Ézai 42 - Kazambale lé Sebe Sauunu 1979

Bale wuozan

¹ An wuozan lé maa dɔ a zuo, yee lo, Maa a si a va, yé é sɔ an bli lɛ. Maa an léli vɔ a ta; É dan wetegele fe lɛ bɛnnu lɛ.

² É ’ka dan siaa lɛ lo, é ’ka dan é dére nwa lɛ lo, Wo ’ka dan a dére ’ma lɛ zi do ta lo. É ’ka dan gyan yélile wii lɛ lo;

³ Kyɛbɔ bale lé a goi ke dɔna, é ’ka dan a diri lɛ lo; É dan wetegele fe lɛ weboen yɛrama.

⁴ A fuu ’ka dan si lɛ a ta lo yé é ’ka dan nyana lɛ lo, Fɔɔ yé é wetegele dɔ tɛrɛ la gligli, Yé wɛyi worona tɛrɛ tamunu bli é vo alé bélidɔwe lɛ.

⁵ Bale, Gakelebale lé É lanu kɛlɛ, ’té éé wo sɔɔlaan, É tɛrɛ pla alé fɛnu dɔle we ma, É tɛrɛ tamunu vo é yuɛma Yé é flinle nɔ munu lé wo ke tawona tɛrɛ la, wo lɛ. É léma:

⁶ Maa, Gakelebale, maa i laa i sile we gi we ma, Yé maa dan kun lɛ i bɛ ma, Maa dan yuɛ pa lɛ i va, yé maa i dɔ maa valé munu gi pa do fɛ nya, I kɛlɛle bɛnnu vakinisan nya we ma,

⁷ Yuɛwiimunu yuɛ fuole koo, Luugimunu sile bokɔn gi koo, Munu lé woo nyanaan gunuti va bwati gi, wo bɔrale a gi koo, ’bɛ faa we ma.

⁸ Maa a Gakelebale nya, an tɔ lé ke bɛ; Maa ’ka anlé fuasan no mi bɛ lɛ lo; Yé an ’ka an tɔbɔle no miyilinu lɛ lo.

⁹ Ka ye, we vininnu lɛ sɔɔ, Maa a we dɛrɛnu fena sin; Maa wo fe ka lɛ wo bɔle ’lɛ.

¹⁰ ’Ka lɛrɛ dɛrɛ vɔ Gakelebale lɛ; Ka lé ka tawoo wɛyi ta, ka lé ka nyanaan wɛyi sɔnɔ, Wɛyi worona tɛrɛnu valé wo tamunu, ’Ka a tɔbɔlɛrɛnu vɔ tɛrɛ glɛ faa sina.

¹¹ Bwi valé é ta flanu, wo dére ’é nwa, Kédaa munu lé flanu, wo dére ’é nwa, Munu lé woo nyanaan gɔlɛgɔnu ta, wo ma ’é nyɔɔn ginanale nya ma, Ginana siaalenu wo zuo gi ’é go wele nya gɔnu nwiin.

¹² ’Wo Gakelebale tɔ bɔ ma, ’Wo a tɔ zin fele zana dɔɔ wɛyi worona tɛrɛnu ta ma.

Bale léé, ’é dan bɔ lɛ élé munu va

¹³ Gakelebale éé goo ’é ’lɛ bélé nyanazan zo, Ébo nwa bélé gulidanzan zo; Éé dére nwaan plɛplɛ, éé siaan plɛplɛ, É élé plɛplɛ nagɔɔn‐an é nyanézannu lɛ.

¹⁴ An ta gale bléiin namɔn, An tadɔ, anbo kun; Sin, maa dan siaa lɛ bélé né yaa le zo, An dan tunu lɛ an gi, yé an fulu faa bɔra ékeva do.

¹⁵ Maa dan gɔ blɛnnu valé gɔpanénu zana lɛ ékeva, Yé maa dan wo ta lunu faa ga lɛ; Maa dan yuunu nɔla lɛ tɛrɛ gale nya, Yé maa dan ’yidoonu béli lɛ.

¹⁶ Maa dan a kɛlɛ lɛ léé, yuɛwiimunu é tawo zi lé wa dɔɔa lo, a ta, Maa dan go lɛ wo nya zi prɔɔné lé wo ’ka a dɔɔa lo, a ta; Maa dan gunuti nɔla lɛ san nya wo ’lɛ, Yé maa dan zi plinle drɔ lɛ zi tegele nya; We lé maa dan a kɛlɛ lɛ, yee lé ke bɛ, yé an ’ka dan sɔn vɔ lɛ wo ma lo.

¹⁷ Wo dan gyɛ lɛ ’wo zuo, yaragyɛwe é dan bɔ lɛ wo ma, Munu lé woo paan miyilinu ta, Munu lé wa fé miyili selelenu lɛ léé, ka a kolé bale nya, woo lé.

Izraɛl tɔné gi a yuyu

¹⁸ Tɔnéwiimunu, ’ka tɔné dɔ. Yuɛwiimunu, ’ka nagini, ’ka ye.

¹⁹ Dé é ’ka an wuozan nya lo, de ɛ yuɛ ’wii? De ɛ tɔné ’wii bélé mi lé maa a nwunvɔ, azan zoo? Mi kyɛɛn ɛ yuɛ ’wii bélé Kazambale béé zoo? Mi kyɛn ɛ yuɛ ’wii bélé Gakelebale wuozan zoo?

²⁰ I we kiɛre na ye, yé i ’ka a pa lɛ i ’wuo gi lo I tɔné lɛ so, naa, i ’ka we ’ma lɛ lo.

²¹ É sɔ Gakelebale lɛ léé, é migisan é ma bélidɔwe blɛn kɛlɛ, Izraɛl munu gi nanale we gi.

²² Wa munu lé wo ’wii wolé fɛ ta, ’té wa sié gla nya, wo nya; Wo gɔgɔbale vɔ wo ma gɔmagurunu gi, Wo wo vɔ bwatinu gi; Wo ’wii wolé fɛ ta, yé mi do kpen ’ka wo vo woboma lo, Wo wolé fɛ sia gla nya, yé mi do kpen ’ka a fe lɛ léé, ’ka nɔ wo lɛ é pa gi lo.

²³ Ka va mi kyɛn ɛ dan é tɔné dɔ lɛ we ’konu lɛɛ? É sɔ mi kyɛn lɛ léé, é dan é tɔné dɔ lɛ flee yé we lé é dan bɔ lɛ é voéla, yé é ’bɛ ’maa?

²⁴ De ɛ Jakɔb nɔ léé, wo ’wii alé fɛ taa? De ɛ Izraɛl pa ’wiiéfɛtazannu lee? Gakelebale kaan loo? Ko wenyané kɛlɛ a ma. É ’ka sɔ lɛ ko lɛ léé, ko alé zi ta tawo lo, Ko ’ka tɔné dɔ lɛ alé bélidɔwe lɛ lo.

²⁵ Amalé a bli fli Izraɛl ma é baba, Yé é glawe bɔ wo ma yé guli wo gyɛ, Guli wo gyɛ bɛ faa ma, yé wo ’ka a gi ’ma lɛ lo; Guli wo ble yé wo ’ka ’bɛ pa lɛ wo ’wuo gi lo.