Ézai 39 - Kazambale lé Sebe Sauunu 1979

Babilɔn nwiinzan munu nwunvɔ Ézékia va

¹ ’Bɛ bléyi duo nya, Babilɔn minwiinzan Baladan be Bérodak Baladan sɛbɛ valé blan pa Ézékia lɛ zia, naa, é a ’ma léé, Ézékia gyɛ kɛlɛ yé é béli.

² É sɔ Ézékia lɛ, yé fɛ vlɛzannu koo, gɔɔlifu valé kyan koo, zianbla ginzannu valé nyɔnɔwezan koo, alé gulidanfɛnu koo, fɛ faa lé ke alé fɛwezannu nya koo, é a faa pana gɔɔn wo lɛ. Fɛ lé ke alé kɔn gi valé alé tɛrɛ faa la yé Ézékia ’ka ’bɛ gɔɔn lɛ wo lɛ lo, ’bɛ fɛ ’ka lo.

³ ’Bɛ zuo balelayezan Ézai da minwiinzan Ézékia va yé é lé a lɛ léé: Munu ’ko, wo lé nɔɔ? Wo si kyɛn yé wo da i vaa? Ézékia lé a lɛ léé: Wo si tɛrɛ baa la, wo si Babilɔn.

⁴ Ézai lé é ziin léé: Mɛ fɛ lé wa ye ilé kɔn gii? Ézékia lé a lɛ léé: Wo anlé kɔngifɛnu faa ye; anlé fɛwezannu va fɛ lé maa ’ka a gɔɔn lɛ wo lɛ lo, é ’ka lo.

⁵ Yé Ézai lé Ézékia lɛ léé: ’I tɔné dɔ lai sunyanu lé Gakelebale dére lɛ.

⁶ Bé ye, a bléyi é dan bɔ lɛ yé fɛ faa lé ke ilé kɔn gi valé fɛnu lé i tranu a zun dɔ fɔɔ kyɔ yi nya, wo dan go lɛ a faa nya Babilɔn; Gakelebale léé: A do kpen ’ka dan vo lɛ lo.

⁷ I benu lé i dan wo yaa lɛ bɛ, wo dan wo ke si lɛ yé wo dan wo kɛlɛ lɛ miblalenu nya Babilɔn nwiinzan lé kɔn gi.

⁸ Ézékia a zi pa Ézai lɛ léé: Gakelebale dére lé bé fe, é a é zima. Yé é lé é ziin léé: Anzé tɛrɛla bléyi va, munu é dan vo lɛ drɔɔ, ’té wo gi a é sanle wobo ma.