Ézai 35 - Kazambale lé Sebe Sauunu 1979

Kɛlɛle tegele lé zi

¹ Bwi valé tɛrɛ gale gi é dan nana lɛ; Fɛ é dan bɔra lɛ nyéné saa lé fɛna yé a vwi é dan bi lɛ gulimagyan zo.

² Ana é dan sɔɔla lɛ flɛrinu nya yé a gi é dan nana lɛ; É dan ginanalɛrɛ vɔ lɛ yé é dan siaa lɛ guliwuovolɛ dére nya; Wo dan Liban gɔ tɔbɔle nɔ lɛ a lɛ, Wo tɔ é dan kɛlɛ lɛ blɛn bélé Kaamɛl gɔ valé Sarɔn tɛrɛ zé zo. Wo dan Gakelebale tɔbɔle ye lɛ; Wo dan kolé Bale lé migisanmawe blɛn kɛlɛle ye lɛ.

³ Munu lé wo bɛ ke é zanale wo ma, ’ka wo bɛ dɔ plɛplɛ; Munu lé wo powuo wɔlɛ gi nyaa wo ma, ’ka wo powuo dɔ gligli.

⁴ Munu lé wo gi ke é vurule wo ma, ’ka fe wo lɛ léé: ’Ka bli ta dɔ plɛplɛ, té ka kana pelo; Kalé Bale lé é dan ka ’lɛ bɛ, é dan we lɛgi pa lɛ; Yeeboen é dan da lɛ yé é dan ka si lɛ we gi.

⁵ Yé yuɛwiimunu yuɛ é dan fuo lɛ, Yé tɔnéwiimunu tɔné é dan fuo lɛ;

⁶ Ganesuruzannu é dan fɔrɔ lɛ bélé gan zo, Yé bobogyɛzannu ’léé lɛ é dan so lɛ ginanale nya. Naa, ’yi é dan so lɛ nyéné saa lé fɛna, Yé ’yinu é dan yoro lɛ bwi gi.

⁷ Tɛrɛ lé a kyɛ ke é dɔle é baba, é dan nɔla lɛ ’yidoo nya, Yé ’yi’wuo é dan fɔn lɛ tɛrɛ gale ta, Yé gyan valé blawɔlɛ é dan tuu lɛ Gwenu yiina.

⁸ Wo dan zi do pla lɛ ana gbéin nya; Zi ’ko, wo dan a laa lɛ Bale lé zi tinle. Mi tiridɔle do kpen ’ka dan gié lɛ ana lo; é dan kɛlɛ lɛ wo saa zé nya; Munu lé wo ke tawona zi ’ko ta, dé wa ’tugyɛzan boen nyaoo, wo ’ka dan saan lɛ a ’léé lo.

⁹ Golizra ’ka dan zun lɛ yee zi ’ko ta lo; Migyɛwi do kpen ’ka dan zi ’ko sia lɛ lo; Wo ’ka dan wo ye lɛ ana lo, Voébomamunu ɛ dan tawo lɛ a ta.

¹⁰ Munu lé Gakelebale wo tabo, wo dan nɔla lɛ yee zi ’léé, Wo dan go lɛ Siɔn guliwuovolɛ lɛrɛ vɔle nya, Yé ginanale lé a glɛ ’ka lo, é dan kɛlɛ lɛ bélé tɔkoro zo wo ’wuo ma; Gidrɔɔ valé ginanale é dan kɛlɛ lɛ wozé nya, Gikyɛdɔle valé dunnule é dan si lɛ ana.