Ézai 50 - Kazambale lé Sebe Sauunu 1979

¹ Gakelebale léma: Lebɔrasɛbɛ lé maa gyɛ yé maa ka bu bɔra a nya, é kaa? Taa, an ma vɛɛn pazan kyɛn lɛ lé maa ka nɔ anlé vɛɛn ban laa? Ka ye, kalé weplenu ma lé maa ka dan, Yé kalé wenyanénu lé we ma lé an ka bu bɔra.

² An da, mɛmalé mi do kpen ’ka an si lɛ zia loo? An mi laa, mɛmalé mi do kpen ’ka we lɛ loo? An bɛ ’ka sɔa mi tabole nya loo? Plɛplɛ ’ka an lee yé maa mi so we lee loo? An bon‐ɛn‐an wɛyi nya yé é béli, Maa yuunu kɛla nyéné’saa nya; ’Yi ’ka lo, amalé wo va pɔnu é zamaga wo ’yiminilɔrɔ nya, Yé wo vɔn.

³ Maa gunu dɔraan lanu gi, Yé maa gyɛbosɔ zén wo ta.

Bale wuozan lé Bale lɛdɔmale

⁴ Mizan Gakelebale é dére néné nɔ an lɛ, léé, Mi lé a fuu si a ta, an bɔ a va an dére nya; Éé an tɔné lɛ soo bladi faa do do ma, Léé, maa tɔné dɔ we lɛ bélé mizuo?-?zan zo.

⁵ Mizan Gakelebale an tɔné lɛ so, Yé maa ’ka sɔn vɔ lɛ a ma lo, Maa ’ka gyɛ lɛ an zuo pelo.

⁶ Maa an lala nɔ an blamunu lɛ, Maa an blin nɔ an puomagun soowɔlazannu lɛ; Maa ’ka an yara yɔɔ lɛ An sɔnɔle valé ’lélibɔlɛ vɔle an yara lee lo.

⁷ Naa, Mizan Gakelebale bɔ an va; Amalé an tɔ ’ka dan sɛrɛ lɛ lilo, Amalé an yara kɛlɛ plɛplɛ, Maa gi dɔɔ léé, an gi ’ka dan blin lɛ an ma lo, azama.

⁸ Mi lé éé an kɛla mi tegele nya, é a an sɔnɔ; De ɛ dan za vɔ lɛ an vaa? Ko zén ékeva ma, De ɛ ke an mazan nyaa? ’É bié an va ma.

⁹ Mizan Gakelebale é dan bɔ lɛ an va; Mi kyɛn ɛ dan an gyɛ lɛ we nyaa? Wo faa é dan dia lɛ ’wo kuru nya bélé sɔ zo. Boworo é dan wo ble lɛ.

¹⁰ Dé ka va miomian éé kanaan Gakelebale lee, ’É tɔné dɔ a wuozan lɛ ma. Dé miomian é ke tawona gunutinu va, ’té kyɛsan vuru a ma, ’É pa Gakelebale tɔ ta ma, ’É vɔ élé Bale zi ma.

¹¹ Ka faa lé ka kyɛ bi, ’Té sonakyɛ a ka lee, ’Ka tawo kalé kyɛnɛnɛ valé kalé sonakyɛ san va, An dan we bɔ lɛ ka ma, Ka dan yia lɛ kleblele nya.