Ézai 34 - Kazambale lé Sebe Sauunu 1979

Bale é dan we lɛdɔ lɛ é nyanézannu gi

¹ Bɛnnu, ’ka bié, ’ka we ’ma. Munu, ’ka tɔné dɔ. Tɛrɛ valé é tafɛnu faa, tɛrɛ valé fɛnu faa lé éé a dɔa, ’ka tɔné dɔ ma.

² Naa, Gakelebale lé bliflile é dan nwa lɛ bɛnnu faa ma, yé a wɛwɛ é dan dɔ lɛ wolé sunyanu faa ma. É dan wozé nyaa lɛ; é wo pa wo gyɛzannu lee.

³ Wo galenu a é nwɛɛnle, wo galenu goi dɔ, wo nyɛ é dan yoro lɛ gɔnu ma.

⁴ Lai sunyanu faa kini ékema; lanu plin bélé saa zo, yé wolé sunyanu faa dia bélé dɔrɔlaa zo, bélé bɔrɔyili laa zo.

⁵ Nyɛ anlé gwɔun gyɛ bélé nwɛ zo; ka ye, é dan vɔ lɛ Édɔm munu ma, munu lé maa wo nyaawe fe, we lɛdɔle wo gi we ma.

⁶ Wo nyɛ Gakelebale lé gwɔun ma ble, yé wo nyɔnɔ vuru a ma; mi nyɛ a ’blanénu valé boligɔnénu nyɛ nya, yé mi nyɔnɔ a ’blagɔné kolimayere wɔlɛ nyɔnɔ nya; naa, Gakelebale a saraka bona Bozra; é a mi gyɛna é baba Édom tɛrɛ la.

⁷ Wo valé dunu dia ékeva, dirinu valé dirigɔnénu koo, tɛrɛ wo nyɛ mini, yé wo nyɔnɔ wɔra tɛrɛ nya.

⁸ Naa, Gakelebale lé welɛgipayi lé; é Siɔn lé we lɛgi pa lɛɛ ’ko nya.

⁹ Édom tɛrɛ la yuunu é dan nɔla lɛ wele nya, yé ana vun é dan nɔla lɛ povun nya, yé alé tɛrɛ é dan kɛlɛ lɛ bélé wele lé a kyɛ ke blena, a zo.

¹⁰ É ’ka dan diri lɛ é yiéyi valé é béli lo. A kyɛgoi é dan nwa lɛ yifaama; ana é dan vo lɛ é pla lɛɛfaama, mi do kpen ’ka dan gié lɛ ana monomono lo.

¹¹ É dan kɛlɛ lɛ valusanbla valé ’téli zé nya; pɔrɔkurubéli valé kanwéi é dan nyana lɛ ana. Ana é dan vo lɛ é pla bélé vun zo; ana sɛrɛle tata é dan bɔ lɛ ékema.

¹² Mi segelenu ’ka dan wo nwiinzan blɛn dɔ lɛ ana é dɛrɛ lo; alé mi blɛnblɛnnu faa nyaa.

¹³ Léliyilinu é dan tuu lɛ wo nwiinzannu lé kɔnnu gi; danan valé goligyɛné é dan tuu lɛ alé guliyɔɔkɔn plɛplɛnu gi. É dan kɛlɛ lɛ gwenu nyanana nya; é dan kɛlɛ lɛ mianéléduo lé fɛna nya.

¹⁴ Bwiiwinu valé bwigiblénnu é dan kee lɛ ’bɛna yé boligɔnénu é dan wo ke laa lɛ ’bɛna; zɔɔkurubéli é dan é nyanana kɛlɛ lɛ ana, yé ’bɛna lé é dan flin lɛ.

¹⁵ ’Bɛna é dan kɛlɛ lɛ méné lé kɔn nya, ’té woo nyɛné vɔa ana, ’té woo yiaan wo ta, ’té élé nénu zén‐é ’é ma. Boblekwanu faa é dan zén lɛ ékeva ’bɛna.

¹⁶ ’Ka Gakelebale lé sɛbɛ gi gini, ’ka a ta fe. Wi ’konu faa é dan kɛlɛ lɛ ana, a do kpen ’ka dan vuru lɛ ana ma lo; naa, Gakelebale ɛ fe; yee ɛ dan wo zén lɛ ékema.

¹⁷ Bale ’munnu zun wo tɔ ma yé é ana tɛrɛ guli wo ma. É dan kɛlɛ lɛ wozé nya lɛɛfaama; wo dan nyana lɛ ana lɛɛ wuru é wuru nya.