Ézai 51 - Kazambale lé Sebe Sauunu 1979

Bale Izraɛl tɔrɔ paa dérenu fe

¹ Ka lé ka tawoo we tegele zuo, ’Té ka Gakelebale naginian, ’ka tɔné dɔ an lɛ. Gɔlɛ lé wo ka so a ma, a sele ’é dɔ ka gi ma, Guru lé wo ka si a gi, a sele ’é dɔ ka gi ma.

² Ka yuɛ ’é vo ka tra Abraam lɛ, Sara lé é ka yaa, ka yuɛ ’é vo ’bɛ lɛ; Naa, yee do kpen lé maa a laa, Maa a drɔɔ vo yé maa a fan.

³ ’Bɛ zo lé Gakelebale nyanai éé zén‐é Siɔn ta, A nyanai éé zén‐é Siɔn fla kwa la, É dan Siɔn bwi nɔla lɛ bélé Édɛn féi zo, É dan ana tɛrɛ gale nɔla lɛ bélé Gakelebale lé zianféi zo; Vole drɔɔ valé ginanale é dan kɛlɛ lɛ fla ’ko tamunu lee; Wo dan Bale bɔ vɔ lɛ, ’té woo lɛrɛ vɔa ana.

⁴ Anlé munu, ’ka tɔné dɔ. Anlé bɛn, ’ka an ban ka tɔné nya. Bélidɔwe é dan si lɛ maa ɛ va, Maa dan anlé bélidɔwe kɛlɛ lɛ migɔnɔnu vakinisan nya.

⁵ Anlé wetegele kɛlɛle bɔ é pu, anlé mi sile we gi é dan bɔra lɛ, An dan munu lé we ble lɛ an bɛ nya; Wɛyiworona tɛrɛ lamunu bli é dan kɛlɛ lɛ an lɛ, Dé wa an bɛ gi, wo gi é dan san lɛ wo ma.

⁶ ’Ka yuɛ vɔ la gi, ’ka tɛrɛ va gini. Naa, lanu ta é dan saan lɛ bélé kyɛgoi zo, Tɛrɛ é dan dia lɛ é kuru nya bélé sɔ zo, A tamunu é dan zamaga wo lɛ bélé nyɔnɔtoro zo; Naa, anlé mi sile we gi é dan vo lɛ ana lɛɛfaama, Yé anlé wetegele nyaana ’ka lo.

⁷ Ka lé ka wetegele dɔɔ, ’ka tɔné dɔ an lɛ; ’Kaa munu lé anlé bélidɔwe ke ka bli gi, ’ka tɔné dɔ an lɛ. Dé munu serele bo ka ma, té ’bɛ é kana zén ka gi lo, Dé wo ka sɔnɔ, té ’bɛ é gligli zén ka gi lo.

⁸ Flatoronu é dan wo ble lɛ bélé sɔ zo, yé wo sɛrɛ, azama; Yé boworo éé ’blakyɛɛsɔ blé fɛan zo yé é sɛrɛ, a zo lé wo dan sɛrɛ lɛ. Naa, anlé we tegele é dan vo lɛ ana lɛɛfaama, Yé anlé mi sile we gi é dan vo lɛ ana mi kulu é kulu faa zé nya.

⁹ Gakelebaleoo, ’i nwa, ’i bɛ kun ilé zana ma, bé gyɛ. ’I nwa, bé kɛlɛ bélé é vinin zé zo, Bélé é li zé zo. Biian i Éjipitinu gyɛ loo? Biian i wi nyané blɛn fɔn loo?

¹⁰ Wɛyi lé a guru ke blɛn, Biian bé béli loo? Mi lé é zi pla wɛyi wɔlɛ ma, Munu lé i wo tabo, wo giéle we ma, bii kaan loo?

¹¹ Munu lé Gakelebale wo tabo, wo dan da lɛ wo pa gi, Wo dan go lɛ Siɔn guliwuovolɛ lɛrɛ vɔle nya, Ginanale lé é ’ka nyaan lo, é dan kɛlɛ lɛ wo ’wuo ma bélé tɔkoro zo; Ginanale valé vole drɔɔ é dan kɛlɛ lɛ ana, Nyanéblele valé dunnule é dan si lɛ ana.

¹² Maa, maa ɛ ke ka tɔrɔpaazan nya. Mi kaa lé i nya, blami lé ke bélé lu zo, ’Té é dan ga lɛ bɛ, yé i kana a lee?

¹³ Yé Gakelebale lé é lanu fwila, ’té é tɛrɛ gane vɔ, ’Té é biibozen kɛlɛ, yé i gi é san ’bɛ maa? Yé yaamitazan lé ke kwa kulina léé, ’é i gyɛ, Mɛmalé i ma é vo nyɔɔnna ’bɛ lé bliflile lee yifaamaa? Yaamitazan lé bliflile a mɛ ɛ nyaa?

¹⁴ Mi lé gɔgɔbale bɛnzan ke é vɔle a ma, é vo sɛ yé wa fuo a ma, É ’ka dan ga lɛ guru gi lo, É ’ka dan vuru lɛ élé fɛblele ma lo.

¹⁵ Maa a Gakelebale, ilé Bale nya, Maa ɛ wɛyi nanoan yé wo vun éé wé. An tɔ lé lai sunyanu lé Gakelebale.

¹⁶ Maa an dérenu paan i ’léé, Maa i tabuaan an bɛ furɔ nya. Maa ɛ lanu fwila yé maa ɛ tɛrɛ kɛlɛ, Yé maa ɛ fe Siɔn munu lɛ léé: Ka a anlé munu nya.

Jérusalɛm lé nyanéblele nyaa

¹⁷ Jérusalɛm munuoo, ’ka vuo, ’ka nwa, Ka lé ka Gakelebale leekana gi bliflile mini, ’Yiminikana lé a gifɛ éé mi yuɛi nɔɔan, ka lé ka ’yi mini a gi, ’té ka foroloo vɔa fɔɔ yé ka bɔ a bo ma, ’ka vuo.

¹⁸ Alé négɔné faa lé é wo yaa bɛ, A do kpen ’ka ana yé ’bɛ é kun a bɛ ma lo. Négɔnénu faa lé é a pa, A do kpen ’ka ana yé ’bɛ é zi gɔɔn a lɛ lo.

¹⁹ We tɔntɔn fié bɔ i ma, De ɛ nyanai é dan zén lɛ i taa? Ilé fɛnu sile gla nya valé i sɛrɛle koo, lɔrɔ lé i gyɛle valé gwɔun koo, wo bɔ i ma, Maa dan i tɔrɔ paa lɛ kaa?

²⁰ I benu kɛlɛ tɔɔtɔɔ, ’té woo yiaan zinu ta yé wo ’ka bɔa nwale lɛ lo, Bélé zoro lé éé séli sian a gi, a zo, Gakelebale bli fli wo ma, Ilé Bale bon‐ɛn wo nya fɔɔ yé a bɛn mini wo lɛ.

²¹ Amalé nyanaizénlazan, ’i tɔné dɔ ’ko do, Ka lé ka Bale lé bliflile mini yé é ka gyɛ bélé nwɛ zo, dɔlé ’té nwɛ kaan lo, ’ka tɔné dɔ do.

²² Kazan Gakelebale, Kalé Bale lé é élé munu takuun‐an, é léma: Ka ye, ’yiminikana lé a gifɛ éé mi yuɛi nɔɔan, anlé bliflile zéngikana, Maa dan a si lɛ ka lee; Ka ’ka dan a gi ’yi mini lɛ é dɛrɛ lo.

²³ Maa dan a nɔ lɛ munu lé woo yaan ka ta, wo lɛ. Wa fé ka lɛ turu léé: ’Ka bua, ko gié ka ta, Yé ka lala kɛlɛ bélé tɛrɛ zo wo lɛ, Bélé giémunu lé zi zo wo lɛ, maa dan yee kana nɔ lɛ wo ɛ lɛ.