Ézai 43 - Kazambale lé Sebe Sauunu 1979

Bale léé, é dan élé munu si lɛ we gi

¹ Jakɔb‐oo Jakɔb, Gakelebale lé é i kɛlɛ, é a wefena sin; Izraɛloo Izraɛl, mi lé é i bɔra, é léma: Maa i tabo, amalé té i kana we do kpen lee lo, Maa i laa i tɔ nya; bii a anzé nya.

² Dé i a ’yi kinina, maa dan kɛlɛ lɛ i va; Dé i a yuunu kinina, wo ’ka dan i mini lɛ lo; Dé i tawo kyɛ va, i kyɛ ’ka dan ble lɛ lo, Kyɛnɛnɛ ’ka dan vɔ lɛ i ma lo.

³ Naa, maa a Gakelebale ilé Bale nya, Maa a Izraɛl lé Mi Sauun nya, i siéwegizan nya; Maa Éjipiti nɔ i tabofɛ nya, Maa Étiopi valé Saba nɔ i pa gi.

⁴ I wea an lee, I tɔ a é bɔle yé i sɔ an lɛ, Amalé maa munu nɔ i pa gi, Yé maa migɔnɔnu nɔ i vole é yuɛma we gi.

⁵ Maa a i va, amalé té i kana we do kpen lee lo, Maa dan i bɛn si lɛ yirinwanazia, Maa dan wo si lɛ yirivɔnazia, yé maa wo zén ékeva.

⁶ Maa dan a fe lɛ yirinwana bɛbolazia lɛ léé, ’i wo nɔ. Maa dan a fe lɛ yirinwana bɛyilazia lɛ léé, té i kun wo ma lo. ’Ka an benu si tɛrɛ baanu ta, ’ka da wo nya, ’Ka an lunu si tɛrɛ glɛ sina, ’wo da.

⁷ Munu faa lé woo wo laan an tɔ nya, ’wo da, Maa wo bɔra an tɔbɔle we gi, Maa ɛ wo kɛlɛ, maa ɛ wo tin.

Izraɛl a Bale lé wenayezan nya

⁸ Yuɛwiimunu lé wo yuɛ ke ana, ’wo bɔra a gi ma, Yé tɔnéwiimunu lé wo tɔné ke, ’wo bɔra a gi ma.

⁹ Bɛnnu faa ’é zén ékeva ma, Migɔnɔnu ’é kee ma. Wo va mi kyɛnnu ɛ we ’konu fee? De ɛ we ’konu lɛ kini ko lɛ é vinin yé ko a ’maa? ’Wo da wolé wenayezannu nya yé ’wo ’wolé wenéné nagɔɔn ma; ’Wo tɔné dɔ yé ’wo léé, weboen lé, ma.

¹⁰ Gakelebale léé, ka a anlé wenayezannu nya, Ka valé an wuozan lé maa a si a va, wo nya, léé, Ka gi dɔɔ, Yé ka bli vo an lɛ, yé ka a gi ’ma léé, maa lé. Bale bɛ ’ka an ’lɛ é kyɛn lo, Yé a bɛ ’ka an zuo lo.

¹¹ Maa, maa ɛ ke Gakelebale nya, Yé dé é ’ka maa nya lo, misiéwegizan bɛ ’ka lo.

¹² Maa ɛ fe, maa ɛ ka si we gi, maa ɛ we lɛ kini ka lɛ é kyɛn; Bale bɛ ’ka ka va yé ’bɛ a fe lo; Gakelebale léé, ka a anlé wenayezannu nya léé, Maa ɛ ke Bale nya.

¹³ Maa ɛ ke Bale nya a pélisia bléyi va, Mi do kpen ’ka mi sié an lee lo; Maa ɛ we kɛla, de ɛ a yi gaan an lee?

Munu so we lee Babilɔn tɛrɛ la

¹⁴ Gakelebale, ka tabozan, Izraɛl lé Mi Sauun, é léma: Kalé we ma lé maa Babilɔn munu nyanézannu pa wo lɛ zia, Yé maa kɛlɛ léé, ’wo fwi yé ’wo dia, Kaldé munu lé wo wobo tɔ bɔa ’wolé ’yitagoronu gi, woo lé.

¹⁵ Maa a Gakelebale, kalé Mi Sauun nya, Izraɛl kɛlɛzan, ka nwiinzan blɛn lé maa nya.

¹⁶ Gakelebale a we fena, Gakelebale lé é gbéin pla wɛyi méléna, Yé é zi pla ’yi plɛplɛ va,

¹⁷ ’Té é gulidangoronu valé wisoonu pa zia guli danna, Gulidan nyanazannu plɛplɛ palu, ’Té wo faa dia ékeva, ’té wo ’ka nwaan é dɛrɛ lo, ’Té wo nyaa bélé kyɛbɔ bale éé nyaan fɛan zo, a zo, Yee Gakelebale léma:

¹⁸ Wenu lé wo gié é vinin, té ka gi bɔrɔ ’bɛnu ma é dɛrɛ lo, We kyɛn lé ’bɛ kɛlɛ, té ka gi dan ’bɛ ma é dɛrɛ lo.

¹⁹ Ka ye, maa a dana we dɛrɛ kɛlɛ lɛ, é bɔ é pu; Ka ’ka a yé loo? Maa dan zi pla lɛ nyéné lé fɛna, Maa dan yuunu bɔra lɛ bwi gi.

²⁰ Bwigiwinu é dan an tɔ zin fe lɛ, Gwe valé mianéléduo é dan an tɔ zin fe lɛ, Naa, maa dan ’yi bɔra lɛ nyéné lé fɛna Yé maa yuunu bɔra bwi gi, Anlé munu lé maa wo si a va anzé nya, wolé ’yiminile we ma.

²¹ Munu lé maa wo tin anzé nya, Wo dan an tɔ ma gyɛ lɛ.

Izraɛl lé wenyané

²² Oo Jakɔb, i ’ka an laa lɛ lo, Oo Izraɛl, an lɔrɔ nyaa i ma.

²³ I ’ka ilé ’blanu kyɛ ble lɛ an lɛ lo, I ’ka an tɔ bɔ lɛ saraka bole nya lo; Maa ’ka i ma kyɛ dɔ lɛ léé, ’i blɛ kɛlɛ an lɛ lo, Yé maa ’ka i wɔlɛi nyaa lɛ i ma léé, ’i lasikɔrɔ kyɛ ble an lɛ lo.

²⁴ I ’ka ilé gɔɔli sɛrɛ lɛ lia ginzan lɔle an lɛ we ma lo; An ’ka kan lɛ ilé sarakabowi nyɔnɔ nya lo; Naa, i kle pa an ta ilé wenyané nya, Yé i an wɔlɛi nyaa an ma ilé weple nya.

²⁵ Maa, maa ɛ ilé bélidɔwe sɛrɛlenu fwi, an sɔ anbo lɛ, azama. Yé ilé wenyané sele ’ka dan dɔ lɛ an gi é dɛrɛ lo.

²⁶ ’I we sele dɔ an gi, ’ko we ble, ’I we fe i boan, ilé we kɛlɛle tegele we ma.

²⁷ I tra vininzan wenyané kɛlɛ, Yé wepaaigizannu nwa an ma.

²⁸ Bɛwemalé maa kɔn sauun nwiinzannu kɛlɛ mi planu nya, Maa Jakɔb nɔ léé, a kulu ’é ga, Yé maa Izraɛl nɔ léé, ’wa sɔnɔ.