Ézai 32 - Kazambale lé Sebe Sauunu 1979

Minwiinzan tegele

¹ ’Bɛ bléyi nya, munu nwiinzan é dan pla lɛ munu nwiin we tegele nya yé wolé mi segelenu é dan pla lɛ wo nwiin wedrɔle kɛlɛle nya.

² Wo faa do do é dan kɛlɛ lɛ miyɔɔna nya, mi éé yɔɔan fu lɛɛ fɛan zo, a zo, bélé mi lé éé yɔɔan lɛɛ plɛplɛ lee, a zo. Wo dan kɛlɛ lɛ bélé ’yi lé éé yoroan fɛna gale na, a zo; bélé gɔlɛ blɛn furɔ zo, tɛrɛ kyɛdɔle ta.

³ Munu lé woo fɛna yé wo yuɛ nya, gunu ’ka dan dɔra lɛ wo yuɛi é dɛrɛ lo, yé munu lé wo tɔné éé we maan, wo dan ’wo tɔné dɔ lɛ flee.

⁴ Bli yokoyokonézannu ’wuo é dan dɔ lɛ ’wo ta, yé wo dan we ’ma lɛ, yé déreminizannu é dan we fe lɛ é kele, é drɔle.

⁵ Wo ’ka dan tɔ blɛn nɔ lɛ ’tugyɛzan lɛ é dɛrɛ lo, yé wo ’ka dan dabli kɛlɛzan ye lɛ mi zin nya é dɛrɛ lo.

⁶ Naa, ’tugyɛzan éé ’tugyɛwe fé, yé éé wenaané bɔrɔan é bɔn‐in wenyané blɛn kɛlɛle we gi, vié wole Gakelebale ma we gi, lɔrɔgyɛmunu vole lɔrɔ nya we gi, mi lé ’yiminilɔrɔ ke a gyɛna, ’yi nyané kɛlɛle a lɛ we gi.

⁷ Dablikɛlɛzan lé dabli kɛlɛle a naané; éé bɔn‐in naané saa ɛ daan, nyanaizénlazannu saanle we gi ’élé viédére nya, dé nyanégyɛzan lé we a tegeleoo, éé a kɛla ’bɛ lɛ.

⁸ Naa, bɔn‐in drɔɔzan éé bɔn‐in daan we tegele ɛ nya, yé we lé éé bɔn‐in daan a nya, éé yara paan a lɛsɔɔle ta.

Weblele valé wenu dɔle ’é dɔna

⁹ ’Kaa tanyila lomu, ’ka nwa, ’ka tɔné dɔ an dére lɛ. Kun‐anwo lomu nunu, ’ka an ban ka tɔné nya.

¹⁰ É vo lɛɛ do valé yi kinu nya, ’kaa kun‐anwo lomu ma é dan nyɔɔn lɛ. Dé fɛ gyɛbléyi bɔ, wo ’ka dan fɛ gyɛ lɛ lo, yé wo ’ka dan dɔrɔporo so lɛ lo.

¹¹ Tanyila lomu, ’ka kana ma. Kun‐anwo lomu, ka ma ’é nyɔɔn ma; ’ka sɔ si ka ta, ’ka poro, ’ka sɔ dɔ ka gyɛn.

¹² Dé féi zin sele dɔ ka gi, dé dɔrɔféi baale di sele dɔ ka gi, ka dan ka golɛ gyɛ lɛ.

¹³ Lélinu valé danan tuu anlé munu lé tɛrɛ la. Ginana fla lé kɔn nɔnɔminu boen gioo, wo tuu a faa na.

¹⁴ Wo nwiinzan lé fuakɔn vo, fla lé a gi éé wé turu, ana vo é pla. Alé gɔpané valé kɔn kiilii torole é dan kɛlɛ lɛ bélé gɔmaguru zo yifaama; bwi gi sokofalenu é dan zana gyɛ lɛ ana, é dan kɛlɛ lɛ winu lé fɛblena nya.

¹⁵ Fɔɔ yé léli é si la gi yé é zén ko ta, yé bwi la tɛrɛ é nɔla tɛrɛ lé éé fɛ dɔa di, a nya, yé ’bɛ tɛrɛ é kɛlɛ bélé pɔrɔ zo.

¹⁶ Yé we drɔle é dan kɛlɛ lɛ bwi la, yé we tegele é dan kɛlɛ lɛ tɛrɛ lé éé fɛ dɔa di, a ta.

¹⁷ We tegele kɛlɛwe é dan kɛlɛ lɛ vole drɔɔ nya, yé we tegele tɔnɔ é dan kɛlɛ lɛ flinle valé nyanale duaa nya, yifaama.

¹⁸ Anlé munu é dan nyana lɛ fɛna drɔɔ na, wo dan nyana lɛ kɔnnu lé wo ’ka ’wiié lo, wo gi, wo dan nyana lɛ fɛna drɔɔ na.

¹⁹ Naa, goowɔlɛlɛɛ é dan pɔrɔ guru zana lɛ a gi, yé fla é dan zun lɛ baa.

²⁰ Munu lé woo fɛ vɔa ’yinu gɔ la, ’té woo dirigɔné valé sokofale voo woboma, wo gi é dan nana lɛ.