Ézai 47 - Kazambale lé Sebe Sauunu 1979

Bale Babilɔn lé we ble

¹ Babilɔn blɛnzan, ’I zun, ’i nyana vungoi va. Kaldé le, ’I nyana tɛrɛ va, ilé fuablin ’ka lo. Wo ’ka dan i laa lɛ léabo le é dɛrɛ lo, wo ’ka dan a fe lɛ léé, le a é zénle i ma lo.

² ’Ilé ’woli si, ’i burupun dɔ; ’I sɔ si i ’wuo ma, ’ilé varɔ lɔrunu nwa, ’I sɔ nwa i gane ma, ’i yuunu kini.

³ Wo dan i porole ye lɛ, Yé yara é dan i gyɛ lɛ gɔrɔ la. Maa dan anlé we lɛgi pa lɛ munu ma, Maa ’ka dan mi do kpen vo lɛ lo.

⁴ Ko tabozan a mi lé wa laama lai sunyanu lé Gakelebale, a nya. Izraɛl lé Mi Sauun lé.

⁵ Kaldé le, ’I nyana, ’i tadɔ, ’i go gunutinu va. Wo ’ka dan i laa lɛ bɛnnu nwiin le é dɛrɛ lo.

⁶ An bli fli anlé munu ma, Maa anlé tɔnɔfɛ kɛlɛ boafɛ nya, Yé maa wo pa i lee; I nyanai ’ka zén lɛ wo ta lo, I kɔné bɛnzan dɔ gɔné segele nwiin.

⁷ Bé fe léé, ’é dan kɛlɛ lɛ yifaama munu nwiin le nya, I ’ka a pa lɛ i bli gi lo Yé é ’ka boenwo dɔ lɛ i gi léé, we ’ko é dan nyaa lɛ, lo.

⁸ Le nɔnɔmi kaii lé i nyanaan ibo ma duaa, ’Té bé fé i bli gi léé, Maa lé, maa, maa do kpen ɛ ke ana, Maa ’ka dan kɛlɛ lɛ gyɛzarale nya monomono lo. An ’ka dan vuru lɛ nénu ma lo, ’I tɔné dɔ sin.

⁹ We ’ko fiénu é dan bɔ lɛ i ma yi do kpen nya, Né vurule i ma valé kɛlɛle gyɛzarale nya lé; Wo dan ’wii lɛ i ta, Dé i ’moné dɔ kiɛreoo, Dé i yo kɛlɛ kiɛreoo, wo dan ’wii lɛ i ta duowo.

¹⁰ I pale a ilé wenaané ta, I léé, mi do kpen ’ka ’é yé lo. Ilé gikini valé ilé wedɔɔle i saan. I lé i bli gi léé: Maa lé, maa, maa do kpen ɛ ke ana.

¹¹ We tɔntɔn é dan bɔ lɛ i ma, Yé i ’ka bɔa sole lɛ a lee lo, Dirikiniwe é dan bɔ lɛ i ma, Ilé yo kɛlɛle ’ka dan sɔ lɛ a nya lo, I guru é dan zana lɛ a gi fiaa I ma trɔnné va.

¹² Ilé yo kɛlɛle valé ilé ’moné kiɛre dɔle lé Ibo nɔ wo kɛlɛle lɛ i kiéné la bléyi va, ’I vo ’bɛ ma; Dé i dan tɔnɔ ye lɛ wo maa? Dé i dan kɛlɛ lɛ mikanamazan nyaa?

¹³ I wɔlɛi nyaa i ma ’monédɔle nya, Munu lé woo la gi ginian, ’Té woo ’moné dɔa monénénu koo, moné dɛrɛ koo, wo va, ’Té we lé é dan bɔ lɛ i ma, ’té wa fé i lɛ, ’Wo nwa sin, ’wo i si we gi ma.

¹⁴ Bé ye, wa bélé lɔɔ zo, kyɛ éé wo blé, Wo ’ka dan so lɛ kyɛnɛnɛ lee lo; Yee kyɛ ’ka dan kɛlɛ lɛ kyɛnyɛ lé woo dunu sié ’wo ma a ma, a nya lo; É ’ka dan kɛlɛ lɛ kyɛ lé mi éé nyanaan a zi, a nya lo.

¹⁵ Munu lé ibo wɔlɛi nyaa i ma wo va ’monédɔle nya, wozé é dan kɛlɛ lɛ fɛan zo, yee lé ke bɛ. Munu lé ka yaawole sia wo nya i kiéné la bléyi va fɔɔ kyɔ, Wo dan kini lɛ ékema do do; Mi do kpen ’ka dan bɔ lɛ i va lo.