Ézai 33 - Kazambale lé Sebe Sauunu 1979

Bɔle mi va ma bazorole

¹ Bii lé i ’wiié fɛ ta yé wo ’ka ’wii lɛ izé ta lo, bii lé i fɛ sian gla nya yé wo ’ka izé sia lɛ gla nya lo, we tɔntɔn ’é kɛlɛ i lɛ ma. Dé i nyaa ’wiile fɛ ta nya, wo dan ’wii lɛ i ta; dé i fɛ sile gla nya lɛ sɔɔ, wo dan ilé fɛ sia lɛ gla nya.

² Gakelebale, ’i nyanai zén ko ta. Ko bli a bii ɛ lɛ. ’I bɔ ko va tu faa do do ma; ’i ko si we gi kolé kleblebléyi va.

³ Dé i dére zuogi we, munu éé fwian; dé i nwa bɛnnu éé kinié ékema.

⁴ Wo ilé gulizarafɛ si bélé flɛlɛ gaan éé ’sa blé fɛan zo, a zo; wo zén a ta bélé flɛlɛ gaan éé zén‐é fɛ ta fɛan zo, a zo.

⁵ Gakelebale a é nwale, naa, a nyanana a loru, azama. É Siɔn fan we drɔle valé we tegele nya.

⁶ I dan ilé tɛrɛla kɛlɛ lɛ drɔɔ; wedɔɔle valé ’wuoatawe a sile we gi ’wuo nya; kanale Gakelebale lee a Siɔn munu lé fɛwezan nya.

⁷ Ka ye, gulidan nyanazannu a siaana béera; yɔfalo fu nwazannu a wuvɔna é baba.

⁸ Mi do kpen ’ka zinu ta lo; mi do kpen ’ka giéan zi ’léé é dɛrɛ lo. Wo gipawenu sɛrɛ, wo serele bo flanu ma, mi do kpen ’ka wo yuɛ gi bɔa lo.

⁹ Ana tɛrɛ a gyɛ bona bli kyɛdɔle nya; yara Liban munu gyɛ, yé wo yuɛi zun; Sarɔn tɛrɛ a bélé bwi zo; Bazan tɛrɛ valé Kaamɛl ma éé nyɔɔn‐an yé wo ta yililaanu zana.

Bale we lɛ kini bɛnnu valé élé munu lɛ

¹⁰ Gakelebale léé: Sin, maa dan nwa lɛ; sin, wo dan an tɔ bié lɛ; sin, wo dan an kɛlɛ lɛ blɛn.

¹¹ Ka bɔn si lu nya yé ka dan né yaa lɛ lɔɔ nya; ka fulu a kyɛ lé é dan ka ble lɛ, a nya.

¹² Munu é dan kɛlɛ lɛ bélé wiwɔlɛ yee zo; wo dan kɛlɛ lɛ lélinu lé wo wo bɔi yé wo wo vɔ kyɛ va, ’té wo kyɛ éé blé, wo zo.

¹³ Ka lé ka ke baa, ’ka tɔné dɔ we lé maa a kɛlɛ, a lɛ. Ka lé ka ke é pu, ’ka anlé plɛplɛ dɔɔ ma.

¹⁴ Kana zén wenyanékɛlɛzannu gi Siɔn; Bale lé zi ma wenyanéfezannu ma a nyɔɔnna; ko va mi kyɛn ɛ bɔalɛ léé, é vo kyɛ lé é ke fɛ blena, a sɔnɔɔ? Ko va mi kyɛn ɛ bɔalɛ léé, é vo kyɛnɛnɛ lé é ’ka dirian lo, a sɔnɔɔ?

¹⁵ Mian alé tawobɛ ke tegele yé éé we drɔle fé, ’té éé nyé yélié tɔnɔfɛ lé wa yé gla nya, a ma, ’té éé sɔn vɔa blɛfɛ sile ma, é bɛ puole nya, yé éé tɔné lɛ taan minyɛzanawe lé wa glewo, a ’male ma, ’té éé sɔ buaan é yara léé, té é wenaané na ye lo, ’bɛzan lé.

¹⁶ Mi ’ko, é dan nyana lɛ fɛna nwale na; gɔlɛ plɛplɛ é dan kɛlɛ lɛ a yɔɔna nya. Wo dan fɛblele nɔ lɛ a lɛ, wo dan ’yi nɔ lɛ a lɛ, é ta nya drɔɔ.

Bléyi tɔbɔle é dan bɔ lɛ

¹⁷ Ka dan minwiinzan blɛn valé é kɛlɛblɛn fɛnu ye lɛ ka yuɛ nya; ka dan alé tɛrɛ glɛ faa ye lɛ.

¹⁸ Dikiniémigiwe sele é dan dɔ lɛ ka gi é pla; sɛbɛgyɛzan ka? Gɔɔlibansizan ka? Gulidankɔn taginizan ka?

¹⁹ Ka ’ka dan wemaplɛplɛ munu ye lɛ é dɛrɛ lo; munu lé ka ’ka wo dére dɔɔa lo, bɛnnu lé ka ’ka wo dére gi maan lo, ka ’ka dan wo ye lɛ é dɛrɛ lo.

²⁰ ’Ka kolé fɛtikɛlɛfla, Siɔn nagini. Ka dan nyanana drɔɔ, Jérusalɛm ye lɛ ka yuɛ nya. É a bélé sɔkɔn lé wo ’ka goan fɛ bɛna é dɛrɛ lo, a zo, yé wo ’ka dan a dɔplɛplɛyili soowɔla lɛ monomono lo, yé wo ’ka dan a balenu fuo lɛ a ma pelo.

²¹ ’Bɛna lé Gakelebale givuruwe blɛnnu kɛlɛ ko lɛ weboen nya; ’bɛna lé é kɛlɛ ko lɛ bélé yuu blɛnnu zo, bélé ’yi laala blɛn zo. ’Yitagoro lé wa vɔa payili nya, é ’ka dan bɔ lɛ ’bɛna lo; ’yitagoro blɛn ’ka dan bɔ lɛ ’bɛna lo.

²² Naa, Gakelebale a kolé weblezan nya; Gakelebale a kolé bélidɔwe nɔzan nya; Gakelebale a ko nwiinzan blɛn nya; yee ɛ ke ko siéwegizan nya.

²³ Bii a bélé bato zo, i ma balenu fuo sin. Wo ’ka dan i gwagɔné yere lɛ é dɛrɛ lo, yé wo ’ka dan sɔ dun lɛ i ma é dɛrɛ lo. Ka dan gulizarafɛ guli lɛ; ganesuruzan boen, é dan ézé ye lɛ.

²⁴ Ana nyanazan do kpen ’ka dan a fe lɛ léé, gyɛ a ’é ma, lo. Bale é dan Jérusalɛm munu ma we vo lɛ wolé weplenu ma.