Ézai 31 - Kazambale lé Sebe Sauunu 1979

Bale é dan Jérusalɛm tabin lɛ

¹ Munu lé woo goo Éjipiti tɛrɛ la, bɔ ’wo vazannu gini lɛ, ’té wo pale a wisoonu ta, ’té wo bli a gulidangoronu kiɛre valé wisootazannu kiɛre lɛ yé wo yuɛ ’ka Izraɛl lé Mi Sauun lɛ lo, yé wo ’ka Gakelebale naginian lo, we tɔntɔn ’é kɛlɛ wo lɛ ma.

² Dɔlé ’té yee ɛ we dɔɔ, éé wenaané bɔa mi ma, yé é ’ka é dére sié é pa gi lo. Éé nwaan mi naanénu ma yé éé nwaan é ziin miplenu lé wo ke bɔna wo va, wo ma.

³ Éjipitinu a blami nya é pla, wo ’ka bale nya lo; wolé wisoonu a wi nya é pla, wo léli ’ka lo. Dé Gakelebale é bɛ soi, mitakuunzan sɔné é dan san lɛ, yé mi lé é ke kɔɔn ’bɛ takuunna, ’bɛ é dan dia lɛ, yé wo faa é dan zamaga wo lɛ ékeva.

⁴ Naa, Gakelebale lé an lɛ léma: Gakelebale a bélé golizra lé é wi gyɛ yé é nyana vɔ a ta, a zo. Dé é a golizra boroné nyaoo, dé ’blatabinmunu kiɛre zén a ma, di ’ka kinié a gi wo siaale lee lo, yé é ’ka kanaan wo kiɛre lee lo. ’Bɛ duo zo lai sunyanu lé Gakelebale é dan zun lɛ gulidanle we gi Siɔn gɔ valé alé gɔpanénu nwiin.

⁵ Mianénu woo bɛa buaan ’wolé nénu ta fɛan zo, a zo duo lé lai sunyanu lé Gakelebale é dan bua lɛ Jérusalɛm ta. É dan wo takuun lɛ, é dan wo si lɛ munu lee; é dan gié lɛ wo ta yé é wo si we gi.

⁶ Izraɛl munu, ’ka nɔla, mi lé ka vo ka bɛ zuo baa, a va.

⁷ ’Bɛ yi la, kalé gɔɔlifu miyilinu valé kyan miyilinu lé ka wo kɛlɛ kalé wenyanékɛlɛbɛ nya, ka faa do do é dan wo vuli lɛ.

⁸ Asiri munu é dan dia lɛ gwɔun lé é ’ka mi zé nya lo, a ’léé. Gwɔun lé é ’ka mi zé nya lo, ’bɛ é dan wo gyɛ lɛ. Wo dan fwi lɛ yee gwɔun lee, yé wolé gulidan?-?mi boronénu wo dan kɛlɛ lɛ miwuozannu nya.

⁹ Di kinile wo gi lé we ma lé wo dan si lɛ wolé guliyɔɔkɔn plɛplɛ gi, yé wo nwiinzannu ma é dan nyɔɔn lɛ yé wo dan sɔn vɔ lɛ wolé drapo ma. Gakelebale lé alé kyɛ ke Siɔn yé alé ’furu a Jérusalɛm, yee ɛ fe.