Ézai 40 - Kazambale lé Sebe Sauunu 1979

Blivowelɛ dérenu

¹ Kalé Bale léma: ’Ka anlé munu tɔrɔ paaoo, ’ka anlé munu tɔrɔ paa.

² ’Ka siaa Jérusalɛm munu lɛ, ’ka fe wo lɛ léé: Wolé luu kɛlɛle nyaa, Wolé weple ’yibo, Gakelebale we lɛdɔ wo gi Wolé wenyané faa ma gɔnɔ fié.

³ Dére do siaa léé: ’Ka Gakelebale lé zi pla bwi gi, ’Ka kolé Bale lé gbéin ta bɔ ékema Fɛna gale na.

⁴ Gɔworonanu faa é dan fan lɛ, Yé gɔnu faa valé gɔpanénu faa ta é dan zana lɛ. Fɛna nwale faa na é dan bɔ lɛ ékema; Gɔ lé a giéle ke tɔntɔn, alé zi é dan drɔ lɛ,

⁵ Yé Gakelebale lé fua ta é dan bɔra lɛ, Yé mi faa é dan a ye lɛ a bléyi duo nya; Maa Gakelebale ɛ fe, azama.

⁶ Dére do léé: ’I siaa! Yé é a zi pa léé: An siaa dére kaa nyaa? Munu faa a bélé lu zo, Yé wolé fua faa a bélé féi lu vwi zo.

⁷ Dé Gakelebale lé fu gié wo ta, Lu éé gaan, yé a vwi éé diaan; Munu a bélé lu zo weboen nya,

⁸ Lu éé gaan, yé a vwi éé diaan; Naa, kolé Bale dére éé voo ana lɛɛfaama.

⁹ ’Ka go gɔ grɔgrɔ nwiin, ’Ka we néné zana dɔɔ Siɔn munu lɛ, ’Ka dére nwa, té ka kana lo, ’Ka we néné zana dɔɔ Jérusalɛm; ’Ka fe Juda tɛrɛ la flanu lɛ léé: Kalé Bale looo, kalé Bale lo!

¹⁰ Ka ye, Mizan Gakelebale a dana élé plɛplɛ nya; Éé plaan munu nwiin é bɛ plɛplɛ nya. Ka ye, ka banwofɛ a a lee, Éé ka gooli paan zia, yé yeeboen éé dan a zuo.

¹¹ É a bélé ’blatabinzan zo, é dan élé trubɛnu pa lɛ, É dan élé ’blanénu sia lɛ Yé é wo buvɔ ’é ma; Yé é dan go lɛ ’bla tinanu nya.

¹² Mi kyɛn ɛ ’yinu dan é leeguru laa? De ɛ lanu dan é bɛlaa nya Yé é tɛrɛla vun dan gboun‐o nyaa? De ɛ gɔnu pɛzé wo bɛkilo nya Yé é gɔpanénu pɛzé wo kiloné nyaa?

¹³ De ɛ Gakelebale léli gi dan, Yé de ɛ a bɔn‐in kini élé weplale a lɛ nyaa?

¹⁴ De valé Bale wo ’wuo tɛn ékema yé é we ’ma ’bɛ ’léé? De ɛ wetegele lé zi gɔɔn a lɛɛ? De ɛ wedɔɔle paa a gi Yé de ɛ kɛlɛ yé a gi kinii?

¹⁵ Ka ye, bɛnnu faa a bélé ’yi toole do do zo, Wa bélé vungoi zo kiloné ta. ’Yiworona tɛrɛnu a bélé vungoi lé fu a sian, a zo.

¹⁶ Liban yilinu ’ka a bankyɛ bɔa lo, Yé ana winu ’ka a banfɛ bɔa lo.

¹⁷ Bɛnnu faa ’ka we do nya a yuɛ gi lo, A vazia wa é pla, wa é boa.

¹⁸ Ka dan Bale dan lɛ mi kyɛn maa? Mɛ lé i dan a gɔɔn lɛ a foto nyaa?

¹⁹ Nyanamapazan ɛ miyili kɛla, Yé gɔɔlifu folizan éé kyan giéan a ma, Yé é a nyɔɔ gya gɔɔlifu gɔgɔbale kénénénu nya.

²⁰ Nyanégyɛzan lé fɛ ’ka a lee lo, Éé yili sié ézé nya, yili lé é ’ka vɔn‐o lo, a nya, Éé a no blabozan lɛ Yé miyili lé é ’ka diaan lo, yé ’bɛ a nyaa a lɛ.

²¹ Ka ’ka a gi dɔɔa loo? Ka ’ka a gi ’ma lɛ loo? Wo ’ka we ’konu gɔɔn lɛ ka lɛ a pélisia bléyi va loo? Ka ’ka ka gi bɔrɔ lɛ tɛrɛ gane vɔle ma loo?

²² Bale ɛ nyanaan tɛrɛ valé lanu faa ta loru, Yé tɛrɛlamunu a bélé gangannu zo; Éé lanu fwilaan bélé yéyéiné sɔ zo; É wo kɛlɛ bélé sɔkɔn zo, A nyanana kɛlɛle ana we ma.

²³ Yee Bale ɛ mi segelenu kɛla fɛ pla nya, Yé éé tɛrɛla weblezannu kɛla boazannu nya;

²⁴ Wo ’ka wo suru lɛ boenwo lo, Wo ’ka wo vɔ lɛ boenwo lo, Wo suni boen ’ka tɛrɛ gi lo; Éé fu fɛɛan wo ma yé wo ma éé yuruan Yé barikoko éé wo sian bélé ’sagɔ zo.

²⁵ Mi Sauun léma: Ka dan an dan lɛ mi kyɛn ɛ ma, yé ko bɔ a nya ékemaa?

²⁶ ’Ka yuɛ vɔ loru, ’ka nagini, Dé de ɛ fɛ ’konu kɛlɛɛ? De ɛ wo giéna gɔɔn wo lɛɛ? Éé wo faa laan wo tɔ nya; Alé se blɛn valé alé plɛplɛ baba lé we ma lé A do kpen ’ka sié é dɔna lo.

²⁷ Jakɔb, mɛmalé i léé, ’É gona a é yɔɔle Gakelebale ma, ’Élé Bale ’ka dɔa ’é zuo é dɛrɛ loo? Izraɛl, mɛmalé bé fee?

²⁸ I ’ka a gi dɔɔa loo? I ’ka a gi ’ma lɛ loo? Bale lé ke ana lɛɛfaama, Gakelebale, Yee ɛ fɛnu faa kɛlɛ fɔɔ tɛrɛ glɛ sina; A wɔlɛi ’ka nyaan a ma lo, yé koi ’ka a gya lo; Wo ’ka a gikinile gi maan lo.

²⁹ Mi lé a wɔlɛi nyaa a ma, éé plɛplɛ no ’bɛ lɛ, Yé mi lé koi a gyɛ, éé ’bɛzan lé plɛplɛ taa paan.

³⁰ Pɛniɛnu wɔlɛi éé nyaan wo ma, yé koi éé wo gya, Yé mi boronénu sɔnéwɔlɛ éé saan yé woo diaan;

³¹ Naa, munuan woo paan Gakelebale ta, éé wolé plɛplɛ taa paan é ziin. Woo sié bélé gola zo; Woo vlanburuwo yé koi ’ka wo gya lo, Woo tawoo yé wo wɔlɛi ’ka nyaan wo ma lo.