; É mi kiɛre lé wenyanénu si Yé é dɔ wegyɛzannu lé we gi, ’bɛzama.