Ézai 49 - Kazambale lé Sebe Sauunu 1979

Izraɛl ɛ ke tɛrɛlamunu lé san nya

¹ Wɛyiworona tɛrɛ lamunu, ’ka tɔné dɔ. Tɛrɛ baa lamunu, ’ka an ban ka tɔné nya. Gakelebale an laa an yaabléyi va, An bu lé an yaale tɔɔn é an tɔ pa.

² É an ’léé kɛlɛ gwɔun ’lɛzan zo, É bɛ furɔ zén an ta; É an kɛlɛ sawɔlɛ ’lɛmabole nya Yé é an yɔɔ élé sawɔlɛ paagifɛ gi.

³ É léé, maa a ’é wuozan Izraɛl lé é dan ’é tɔ bɔ lɛ a ma, a nya.

⁴ Yé maa, maa léé: An nyanama pa é pla, Anlé plɛplɛ sɛrɛ é pla, ’té a tɔnɔ ’ka lo; Naa, a se a an lɛ yifaama Gakelebale vazia, Yé an gooli a anlé Bale va.

⁵ Sin, Gakelebale a wefena, Yee lé é an ma’lɛrɛ an yaabléyi va an kɛlɛle ’é wuozan nya we ma Léé, maa da Jakɔb nya ’é va é pa gi, Izraɛlnu lé wo ke é kinile ékema, an da wo nya ’é va é pa gi; Naa, an tɔ a é bɔle Gakelebale yuɛ gi, Yé anlé Bale a anlé plɛplɛ nya.

⁶ Yee Gakelebale léma: Dé i kɛlɛ an wuozan nya, Yé i Jakɔb bɛnnu vɔ a ma, Yé i da Izraɛl mi pɔnénu nya wo pa gi, ’bɛ a kiéné; Maa dan i kɛlɛ lɛ bɛnnu vakinisan nya, Yé i go anlé mi silewegi nya fɔɔ tɛrɛ glɛ sina.

⁷ Mi lé woo serele boo a ma, ’té munu a yé naaninvɔmafɛ nya, ’Té é ke mi plɛplɛnu lé luu nya bɛ, Mitabozan Gakelebale, Izraɛl lé Mi Sauun lé a lɛ léma: Munu nwiinzannu é dan i ye lɛ yé wo dan dɔ lɛ loru, Mi segelenu é dan i ye lɛ yé wo dan dia lɛ wo bli la i ’lɛ, Gakelebale lé é ke yarapawelazan nya, Izraɛl lé Mi Sauun lé é i si a va, alé we ma.

Bale Jérusalɛm dɔ ’é dɔna

⁸ Gakelebale léma: Zin kɛlɛ mi lɛ bléyi va, maa dan i dére ’ma lɛ, Misiéwegi yi nya, maa dan bɔ lɛ i va; Maa dan i tabin lɛ yé maa dan i dɔ lɛ maa valé munu gipadozan nya Tɛrɛ vɔle a ma we ma, Yé tɔnɔfɛnu lé wo sɛrɛ turu, i dan wo guli lɛ é ziin wozannu ma;

⁹ Yé i dan a fe lɛ luugizannu lɛ léé: ’Ka bɔra, Yé munu lé wo ke gunutinu va, i dan a fe lɛ wo lɛ léé: ’Ka bɔra a gi. Wo dan fɛ ble lɛ zinu ta, Yé wo dan fɛblele ye lɛ gɔpanénu faa nwiin.

¹⁰ Lɔrɔ ’ka dan wo gyɛ lɛ lo, yé ’yiminilɔrɔ ’ka dan wo gyɛ lɛ lo; Wo ’ka dan nyané ble lɛ tɛrɛ kyɛ dɔle valé yiri lee lo; Naa, mi lé a nyanai é zén wo ta, é dan kɛlɛ lɛ wolé zigɔɔnzan nya, Yé é dan go lɛ wo nya ’yibɔnanu na.

¹¹ Maa dan anlé gɔnu faa nɔla lɛ zinu nya, Yé anlé zinu faa ’léé é dan pla lɛ.

¹² Wo lo, wo si baa, A kenu si yirinwana bɛbolazia valé yirivɔnazia, Yé a kenu si Sinim tɛrɛ la.

¹³ Lanu, ka gi ’é nana ma. Tɛrɛ, ’i vo ginanale blɛn gi ma. Gɔnu, ’ka siaa ginanale nya ma. Gakelebale élé munu tɔrɔ paa, azama. A nyanai éé zén‐é élé nyanégyɛzannu ta.

¹⁴ Siɔn munu léé, Gakelebale sɔn vɔ ’wo ma, ’Wo sele saan Mizan gi.

¹⁵ Né lé lezan ke nyɔ dɔna a ’léé, a sele éé saan lezan gii? A nyanai ’ka zén‐é é giné ta loo? Dé a gi san a maoo, I sele ’ka dan saan lɛ an gi lo.

¹⁶ Ka ye, ka a an bɛ la bélé manɔn pɔlɛ zo, I guru a yifaama é dɔle an yuɛ gi.

¹⁷ I benu é dan é kele; Munu lé wo i sɛrɛ yé wo i guru zana a gi, Wo dan si lɛ i méléna.

¹⁸ ’Ka yuɛ bɔrɔ ka zi yé ’ka nagini; Wo faa a zénna ékeva yé wo da i va. Gakelebale léé: Maa a é yuɛma. I dan wo zén lɛ i ta bélé ’lɛrɛfɛ zo, Wo dan ’lɛrɛ lɛ, bélé le lé ébo ma’lɛrɛ é bwɛ lɛ, a zo.

¹⁹ Ilé fɛnanu lé wo ’wii ana ta, ’té mi ’ka ana lao lo, Ilé tɛrɛ lé ke é sɛrɛle, É sia bléyi ’ko va, é dan kɛlɛ lɛ kiéné munu ma. Munu lé woo ’wiié i ta turu, wo dan si lɛ i ma baa.

²⁰ I benu lé i vuru wo gi turu, Wo dan a fe lɛ i tɔné gi léé: Fɛkona a kiéné ko ma, ’I fɛna bɛ kɛlɛ ko lɛ, yé ko nyana ana.

²¹ Yé i dan a fe lɛ i bli gi léé: De ɛ wo yaa an lɛɛ? Naa, nénu ’ka turu an lee lo, ’té maa a sɔnzan nya. Wo so an va yé wo an bɔra, de ɛ anlé nénu paa? Maa vo turu an do ’naan, wonu ’ko, wa turu kyɛɛn?

²² Mizan Gakelebale léma: Ka ye, maa dan an bɛ soi lɛ bɛnnu vazia, Yé maa dan anlé drapo nwa lɛ munu vazia; Wo dan da lɛ i benu nya ’wo bɛ gi, Yé wo dan da lɛ i lunu nya ’wo bɛapa ta.

²³ Minwiinzannu valé wo lunu, wo dan kɛlɛ lɛ ilé nénu pazannu nya; Wo dan bua lɛ tɛrɛ va i ’lɛ, Yé wo dan vungoi flan lɛ i gane ma, Yé i dan a gi dɔɔ lɛ léé, maa lé ke Gakelebale nya, Yé munu faa lé wo bli ke an lɛ, yara ’ka dan wo gyɛ lɛ lo.

²⁴ Wo dan mi plɛplɛ lé gulizarafɛ si lɛ é lee? Mi tegelenu lé wo wo kun luu nya, wo dan so lɛ wo lee?

²⁵ Gakelebale léé: lin, wo dan mi plɛplɛ lé luu si lɛ é lee, Yé vakɛlɛzan lé gulizarafɛ é dan san lɛ é lee; Maa dan guli dan lɛ i nyanézannu va, Yé maa dan i benu si lɛ we gi.

²⁶ Maa dan yaaitazannu bozen wi nɔ lɛ wo lɛ wo blefɛ nya; Wo dan wobo nyɛ mini lɛ yé é dan wo gyɛ lɛ bélé dɔrɔ dɛrɛ zo; Yé mi faa é dan a gi dɔɔ lɛ léé, maa lé ke i siéwegizan Gakelebale nya, Maa a i tabozan nya, Jakɔb lé mi plɛplɛ nya.