Ézai 52 - Kazambale lé Sebe Sauunu 1979

Bale é dan Jérusalɛm so lɛ we lee

¹ Siɔn munu, ’ka vuo‐oo, ’ka vuo. ’Ka ’lɛrɛfɛ zén ka ta é ziin. Fla sauun Jérusalɛm, ’ka fɛtikɛlɛ?-?varɔ zén ka ta. Naa, mi lé a gane ’ka é dɔle lo, ’bɛ valé mi tiridɔle ’ka dan wɔra lɛ i va é dɛrɛ lo.

² ’Ka nwa, ’ka vungoi si ka ma, ’ka ma puo. Jérusalɛm munu, ’ka nyana ka pa gi. Siɔn munu, luugizannu, ’Ka luubale si ka bɔrɔ ma.

³ Naa, Gakelebale léma: Wo ka dan é pla, Yé wo ’ka dan ka tabo lɛ gɔɔli nya lo.

⁴ Naa, Mizan Gakelebale léma: Ana mɔn, anlé munu go Éjipiti tɛrɛ la nyanale ana we gi; ’Bɛ zuo Asirinu yaa wo ta é pla,

⁵ Wo go anlé munu nya luu gi é pla, Yé sin maa dan a kɛlɛ lɛ kaa? Yaawotazannu éé siaan wo ta plɛplɛ, Woo flile siaan an tɔ ma bladi fɔɔ yé yiri é vɔ a zo.

⁶ Bɛwemalé anlé munu é dan an tɔ dɔɔ lɛ; Bɛwemalé wo dan a gi dɔɔ lɛ ’bɛ yi la léé, Maa lo, maa ɛ we fé. A zo lé Gakelebale a fe.

⁷ Mi lé éé dan wenéné nya, ’Té éé vole drɔɔ zana dɔɔan, Mi lé éé dan wenéné nya, ’Té éé sile we gi zana dɔɔan, ’Té éé a fé Siɔn munu lɛ léé: Kalé Bale a é plale mi nwiin, Azan gane a é nɔnɔmi gɔnu nwiin.

⁸ Kalé fla taginizannu dére zuogi é dan we lɛ; Wo dére é dan nwa lɛ, Yé wo dan siaa lɛ ékeva ginanale nya; Naa, wo dan a ye lɛ wobo yuɛ nya léé, Gakelebale a dana Siɔn munu nya wo pa gi, azama.

⁹ Jérusalɛm ’bin, ’ka fɔn ékeva ginana siaale nya, Naa, Gakelebale élé munu tɔrɔ paan Yé é Jérusalɛm tabo, azama.

¹⁰ Gakelebale a mi sauun nya fɛan zo, É a nagɔɔn bɛnnu faa yuɛ va; Kolé Bale éé mi sié we gi fɛan zo, Tɛrɛ glɛ sina munu faa é dan a ye lɛ.

¹¹ ’Ka gooo, ’ka go, ’ka si ana, Té ka mane fɛ tiridɔle do kpen ma lo. ’Ka si Babilɔn munu méléna. Ka lé ka Gakelebale lé bɔnu sié, ’Kabo kɛlɛ é zima.

¹² Té ka nwa wiao lo, Té ka go bélé vɔfliizannu zo lo, Naa, Gakelebale é dan go lɛ ka ’lɛ, Yé Izraɛl lé Bale é dan da lɛ ka zuo.

Bale wuozan lé éé nyané blé

¹³ Ka ye, we faa nyian é dan wo lɛ an wuozan ma, É dan nwa lɛ, é dan kɛlɛ lɛ blɛn, é dan kɛlɛ lɛ blɛn é baba.

¹⁴ A yara sɛrɛ fɛan zo, ’Té a yara ’ka blami yara nya é dɛrɛ lo, amalé É kana zén mi kiɛre gi é vinin;

¹⁵ Naa, sin, é dan kɛlɛ lɛ munu kiɛre ginanamazan nya. Minwiinzan blɛnnu lɔlu lɛ é dan tan lɛ a ’lɛ, Naa, wenu lé wo ’ka wo zuo fe lɛ wo lɛ lo, wo dan a ye lɛ, Wenu lé wo ’ka tan a ’ma lɛ lo, wo dan a ’ma lɛ, ’bɛzama.