Ézai 48 - Kazambale lé Sebe Sauunu 1979

Tɛlɛ tɛlamawe a Bale ɛ lee

¹ ’Kaa Jakɔb lé munu lé Izraɛl tɔ ke ka ma, ’Té ka ke Juda kulunu nya, ’Té ka Gakelebale tɔ ’nyɔɔnma Yé ka Izraɛl lé Bale tɔ laan, ’Té weboen valé we drɔle ’ka ka gi lo, ’Ka tɔné dɔ we ’ko lɛ.

² Naa, wo fla plɛplɛ tɔ pa ’wo ma, Yé wo pale a Izraɛl lé Bale lé, Wa tɔ laama lai sunyanu lé Gakelebale bɛ, a ta.

³ An we vininnu lɛ kini ana mɔn, Maa fe an ’léé yé maa wo zana dɔɔ; Maa we kɛlɛ kpé yé wo lɛ sɔɔ.

⁴ Maa gi dɔɔ léé, ka bli a plɛplɛ, Yé ka tɔné gi a plɛplɛ bélé foliɛwɔlɛ zo, Yé ka yuɛ ma a plɛplɛ bélé gɔlɛ zo,

⁵ Amalé maa we ’konu fe ka lɛ é kyɛn, Maa wo fe ka lɛ wo bɔle ’lɛ, Té ka fe léé, ’wolé miyilinu ɛ wo kɛlɛ, lo, Té ka fe léé, ’wolé miyili nyaale koo, ’wolé miyili folile koo, wo ɛ we ’konu béli dɔ, lo.

⁶ Wenu lé maa wo fe, ka a ’ma yé ka wo lɛsɔɔle ye, Yé ka ’ka a nyi sié léé, ka fe loo? Sin, maa we dɛrɛ lɛ kini ka lɛ, We yɔɔle lé ka ’ka a gi dɔɔa lo, maa fe ka lɛ.

⁷ Wo dan kɛlɛ lɛ laoɛ, we giéle kaan lo; Ka ’ka dan a gi dɔɔ lɛ lo, fɔɔ yé wo bɔ a zo, Dé ka da a fe léé, ’wa gi dɔɔ é kyɛn.

⁸ Ka ’ka we do kpen ’ma lɛ a gi lo, yé ka ’ka we do kpen dɔɔ lɛ a gi lo, Yé ana we do kpen ’ka go lɛ ka tɔné gi lo; Naa, maa gi dɔɔ é kyɛn léé, ka ’ka yara pa lɛ anlé we ta lo, É sia ka yaabléyi va, woo ka laama nwamimazannu

⁹ An tɔ lé we ma, an daan anlé bliflile ma, Anlé fuasan we ma, anbo kun ka vazia, Dé maa da ka kulu ga.

¹⁰ Maa ka pa fɛseleégibɔ gi bélé gɔɔlifu zo; Maa ka gi dan ’furu kyɛ lé ke we tɔntɔn nya, a va.

¹¹ An sɔ anbo lɛ; an sɔle anbo lɛ lé we ma lé maa dan a kɛlɛ lɛ; An tɔ é dan sɛrɛ lɛ kaa? Maa ’ka dan an tɔbɔle nɔ lɛ mi bɛ lɛ lo.

Bale Sirus si a va minwiinzan nya

¹² Jakɔb, ’i tɔné dɔ an lɛ. Bii Izraɛl lé maa i laa, ’i tɔné dɔ an an lɛ. Maa, maa lé ke a vininzan nya, Yé maa lé ke é ziin a voélazan nya.

¹³ An bɛ tɛrɛ gane vɔ, An bɛyi ɛ lanu fwila, Maa wo laa tɔɔn, wo da.

¹⁴ ’Kaa faa lé, ’ka zén ékeva, ’ka tɔné dɔ; Yee balenu vazan kyɛn ɛ we ’konu fee? Mi lé éé sɔa Gakelebale lɛ, ’bɛ é dan alé blibɔmawe lɛ sɔɔ lɛ Babilɔn ma, Yé é dan dɔra lɛ Kaldé munu ta plɛplɛ.

¹⁵ Maa, maa ɛ fe, yé maa ɛ a laa; Maa da a nya, yé alé nyanama é dan vɔ lɛ a ma.

¹⁶ ’Ka bié an va, yé ’ka tɔné dɔ. É sia a pélisia bléyi va, maa ’ka we do kpen fe lɛ kyeen gi lo, We ’konu pélisiana, ’té maa ana. Yé sin, Mizan Gakelebale é maa valé é Léli nwunvɔ.

We lé Bale a ma’lɛrɛ élé munu zé nya

¹⁷ I tabozan Gakelebale, Izraɛl lé Mi Sauun léma: Maa, Gakelebale, ilé Bale, maa we paan i gi ilé zin yele we ma, Zi lé é a lé i tawo a ta, maa goo i nya ’bɛna.

¹⁸ Dé é vo kɔɔn lé i tɔné dɔ anlé bélidɔwe lɛ, ’Té ilé we zin yele zén i ta bélé ’blɛ zo, Yé i dan fan lɛ ginanale nya;

¹⁹ ’Té i kulunu a bélé nyéné zo di, ’Té ilé nénu a bélé wɛyi gɔɔn ma nyéné zo; ’Té maa ’ka i tɔ fwian lo, ’té i tɔ ’ka nyaan an ’lɛ lo.

²⁰ ’Ka si Babilɔn, ’ka fwi Kaldé munu méléna; ’Ka fe léé: Gakelebale é wuozan Jakɔb tabo. ’Ka fe ginanale nya, ’ka a zana dɔɔ, ’Ka munu bɔn‐in kini a nya fɔɔ tɛrɛ glɛ sina.

²¹ Fɛana lé éé goo wo nya bwi gi, ’yiminilɔrɔ ’ka dan wo gyɛ lɛ ’bɛna lo; É dan ’yi si lɛ wo lɛ gɔlɛ gi, ’té éé duun‐an, É dan gɔlɛ fee gyɛ lɛ Yé ’yi é dan yoro lɛ.

²² Gakelebale léé: Vole drɔɔ ’ka mi naanénu zé nya lo.