Ézai 38 - Kazambale lé Sebe Sauunu 1979

Ézékia gyɛ kɛlɛ yé é béli

¹ ’Bɛ bléyi va, Ézékia gyɛ kɛlɛ gagyɛ nya. Balelayezan Amosi be Ézai da a va yé é lé a lɛ léé: Gakelebale léma: I dan ga lɛ, i ’ka dan vo lɛ é yuɛma é dɛrɛ lo, amalé ’i dére vo ilé kɔngimunu va.

² Ézékia é yara nɔla kɔnguru ma yé é bazoro Gakelebale lɛ yé é léé:

³ Oo Gakelebale, a sele ’é dɔ i gi léé, an tawo i yara yarapalale valé bli tegele nya, yé we lé ké é zima i yuɛ gi, yee lé maa a kɛlɛ. Yé Ézékia yuɛ’yi so kiɛre.

⁴ ’Bɛ zuo Gakelebale lé Ézai lɛ léé:

⁵ ’I go bé fe Ézékia lɛ léma: Gakelebale, i ti David lé Bale léma: Maa ilé bazorodére ’ma, maa i yuɛ’yi ye. Bé ye, maa dan lɛɛ vu ta soru nɔ lɛ i lɛ é ziin.

⁶ Maa dan i si lɛ Asirinu nwiinzan lee, bii valé fla ’ko nya; maa dan fla ’ko takuun lɛ.

⁷ Tɔmase lé maa Gakelebale é dan a nɔ lɛ yé ’bɛ nya lé i dan a gi dɔɔ lɛ léé, Gakelebale é dan é dére lɛ sɔɔ lɛ, yee lé ke ’ko:

⁸ Furɔ lé yiri a zun Akaz lé sikalié ta, maa dan da lɛ a nya é ziin é pai sikalié vu nya. Yé yiri da é pai yé a furɔ da é pai sikalié vu nya.

⁹ Juda munu nwiinzan Ézékia lɛrɛ vɔ élé gyɛ kɛlɛle valé é bélile we ma; yee lé ke ’ko:

¹⁰ Maa lé kɔɔn léma: Anlé tɛrɛla a drɔɔ ’naan, yé é a lé maa go Gamunu nyananaa? Anlé lɛɛnu lé wo vo, Bale wo si an lee.

¹¹ Maa lé kɔɔn léma: Maa ’ka dan Gakelebale ye lɛ é dɛrɛ lo, Maa ’ka dan Gakelebale ye lɛ, tɛrɛ lé miyuɛmalenu éé nyanaan a ta, ana lo. Maa ’ka dan mi do kpen ye lɛ Tɛrɛlamunu va é dɛrɛ lo.

¹² Wo anlé tɛrɛla si an lee, yé wo goan baa an ma Bélé ’blatabinzan lé sɔkɔn zo; Bale anlé tɛrɛla bɔi a ta Bélé sɔtanzan élé sɔ ’wuo kinié fɛan zo, a zo. É sia bladi fɔɔ nyanadi, i vo an gyɛna.

¹³ An tadɔ fɔɔ yé tu kini, É an wɔlɛnu faa ’wii bélé golizra zo. É sia bladi fɔɔ nyanadi, i vo an gyɛna.

¹⁴ An siaan bélé leelené lé wele zo, An wé bélé plala zo; An yuɛinu zun yé an yara dɔ la vazia Yé maa léé: Oo Gakelebale, maa a nyané blena kaii, ’i bɔ an va.

¹⁵ Maa fé nɔɔ? É we zi pa an lɛ, yé é a nyi si. Kle ’ko zo pale an ta zuo, Maa dan tawo lɛ bo kiéné nya fɔɔ yé anlé tɛrɛla é nyaa a zo.

¹⁶ Mizan, ilé zin ma lé mi éé voo é yuɛma, Ilé zin ma lé an ke flinna tan; I an dɔ an pa gi yé i an vo é yuɛma.

¹⁷ Bé gini do, anlé nyanéblelenu boen‐oo, wo kɛlɛ an bélifɛ nya; É sɔ i lɛ kɔɔn léé, i an boen si yé sin an paiguru vo é pla, I anlé wenyané faa vo i bɛ zuo, azama.

¹⁸ Munu lé wo ke gamunu nyanana, wo ’ka i tɔ zin fé lo, Mi gale ’ka i tɔ kɛla blɛn lo, Munu lé wo zun guru gi wo bli ’ka ilé yarapale we la lɛ é dɛrɛ lo.

¹⁹ Mi yuɛmale ɛ i tɔ zin fé, iin, mi yuɛmale lé; Maa ke kyɔ fɛan zo, a zo mi lé. Né ti éé ilé yara pale we la gɔɔn‐an élé nénu lɛ.

²⁰ Gakelebale an si we gi. Ko dan kolé kɔnɔ gyɛ lɛ Gakelebale lé kɔn gi Kolé tɛrɛla faa gi.

²¹ Ézai a fe kɔɔn léé: ’Ka bɔrɔyili poro povɔle si, ka pa a manɔn gi yé Ézékia é dan béli lɛ.

²² Yé Ézékia a fe kɔɔn léé: Tɔmase kaa nya lé maa dan a gi dɔɔ lɛ léé, maa dan go lɛ Gakelebale lé kɔn gii?