Ézai 41 - Kazambale lé Sebe Sauunu 1979

Bale Izraɛl munu bli ta dɔ plɛplɛ

¹ ’Kaa ’yiworona tɛrɛ lamunu, ’ka tadɔ yé ’ka tɔné dɔ an lɛ. Munu bli ta ’é dɔ plɛplɛ ma; ’Wo bié, ’wo we fe ma. Kaa zén ékeva, kaa we ble.

² Mi lé éé tawoo wetegele kɛlɛle nya, De ɛ ’bɛzan nwa yirinwanaziaa? De ɛ bɛnnu pa a lee yé minwiinmunu pla a wuoo? De ɛ wolé gwɔunnu kɛlɛ vungoi zo, Yé é wolé sanu kɛlɛ ’sagoi lé fu éé goo a nya, a zoo?

³ É wo zuo bin, yé zi lé a gane vinin ’ka tan zun lɛ a ta lo, É a ta tawo ginanale nya.

⁴ De ɛ we ’konu kɛlɛ yé é wo lɛ sɔɔ? Mi lé é migɔnɔnu bɔra a pélisia bléyi va, Maa, Gakelebale lé; maa a é vinin, Yé maa a an dɔbɛ gi fɔɔ yé tɛrɛla é nyaa a zo.

⁵ Wɛyiworona tɛrɛ lamunu a ye, yé kana zén wo gi, Munu lé wo ke tɛrɛ glɛ sinanu na, wo ma éé nyɔɔn‐an, Wo bié, wo da.

⁶ Wo bɔ wo ke va Yé mi faa do do lé é bwe lɛ léé, ’i bli ta dɔ plɛplɛ.

⁷ Miyilinyaazan éé fɛselezan bli ta dɔa plɛplɛ, Mi lé éé fɛ gya lɛlɛné maato nya, éé folibozan bli ta dɔa plɛplɛ; Fɛ lé wa sudéé, wo léé, é a é zima, Yé a do pɔnté blin miyili ma, té é dia lo we gi.

⁸ Naa, bii Izraɛl, an wuozan, Jakɔb lé maa a si a va, Abraam kulu lé é sɔ an lɛ,

⁹ Bii lé, maa i si tɛrɛ glɛ sina Yé maa i laa, ’té i a tɛrɛ baa ta, Yé maa lé i lɛ léé, bii a an wuozan nya, Maa i si a va, yé maa ’ka dan sɔn vɔ lɛ i ma lo.

¹⁰ Té i kana we do kpen lee lo, naa, maa a i va; Té i we do kpen gi bɔrɔ pa lo, naa, maa a ilé Bale nya. Maa i fuu dɔa i ta, maa bɔa i va, Maa, guliwuovolɛzan, maa dɔ i zuo.

¹¹ Bé ye, munu faa lé wo bli fli i ma, Wo gi é dan blin lɛ wo ma, yé yara é dan wo gyɛ lɛ; Munu lé wo nwa i ma, Wo dan kɛlɛ lɛ é boa, wo dan zamaga wo lɛ.

¹² Munu lé woo i ’léé wɛɛan I dan wo nagini lɛ yé i ’ka dan wo ye lɛ é dɛrɛ lo; Munu lé woo guli vɔa ka lɛ, Wo dan kɛlɛ lɛ é boa yé wo kulu é dan ga lɛ.

¹³ Naa, maa a Gakelebale, ilé Bale nya, Maa i bɛyi dɔa plɛplɛ, Maa ɛ fe i lɛ léé, an dan bɔ lɛ i va, Amalé té i kana we do kpen lee lo.

¹⁴ Jakɔb, bii lé i ’ka vo lɛ we do nya lo, ’Kaa Izraɛl sɛné lé ka vo, ’té ka ke tɔɔtɔɔ, té ka kana lo; Gakelebale léé, é dan bɔ lɛ ka va, Izraɛl lé Mi Sauun lé ke ka siéwegizan nya.

¹⁵ Ka ye, maa i kɛlɛ bélé gɔ fun‐an mazin dɛrɛ Suiɛ zo; I dan gɔ blɛnnu fun‐an lɛ, Yé i dan gɔpanénu kɛlɛ lɛ bélé ’sapɛɛ zo.

¹⁶ I dan wo fɛɛ lɛ yé fu é dan go lɛ wo nya, Yé barikoko é dan wo fwila lɛ. Naa, bii, i gi é dan nana lɛ Gakelebale gi; I dan ibo tɔ bɔ lɛ Izraɛl lé Mi Sauun gi.

¹⁷ Wenaanébɔmazannu valé nyanégyɛzannu, wa ’yi ginina, yé é ’ka lo; ’Yiminilɔrɔ ma lé wo lai ga. Maa Gakelebale, an dan we lɛ wolé we ma, Maa, Izraɛl lé Bale, an ’ka dan wo vo lɛ lo.

¹⁸ Maa dan yuu yoro lɛ gɔpanénu ta, Maa dan ’yi’wuo kɛlɛ lɛ pɛngurunu na, Maa dan nyéné saa lé fɛna nɔla lɛ ’yidoo nya, Maa dan ’yi yoro lɛ tɛrɛ gale ta;

¹⁹ Sɛdrɛyili koo, akasiayili koo, Miiteyili koo, ɔliviyili koo, maa dan wo suru lɛ nyéné lé fɛna; Siprɛyili koo, ɔɔmeyili koo, buiyili koo, Maa dan wo faa suru lɛ wɛtɛrɛ la ékeva,

²⁰ Munu lé a naginile we gi, ’té woo bɔn‐in daan a ma, ’Té wa yé, yé wa gi dɔɔ léé, Gakelebale bɛ ɛ we ’konu kɛlɛ, We ’konu si Izraɛl lé Mi Sauun va.

Bale viébalenu ma we nana

²¹ Gakelebale lé miyilinu lɛ léé: ’Kabo zé fe; Jakɔb nwiinzan lé ka lɛ léé: ’Kabo lé wenéné fe.

²² ’Ka kalé wenéné nagɔɔn, Yé we lé é dan bɔ lɛ, ’ka fe ko lɛ. Mɛ we lé ka fe é kyɛn léé, é dan bɔ lɛɛ? ’Ka fe ko lɛ sin, yé ’bɛ é vo ko ’wuo gi, Yé dé a lɛ sɔɔ yé ko gi dɔɔ. Dé ’bɛ kaan lo, ’ka tɛlɛ tɛlama we fe ko lɛ.

²³ We lé é dan bɔ lɛ é voéla, ’ka fe, Yé ko a gi dɔɔ léé, ka a balenu nya; ’Ka wezin kiéné do kɛlɛ, dé ’bɛ kaan lo, ’ka wenaané do kɛlɛ Yé ko ’bɛ ye yé ko bɔn‐in bɔrɔ ’bɛ ma.

²⁴ Ka ye, ka ’ka we do nya lo; Ka kɛlɛwe ’ka lo, Mi lé é ka si, é a bélé bo zo.

²⁵ Maa mi do nwa yirinwana bɛbolazia yé é da, É an tɔ laa yirinwana; É dan mi plɛplɛnu zɔn lɛ é gane nya bélé voli zo, É dan wo zɔn lɛ bélé bɔdɔzan lé bɔtɛrɛ zɔnle zo.

²⁶ De ɛ ’bɛ fe é vinin yé ko a gi dɔɔ? De ɛ ’bɛ fe ana mɔn yé ko fé léé, weboen léé? Ka do kpen ’ka a fe lɛ lo, ka do kpen ’ka a lɛ kini lɛ ko lɛ lo, Mi do kpen ’ka ka dére ’ma lɛ lo.

²⁷ Maa a mi vininzan lé é a fe Siɔn munu lɛ léé: Wo looo lo! a nya. Yé maa ɛ fe Jérusalɛm munu lɛ léé: Maa mi do nwunvɔ léé, ’é da wenéné zuo fe ka lɛ.

²⁸ Maa nagini, ’té mi do ’ka ana lo, Wo va mi do ’ka balelawe fé lo, Dé maa we laa, wo do kpen ’ka a zi paan lo.

²⁹ Ka ye, wo faa a é boa, Wo kɛlɛwe ’ka lo, Wolé miyilinu a bélé fu zo é pla.