Ézai 46 - Kazambale lé Sebe Sauunu 1979

¹ Bɛl zana a gi; Nébo dia; Wo miyili ’konu pla winu punu; wa pla kɔnésiwinu punu. Bale ’konu lé ka go wo nya, wo bɛn dɔ winu ta, ’Té wo wɔlɛi nyaa wo ma.

² Wo sɔné san yé wo faa dia ékeva; Wo ’ka bɔa ’wo kɔné sizannu sile lɛ we gi lo, Yé wobozen é go luu gi.

³ Jakɔb lé munu, ’ka tɔné dɔ an lɛ, ’Kaa Izraɛl lé mi pɔné lé ka vo, ’Té kalé we a an nwiin, é sia ka pélisiana, ’Té maa ka kɔné si, é sia ka yaabléyi va bɛ, ’Ka faa tɔné dɔ an lɛ.

⁴ Ka dan kwa gyɛ lɛ, ’té maa a an dɔbɛ gi, Ka dan kwa gyɛ lɛ, ’té maa bɔa ka va; Maa ka kɔné si é kyɛn, yé maa dan a si lɛ é ziin, Maa dan bɔ lɛ ka va, yé maa dan ka si lɛ we gi.

⁵ Ka dan an dan lɛ de ɛ ma yé ko bɔ ’bɛ nya ékemaa? Ka dan de ɛ gɔɔn lɛ an bɔmazan nya, yé ’bɛzan é kɛlɛ bélé an zoo?

⁶ Munu éé kyan sié ’wolé bala gi, Woo gɔɔlifu daan kilo la, Yé wa no folibozan lɛ léé, ’bɛ a kɛlɛ bale nya, ’Té woo diaan a ’lɛ, ’té wa bɔa.

⁷ Wa kɔné sié wo bɛapa la, Wa dɔraan é dɔrana yé é vo ana; É ’ka kɔɔma é dɔna lo; Woo siaan a lɛ, naa, é ’ka a zi paan lo, É ’ka wo sié wolé kleblele gi lo.

⁸ We ’konu sele ’é dɔ ka gi, yé ’ka kɛlɛ mi nya. Wenyanékɛlɛzannu, ka ’wuo ’é dɔ ka ta ma.

⁹ Wenu lé wo kɛlɛ é kyɛn bɛ, wo sele ’é dɔ ka gi ma; Naa, maa a Bale nya, ’bɛ bɛ ’ka lo, Maa a Bale nya, an bɔmazan ’ka lo.

¹⁰ We lé é dan bɔ lɛ, maa a lɛ kini tɛrɛ pélisia bléyi ’lɛ, Yé we lé a lɛ ’ka tan sɔɔ lɛ lo, maa a fe faa ’lɛ. Wenu lé maa fe léé, an gi dan a ma, é dan vo lɛ ana, Yé maa dan anlé blibɔmawe faa lɛ sɔɔ lɛ.

¹¹ Maa ɛ wiblemiané laa, léé, ’é si yirinwanazia, Maa ɛ tɛrɛ baa lazan do laa, léé, wenu lé an gi dan a ma, ’é wo lɛ sɔɔ; Maa ɛ fe yé maa dan a kɛlɛ lɛ, É dɔ maa ɛ gi, yé maa ɛ dan a lɛ sɔɔ lɛ.

¹² Bli plɛplɛzannu, we drɔle nyanézannu, ’Ka tɔné dɔ an lɛ.

¹³ Anlé wetegele kɛlɛle a biéna, é ’ka baa lo. Anlé mi sile we gi ’ka dan mɔn lɛ lo. Maa dan Siɔn munu si lɛ we gi, Yé maa dan anlé fuasan zén lɛ Izraɛl ta.