Ézai 45 - Kazambale lé Sebe Sauunu 1979

Bale Sirus dɔ minwiinzan nya

¹ Gakelebale we fe Sirus lé, é a si a va é kyɛn, a lɛ, ’Té é kun a bɛ ma Alé bɛnnu guru zanale a gi we ma, ’Bɛ valé minwiinzannu gyɛn kyɛsidi kinile we ma, Dé maa kɔn lɛ so a lɛ, Té wa lɛ tan é dɛrɛ lo we ma.

² Gakelebale lé a lɛ léé: Maa dan tawo lɛ i ’lɛ, Maa dan zi zɛozɛonu ta bɔ lɛ ékema, Maa dan zéné duolinu ’wii lɛ, Yé maa dan kɔn lɛ tan foliɛwɔlɛnu yéli lɛ.

³ Maa dan fɛwezan yɔɔlenu nɔ lɛ i lɛ, ’Bɛ valé fuafɛ yɔɔlenu nya, Ilé a gi dɔɔle we gi léé, Maa a Gakelebale lé maa i laa i tɔ nya, a nya, Maa a Izraɛl lé Bale nya.

⁴ Maa i laa i tɔ nya, An wuozan Jakɔb sɔle an lɛ we ma, Izraɛl lé maa a si a va anzé nya, a sɔle an lɛ we ma; Maa i tɔ kɛlɛ blɛn, ’té i ’ka an dɔɔa lo.

⁵ Maa a Gakelebale nya, a bɛ ’ka lo, Dé é ’ka maa nya lo, Bale bɛ ’ka lo. Maa plɛplɛ nɔ i lɛ, ’té i ’ka tan an dɔɔ lɛ lo.

⁶ Maa we ’ko kɛlɛ léé, É sia yirinwana ma fɔɔ yé é bɔ yirivɔna ma, Munu faa a gi dɔɔ léé, Dé é ’ka maa nya lo, Bale bɛ ’ka lo. Maa ɛ ke Gakelebale nya, ’bɛ bɛ do kpen ’ka lo.

⁷ Maa ɛ tu kinié yé maa ɛ gunu dɔraan; Maa ɛ mi vɔa a ma yé maa ɛ mi gya nyané nya; Maa Gakelebale, maa ɛ we ’konu faa kɛla.

⁸ Wetegele ’é vɔ tɛrɛ la bélé lolu zo, Yé wetegele ’é da tɛrɛ la bélé lɛɛ éé sié lati gi fɛan zo, a zo. Yé mi sile we gi valé mi sole we lee, ’é kɛlɛ tɛrɛ la di Bélé lɛɛ nyian wo bléyi va fɛ dɔle zo. Maa Gakelebale, maa ɛ we ’konu kɛla.

Fɛ faa valé we faa kɛlɛ Bale

⁹ Tɛrɛbɔnu va tɛrɛbɔ do Éé za kɛla ’é dɔzan vaa? Bɔtɛrɛ a fé ’é dɔzan lɛ léé: I a mɛ kɛlɛnaa? Fɛ a fé ’é kɛlɛzan lɛ léé: I bɛ ’ka loo?

¹⁰ Mi lé é a fé é ti lɛ léé: Mɛmalé i an yaa? we tɔntɔn ’é kɛlɛ ’bɛzan lɛ ma. Mi lé é a fé é bu lɛ léé, mɛmalé i an yaa? we tɔntɔn ’é kɛlɛ ’bɛzan lɛ ma.

¹¹ Gakelebale lé ke Izraɛl lé Mi Sauun valé a Kɛlɛzan nya, é léma: Ka tɛlɛ tɛlama we laa an lee? Ka an bélidɔ anlé nénu valé an panyanama lé we maa?

¹² Maa ɛ tɛrɛ kɛlɛ, Yé maa ɛ mi bɔra a ta; Maa lé, an bɛnu ɛ lanu fwila, Maa ɛ wo gifɛnu dɔ ’wo dɔna.

¹³ Maa ɛ Sirus nwa ka sole we lee we ma, Yé maa dan alé zinu faa ta bɔ lɛ ékema; É dan anlé fla pa lɛ é ziin, yé anlé munu lé wo ke luu gi, é dan wo vo lɛ woboma, ’Té maa ’ka wo tabofɛ valé wo ma blɛ kɛlɛ lɛ lo. Lai sunyanu lé Gakelebale ɛ fe.

¹⁴ Gakelebale léma: Éjipitinu lé fuafɛnu koo, Étiopi lé tɛrɛ tɔnɔ koo, Sabémunu lé ke grɔgrɔ bɛ, wozé koo, A faa é dan da lɛ i va, yé wa kɛlɛ izé nya; Munu ’konu, wo dan tawo lɛ ka zuo, Wo dan gié lɛ gɔgɔbale nya wo ma, Wo dan dia lɛ ’wo bli la ka ’lɛ, ’té woo ’wo ma dunnuan, léé, Ka do kpen va lé Bale ke, Dé é ’ka yee nya lo, Bale bɛ ’ka lo.

¹⁵ Naa, Izraɛl lé Bale, Misiéwegizan, Bii a Bale lé ébo yɔɔan, a nya.

¹⁶ Yaragyɛwe é dan bɔ lɛ miyilinyaazannu ma, Yé yara é dan wo gyɛ lɛ, ’Té woo goo yowuli yowuli.

¹⁷ Gakelebale ma lé Izraɛlnu si we gi, Sile we gi lé a glɛ ’ka lo, yee lé. Yaragyɛwe ’ka dan bɔ lɛ ka ma lo, yé yara ’ka dan ka gyɛ lɛ lo, Fɔɔ, lɛɛfaama, a glɛ ’ka dɔa lo.

¹⁸ Gakelebale, Lanu kɛlɛzan, Bale do kpen lé É tɛrɛ kɛlɛ yé é a dɔ gligli, ’Té é a kɛlɛ léé, té ana é vo é pla bɛ lo, ’Té é a kɛlɛ léé, munu éé nyanaan a ta bɛ, yee Gakelebale léma: Maa ɛ ke Gakelebale nya, Bale bɛ do kpen ’ka ana lo.

¹⁹ Maa ’ka we fe lɛ kyeen gi Tɛrɛ la gunuti do kpen va lo; Maa ’ka a fe lɛ Jakɔb kulu lɛ léé: ’Ka an nagini é pla, lo. Maa Gakelebale, maa we fé é fena, Maa we drɔle ɛ fé.

Tɛrɛ faa lé Bale valé Babilɔn lé miyilinu

²⁰ Ka lé ka so bɛnnu lee, ’Ka zén ékeva yé ’ka da, ’Ka bié ékeva. Munu lé woo ’wolé miyili kɔné sié Yé bale lé é ’ka bɔa wo sile lɛ we gi lo, ’té wa tɔ laan bɛ, ’Wuo ’ka wo ta lo.

²¹ ’Ka a lɛ kini wo lɛ, yé ’ka da wo nya. ’Wo we pla wo ke lɛ ma. De ɛ we ’konu lɛ kini a pélisia bléyi va, Yé ana mɔn ’té éé wo zana dɔɔan? Maa Gakelebale kaan loo? Dé é ’ka maa nya lo, Bale bɛ ’ka lo, Bale tegele lé éé mi bélié, maa do kpen ɛ ke a nya.

²² Ka faa lé ka ke tɛrɛ glɛ sinanu na, ’Ka nɔla an vazia yé ka dan si lɛ we gi. Naa, maa a Bale nya, yé a bɛ ’ka lo.

²³ Maa anbo ’nyɔɔn‐an Webozen éé bɔraan an ’léé, yé an dére ma ’ka nɔlaan lo; Mi faa é dan ’wo powuo zun lɛ an ’lɛ, Mi faa é dan maa ɛ ’nyɔɔn lɛ.

²⁴ Wo dan a fe lɛ an lɛ léé: Gakelebale do kpen gi lé wetegele valé plɛplɛ ke; Munu faa lé wo bli fli a ma, Wo dan da lɛ a va, wo gi blinle wo ma we gi.

²⁵ Gakelebale é dan Izraɛl kulu faa kɛlɛ lɛ tegele, ’Té éé wo tɔ kɛla blɛn.