Ézai 36 - Kazambale lé Sebe Sauunu 1979

Asirinu a bon‐ɛnna Jérusalɛm nya

¹ Minwiinzan blɛn Ézékia plale mi nwiin lɛɛ vu ta ziɛnzan nya, Asiri munu nwiinzan Sansérib nwa Juda tɛrɛ la fla plɛplɛnu faa ma yé é wo si gla nya.

² Asiri munu nwiinzan ɛ Rabasaké valé gulidansunya plɛplɛnu nwunvɔ léé, ’wo si Lakis yé ’wo go Jérusalɛm minwiinzan Ézékia va guli dan. ’Yidoo lé ke loru, wo bɔ ’bɛ yoro sɔnɔ, ’té ’bɛ ke sɔgibɔzan lé zi ’léé bɛ, yé wo dɔ.

³ Yé Ilkija be Éliakim lé ke minwiinzan nya, ’bɛ koo, sɛbɛgyɛzan Sɛbina koo, sɛbɛtadɔzan Azafa be Joak koo, wo go Rabasaké va.

⁴ Rabasaké lé wo lɛ léma: ’Ka fe Ézékia lɛ léma: Minwiinzan blɛn, Asiri mununwiinzan blɛn léma: Mɛ fɛ ta lé i ke é palee?

⁵ Maa fe i lɛ, i dérenu éé giéan an tɔné la bélé fu zo. Dé mi léé, ’é guli dan, a mawe a plɛplɛ valé gikinile gi. I pale a mi kyɛn ɛ ta yé i léé, ’é nwa an maa?

⁶ Bé ye do, i pale a Éjipiti ta. Gyan yélile lé bé si i dɔgi plɛplɛ fɛ nya, ’té dé miomian é dɔ a ta, éé ’bɛ bɛ fɔn‐o; ’bɛ zo lé Éjipiti tɛrɛlamunu nwiinzan ke, munu faa lé wo pale ke a ta, wo lɛ.

⁷ Dé i dan a fe lɛ an lɛ léé, ’wo pale a Gakelebale ’wozé Bale ɛ taa? A bannanu valé alé gɔ nwiin yobannanu lé Ézékia a sɛrɛ, ’té é a fé Judanu valé Jérusalɛm munu lɛ léé, ’wo dia ’wo bli la balebanna lé ke Jérusalɛm, yee do kpen ɛ ’lɛ, yee Bale kaan loo?

⁸ Sin, ’i gi pa do anzan Asiri nwiinzan blɛn va, yé maa dan wisoo baa do nɔ lɛ i lɛ, ’té dé i bɔaléé, i wotazannu yee?

⁹ Anzan lé sunya nwiinzannu lé wo ’ka mi blɛnnu nya lo, bé kɛla kaa yé i wo va mi do kpen biin? I pale a Éjipiti munu ta léé, wo dan gulidangoronu valé wisootazannu nɔ lɛ ka lɛ.

¹⁰ É ziin, é ’ka Gakelebale lé blibɔmawe nya léé, an nwa tɛrɛ ’ko ma yé maa a sɛrɛ loo? Gakelebale lé an lɛ léé, ’an nwa tɛrɛ ’ko ma, ’maa sɛrɛ.

¹¹ Éliakim koo, Sɛbina valé Joak koo, wo lé Rabasaké lɛ léé: ’I we fe ko, i wuozannu lɛ aramé dére gi, naa, ko ’bɛ gi maan; té i we fe ko lɛ Juda dére gi lo, munu lé wo ke é dɔle flagɔrɔ ta, dé wo da ’ma.

¹² Rabasaké a zi vɔ léé: Anzan an nwunvɔ dére ’konu fele we gi ka valé izan lɛɛ? É ’ka an nwunvɔ lɛ munu lé wo ke é nyanale flagɔrɔ ta, ’té ka valé wonu é dan wo bo ble lɛ yé ka wo wo mini, wo va loo?

¹³ ’Bɛ zuo, Rabasaké bié yé é we fe élé plɛplɛ faa nya Juda dére gi léé: ’Ka tɔné dɔ minwiinzan blɛn, Asirinu nwiinzan blɛn dére lɛ.

¹⁴ Minwiinzan blɛn léma: Té Ézékia é dabli kɛlɛ ka lɛ lo, naa, é ’ka bɔa ka sile lɛ we gi lo.

¹⁵ Dé Ézékia a fe ka lɛ léé, Gakelebale é dan ka si lɛ a lee, Asirinu nwiinzan ’ka dan fla ’ko si lɛ lo, té ka bli é vo Gakelebale lɛ Ézékia dére ta lo.

¹⁶ Té ka tɔné dɔ Ézékia lɛ lo; naa, Asirinu nwiinzan léma: ’Ka yɔfalo fu nwa ’é lɛ, ’ka da ’é va, yé ka faa do do é dan kalé dɔrɔporo valé bɔrɔyiliporo ble lɛ, yé ka dan ’yi mini lɛ kabo lé ’yiguru gi,

¹⁷ fɔɔ, yé é da yé é go ka nya, tɛrɛ lé ke bélé kalé tɛrɛ zo, ’té ’sa valé dɔrɔ ana kiɛre, ’té fɛblele valé dɔrɔféinu ana kiɛre, a ta.

¹⁸ Té Ézékia é dabli kɛlɛ ka lɛ a fele nya léé: Gakelebale é dan kaa si lɛ we gi, lo. Bɛn bɛnu bɛ, wozé balenu wo so Asirinu nwiinzan lee?

¹⁹ Amat munu valé Aapad munu lé balenu a kyɛɛn? Séfaavaim lé balenu a kyɛɛn? Wo Samari tɛrɛ si an lee?

²⁰ Tɛrɛ ’konu lé balenu faa va, a kyɛn ɛ élé tɛrɛ si an lee? Yé Gakelebale é dan Jérusalɛm si lɛ an lee?

²¹ Naa, wo nwiinzan a fe wo lɛ léé: Té ka we zi pa a lɛ lo, amalé munu tadɔ yé wo ’ka we do kpen si lɛ a ta a zi lo.

²² Yé Ilkija be Éliakim lé ke minwiinzan lé kɔn nwiinzan nya, ’bɛ koo, sɛbɛgyɛzan Sɛbina koo, sɛbɛtadɔzan Azafa be Joak koo, wo go Ézékia va, ’té wo ’wolé sɔnu fia, yé wo Rabasaké dére fe a lɛ.