Ézai 44 - Kazambale lé Sebe Sauunu 1979

Kazambale do kpen ɛ ke Bale nya

¹ Jakɔb‐oo, an wuozan, ’i tɔné dɔ sin, Izraɛl lé maa si a va, ’i tɔné dɔ sin.

² Gakelebale lé é i kɛlɛ, É sia i yaabléyi va, mi lé é i tin, Mi lé i tɛn a ma, é léma: An wuozan Jakɔb, té i kana lo, Anlé Izraɛl lé maa a si a va, té i kana lo.

³ Naa, an dan ’yi zén lɛ tɛrɛ wiéwié ta, Maa dan ’yi yoro lɛ tɛrɛ gale ta; Maa dan an léli zén lɛ i bɛn ta, Maa dan i kulu drɔɔ vo lɛ.

⁴ Maa dan wo tin lɛ bélé lu zo, Bélé yuusiayilinu lé wo ke ’yi sɔnɔ, wo zo.

⁵ Mi ’ko é dan a fe lɛ léé: Maa a Gakelebale zé nya, Yé a koɛ é dan é fe lɛ léé, Jakɔb‐tɔ a ’é ma; Yé a bɛ é dan sɛbɛ gyɛ lɛ ’é bɛ ta léé: Maa a Gakelebale zé nya, Yé é dan ébo ze vɔ lɛ Izraɛl tɔ gi.

⁶ Gakelebale lé ke Izraɛl munu nwiinzan valé wo tabozan nya, ’Té é ke lai sunyanu lé Gakelebale nya, é léma: Maa ɛ ke a vininzan nya, yé maa ɛ ke a voélazan nya, Dé é ’ka maa nya lo, Bale bɛ ’ka lo.

⁷ É sia bléyian va lé maa munu ’ko bɔra, De ɛ we lɛ kini munu lɛ bélé maa zoo? ’É a fe yé ’é an bɔn‐in kini a we ma ma. ’Wo tɛlɛ tɛlama we fe; we lé é dan bɔ lɛ, ’wa fe ma.

⁸ Té ka kana lo, té ka ma é nyɔɔn lo; Maa ’ka a fe lɛ ka lɛ é li é kyɛn loo? Ka a anlé wenayezannu nya; Dé é ’ka maa nya lo, Bale bɛ aa? Gɔlɛgɔ bɛ ’ka lo, maa ’ka a do kpen dɔɔa lo.

Wo miyili banle ma we nana

⁹ Munu lé woo miyilinu kɛla, woo faa a é boa, wo panyanama zima ’ka we do kɛla lo. Woboen a fé wobo ma; wo ’ka fɛna yé lo; ’wuo ’ka wo ta lo, amalé yara é dan wo gyɛ lɛ.

¹⁰ Mɛmalé woo bale kɛla, mɛmalé woo miyili kɛla, yé wo ’ka tɔnɔ do kpen yé a ma loo?

¹¹ Ka ye, munu faa lé woo nyanama ’ko paan, wo gi é dan blin lɛ wo ma; wo kɛlɛzannu a blaminu nya é pla; wo faa ’é zén ékeva, ’wo ’wobo nagɔɔn. Wo faa ma é dan nyɔɔn lɛ yé yara é dan wo gyɛ lɛ.

¹² Folibozan éé foliɛwɔlɛ sié yé éé a vɔa kyɛ va. Éé a gya maato nya, ’té éé a folima é bɛ plɛplɛ nya; dé lɔrɔ kun a ma tɔɔn, ’té plɛplɛ ’ka a lee lo; dé é ’ka ’yi minina lo tɔɔn, ’té a wɔlɛgi do kpen ’ka a ma lo.

¹³ Yilinyaazan éé mɛtrɛ daan yili ma, éé tɔmase kɛla a ma kriɔn nya, éé yili nyaa élé sɛnné nya, éé a zi kinié fɛnyɔɔgyɛfɛ nya. Éé a kɛla bélé mi zo, bélé blami zo, é nɔnɔmi, a pale kɔn gi we ma.

¹⁴ Éé sɛdrɛyili bɔié, éé klawo?-?lo valé kɔɔyili sié, éé pɔrɔgiyilinu vaboo; éé yoro suruan, ’té lɛɛ a tin‐é.

¹⁵ Yili ’konu éé kɛla kyɛ nya blami lɛ; éé a sié yé éé dunu sié ’é ma a nya. Éé kyɛ vɔa a ’léé, fɛ dɔnele we ma. Éé a kɛla é ziin yo nya, ’té éé a baan, éé a kɛla miyili nya, ’té éé diaan ’é bli la a ’lɛ.

¹⁶ É élé yilikuru do kɛla kyɛ nya, éé wi dɔneé a ma, éé wi paneé a ma yé é a ble; éé nyanaan a zi é ziin, yé dunu é si a ma yé é léé: La! Anlé kyɛ bi yé dunu si an ma.

¹⁷ Yé kyɛpéli pɔné lé é vo bɛ, éé miyili kɛla élé yo nya a nya; éé diaan a ’lɛ, ’té éé a baan, ’té éé a tɔ laan, ’té éé a fé léé, i a anlé bale nya, amalé ’i an si we gi.

¹⁸ Wo ’wuo ’ka wo ta lo, yé wo ’ka we maan lo. Wo yuɛ lɛ a é tanle, té wo fɛna ye lo we gi, yé wo bli lɛ a é tanle, té wo we ma lo we gi, azama.

¹⁹ É ’ka ’é gi bɔrɔan lo; é ’ka we dɔɔa lo, yé ’wuo ’ka a ta yé é a fe léé: Maa a kuru do sɔn kyɛ nya, yé maa fɛ dɔne a nyɛ ma; maa wi pane a ma yé maa ble ’naan, yé maa bozofɛ kɛlɛ a pɔnénu nyaa? Maa diaan an bli la yilikuru do lɛɛ? ’Wuo ’ka wo ta yé wa fé ’bɛ zo lo.

²⁰ É a bélé kyɛyee lé é a ble; a saanbli a saan; é ’ka bɔa ébo sile lɛ we gi lo, yé é ’ka bɔa a fele lɛ léé, viéfɛan ke an lee ’ko loo? lo.

Kazambale ɛ ke fɛ faa Kɛlɛzan nya

²¹ Jakɔb‐oo, we ’konu sele ’é dɔ i gi ma; Izraɛl, i a an wuozan nya, azama. Maa i bɔra, bii a an wuozan nya; Izraɛl, i sele ’ka dan saan lɛ an gi lo.

²² Maa ilé bélidɔwe sɛrɛle fwian bélé lati fwile zo; Maa ilé wenyané fwian bélé lati borozan fwile zo; Maa i tabo, Amalé ’i da an va i pa gi.

²³ Gakelebale we kɛlɛ, amalé lanu, ka gi ’é nana ma; ’Kaa tɛrɛwɔlɛmanu, kalé ginanale zuoi ’é go ma; ’Kaa gɔnu, ’ka siaa ginanale nya ma, ’Kaa pɔrɔnu valé yili faa tere é ziin, ka gi ’é nana ma. Naa, Gakelebale Jakɔb tabo, azama. É ’élé fua nagɔɔn Izraɛlnu nya.

²⁴ I tabozan Gakelebale lé É i ma’lɛrɛle sia i yaabléyi va, é léma: Maa Gakelebale, maa fɛ faa kɛlɛ; Maa lanu fwila an do kpen, An tɛrɛ pla an do kpen.

²⁵ Maa viébalelayemunu lé tɔmasenu sɛrɛ, Yé maa lé ’monédɔmunu ma léé, wa tavozannu nya; Maa wedɔɔmunu biéan ’wo zuo, Yé maa wolé ’wuoatawe nɔla tavowe nya.

²⁶ Maa an wuozan dére dɔa plɛplɛ; Tɛlɛ tɛlamawe lé anlé nwunvɔzannu a fé, maa a lɛ sɔɔan; Maa lé Jérusalɛm ma léé, munu é dan nyana lɛ ana, Yé maa lé Juda lé flanu ma léé, wo dan wo pa lɛ ’wo pa gi; Yé wolé flanu lé wo vo ’wo ’bin nya, maa dan wo pa lɛ ’wo pa gi.

²⁷ Maa lé ’yi blɛn lɛ léé: ’I béli ma. Maa dan ilé yuunu béli lɛ.

²⁸ Maa lé Sirus ma léé, é a anlé ’blatabinzan nya, Yé é dan anlé blibɔmawe faa lɛ sɔɔ lɛ; É dan a fe lɛ léé, ’wo Jérusalɛm pa é ziin; É dan a fe lɛ léé, ’wo Balekɔn gane vɔ.