Ézai 5 - Kazambale lé Sebe Sauunu 1979

Dɔrɔféi ma lɛrɛvɔle

¹ Lɛrɛ lé an sɔlɛzan a vɔ élé dɔrɔféi ma, maa dan a vɔ lɛ an sɔlɛzan lɛ. An sɔlɛzan lé dɔrɔféi ana, Gɔpané lé ana tɛrɛ ke é zima, ana.

² É tɛrɛ ma nɔla, é gɔlɛnénu si a va yé é yiliné zima suru ana; É dɔtafɛ do kɛlɛ a méléna, Yé é dɔrɔyi borona do kɛlɛ é ziin ana. A bli a a lɛ léé, é dan dɔrɔporo zima baa lɛ, Naa, é dɔrɔporo naané ɛ baa.

³ Sin, ’kaa Jérusalɛm munu valé Juda gɔnénu, ’ka maa valé anlé dɔrɔféi lé we ble.

⁴ Mɛ we lé é a kɔɔn lé maa kɛlɛ é ziin anlé dɔrɔféi maa? Mɛ fɛ lé maa ’ka a kɛlɛ lɛ a lɛ loo? Mɛmalé dé é a an gi léé, é dan é poro zima baa lɛ, yé é poro naané ɛ baa?

⁵ We lé maa dan a kɛlɛ lɛ anlé dɔrɔféi lɛ, maa dan a fe lɛ ka lɛ sin. Maa dan a zi gɔrɔ fwi lɛ yé winu a ble; maa dan a zi gɔrɔ zana lɛ yé wa zɔn ’wo gane nya.

⁶ Maa dan a vo lɛ é gɔ nya; maa ’ka dan a ma bɔi lɛ yé maa a féi pa é dɛrɛ lo; plésɔné léliyili valé lélinu é dan tuu lɛ ana; yé maa dan latinu béli dɔ lɛ léé, té wo lɛɛ da a ta é dɛrɛ lo.

⁷ Lai sunyanu lé Gakelebale lé dɔrɔféi lé ke Izraɛlnu nya, Yé Juda munu a yiliné lé a we ke a lee, a nya. A bli a a lɛ kɔɔn léé, ’wo we drɔle kɛlɛ, naa, wo mi nyɛ zana; A bli a a lɛ kɔɔn léé, ’wo we tegele kɛlɛ, naa nyanéblezannu a siaana wo va.

Weple lé munu a kɛla

⁸ Munu lé woo voo kɔn dɔna saawo, ’té woo féinu lɔa fɔɔ yé mi nyanana ’ka kɛla é dɛrɛ lo, yé woo nyanaan wo saa tɛrɛ méléna, we tɔntɔn ’é bɔ wo ma ma.

⁹ We lé lai sunyanu lé Gakelebale a gɔɔn an lɛ, yee lé ke ’ko: weboen lé, kɔn kiɛre ’konu é dan vo lɛ é koro nya; kɔn blɛn nɔnɔminu ’ko, wo gizan ’ka dan ye lɛ lo.

¹⁰ Dɔrɔ tuabu féi soru é dan dɔrɔ litré yɔ dɔ wɔlɛ vu ta suiɛdo nɔ lɛ. Dé wo fɛwɔlɛ vɔ vlekyɛɛ nya vu, wo dan a gyɛ lɛ vlekyɛɛ nya do.

¹¹ Munu lé woo vlanburuwo nwɛ zuo bladi tutu, ’té woo voo nwɛ tanna é béli, we tɔntɔn ’é bɔ wo ma.

¹² Kɔnɔ koo, gitaa koo, poo koo, séén koo, nwɛ koo, ’bɛnu ɛ wolé fɛtinu nanama é baba, naa, wo ’ka wo gi bɔrɔan Gakelebale kɛlɛwe ma lo, yé wo ’ka a panyanama yé lo.

¹³ Bɛwemalé wo dan bɔra lɛ anlé munu ma fiaa yé wo go wo nya luu gi. Alé tɛrɛwɔlɛnu é dan ga lɛ lɔrɔ nya, yé alé mi gu bɔrɔ gi é dan ga lɛ ’yiminilɔrɔ nya.

¹⁴ Bɛwemalé gamunu nyanana é dan é lɛ so lɛ, ’té éé ’léé blé; yé Siɔn lé we blɛnblɛnnu valé alé fuafɛnu koo, mi gu lé wo vun ke wena, ’té wo gi éé nanaan, wo koo, wo dan zun lɛ a gi.

¹⁵ Wo dan mi kiénénu gyɛ lɛ yé wo dan mi blɛnnu zun lɛ, yé wo lé woo mi naginian ’wo yuɛ zuo, wo dan zun lɛ.

¹⁶ Lai sunyanu lé Gakelebale lé weblele ma lé wo dan a dɔɔ lɛ mi blɛn nya, yé Bale sauun é dan é kɛlɛle sauun nagɔɔn lɛ élé we tegele kɛlɛle nya.

¹⁷ ’Blanu é dan lu ble lɛ ana bélé wolé lublena zo, yé wolé fuafɛnu lé wo sɛrɛ bɛ, wo dan kɛlɛ lɛ bɛnnu zé nya.

¹⁸ Munu lé woo weple ganaan ’wo zuo bélé diri lé, ’té woo wenyané ganaan ’wo zuo bélé wisoo lé éé goro ganaan é zuo, a zo, wenaané ’é kɛlɛ wo lɛ ma;

¹⁹ yé wo léé: Bale, ’ibo tunu, ’ilé we kɛlɛ é kele, ko ye; Izraɛl lé Bale sauun lé bélidɔwe ’é da yé ’é lɛ sɔɔ yé ko a gi dɔɔ.

²⁰ Munu lé woo wenaané laan wezin, yé woo wezin laan wenaané, ’té woo gunutinu nɔlaan san nya, yé woo san nɔlaan gunuti nya, ’té woo fɛ nyanale nɔlaan fɛ néné nya yé woo fɛ néné nɔlaan fɛ nyanale nya, wenaané ’é kɛlɛ wo lɛ ma.

²¹ Munu lé wa wedɔɔzannu nya wobo yuɛ gi, ’té é dɔ wo gi léé, ’wa ’wuoatazannu nya, wenaané ’é kɛlɛ wo lɛ ma.

²² Munu lé wo wobo no nwɛ minile ’té woo dɔrɔ ’lɛ plɛplɛ vɔɔan ’wo zua, wenaané ’é kɛlɛ wo lɛ ma.

²³ Munu lé woo wegyɛzan lé we kɛla néné, blɛ lé we ma, ’té woo weanwiinlozannu lé se sié wo lee, wenaané ’é kɛlɛ wo lɛ ma.

²⁴ Bɛwemalé, kyɛnɛnɛ éé ’sapɛɛ blé fɛan zo yé kyɛ éé lugale blé fɛan zo, a zo lé wo suni é dan vɔn lɛ yé wo vwi é dan san lɛ bélé vungoi zo; naa, wo serele bo lai sunyanu lé Gakelebale lé bélidɔwe ma yé wo nyé yéli Izraɛl lé Bale sauun dére ma, azama.

²⁵ Bɛwemalé Gakelebale bli fli élé munu ma; é bɛ nwa léé, ’é wo bla. Gɔblɛnnu ma nyɔɔn; migalenu a bélé bli zo zinu ta. Dé é kɛlɛ ’bɛ zo‐oo, a bli ’ka dɔralaan lo, ’té a bɛ a wo gyɛn gi duowo.

²⁶ Gakelebale drapo nwa munu lé wo ke baa, wo laale we ma. É ’furu fɛn, munu lé wo ke tɛrɛ glɛ sina, wo laale we ma, yé bé ye, wa dana fiéfié, wo ta a kelekele.

²⁷ Wo wɔlɛ gi ’ka nyaan lo yé wo sɔné ’ka saan lo; yi ’ka vɔa wo do yuɛ ma lo yé wo ’ka yi gya lo. Mi lé kyɛsidi ’ka a gyɛn lo, azan ’ka lo; wo do kpen lé sawala bale ’ka kinié lo.

²⁸ Wolé sawɔlɛnu lɛ ma a é bole yé wo faa a sa ganana; wolé wisoonu sɔnéwɔlɛnu a bélé gɔlɛ zo yé wolé goro ganenu a bélé barikoko zo.

²⁹ Wo dére a bélé golizrada zé zo; woo gi gunuan bélé golizrané zo, ’té woo nyana vɔa ’té woo wi kunwo. Wa sian yé mi do ’ka dan a si lɛ wo lee lo.

³⁰ ’Bɛ yi la é dan nyana vɔ lɛ élé wi ta bélé wɛyi vun wele zo. Dé mi tɛrɛ nagini, gunuti saa lé éé a yé, ’té munu éé nyané blé; dé é a la nya, gunu a é dɔrale ’bɛ gi.