Ézai 30 - Kazambale lé Sebe Sauunu 1979

Wo gi pa Éjipitinu nya é boa

¹ Gakelebale léé: Nwamima nénu lé woo we kɛla ’wobo ’wuoi, ’té wo ’ka a laan an lee lo, yé woo gi paan munu nya do, ’té ’bɛ ’ka anlé blibɔmawe nya lo, ’té woo wenyané taa paan wenyané nya, we tɔntɔn ’é kɛlɛ wo lɛ ma.

² Woo goo Éjipiti tɛrɛ la, ’té woo ’ka zi laan an lee lo, vɔle Faraɔn zi we ma, léé, ’é kɛlɛ wo tabinzan nya, yé woo yɔɔna ginian Éjipitimunu bɛ wuo.

³ Yara é dan ka gyɛ lɛ, Faraɔn lé ka tabinle we ma, yé yaragyɛwe é dan bɔ lɛ ka ma, ka yɔɔle Éjipiti munu bɛ wuo we ma.

⁴ Juda lé mi segelenu bɔ Soan é kwakwa, yé wolé nwunvɔmunu bɔ Anɛs.

⁵ Yara é dan wo faa gyɛ lɛ Éjipiti munu ’ko lé we ma, wo ’ka dan tɔnɔ do kpen ye lɛ wo va lo. Wo ’ka dan wo si lɛ we gi lo, yé ’bɛnu ’ka dan bɔ lɛ wo va lo. Naa, yara é dan wo gyɛ lɛ Éjipiti munu lé we ma é pla, yé ’bɛnu é dan kɛlɛ lɛ wo ma boazannu nya.

⁶ Kɔnésiwinu a gona yirinwana bɛyilazia; wa kwakulitɛrɛ valé nyanébletɛrɛ kinina. Golizrada valé golizra?-?gɔné lé fɛna lé. Ménénwunnu valé dragɔn lé éé sié, wa wolé fɛna nya. Juifinu ’wolé fuafɛnu vɔ sokofalenu punu; wo ’wolé fɛwezannu vɔ nyɔgɔmé punu, yé wa gona wo nya munu lé wo ’ka dan tɔnɔ do kpen ye lɛ ’bɛnu ma lo, wo va.

⁷ Naa, Éjipiti munu bɔle wo va a boawe valé we pla nya, bɛwemalé maa we ’ko laan, vunwele lé a ’wuoplana ’ka lo.

Bale lɛgama munu

⁸ Sin, ’i go, ’i we ’konu gyɛ gɔlɛfee ta wo yuɛ va. ’Bé guru vɔ é zima, léé, ’wo vo tɛlɛ tɛlama zé nya, lɛɛfaama, té a glɛ é dɔ lo.

⁹ Naa, munu ’ko lé we ma a plɛplɛ yé wa viéwozannu nya; wa munu lé wo ’ka a nyi sié léé, ’wo tɔné dɔ Gakelebale lé bélidɔwe lɛ lo, wo nya.

¹⁰ Wa fé fɛnayezannu lɛ léé, té ka fɛna ye lo. Yé wo lé balelayezannu lɛ léé, té ka balelawe bozen fe ko lɛ lo; ’ka ko ginanawenu ɛ fe, ’ka balelawe fe ka ’wuoi é pla.

¹¹ ’Ka si zi zin ta, ’ka si tawozi ta, ’ka Izraɛl lé Mi Sauun si ko yuɛi baa.

¹² Bɛwemalé Izraɛl lé Mi Sauun léma: Ka sɔn vɔ dére ’ko ma, ka a pale glawe valé viéwe ɛ ta, yé ka wo kɛlɛ ka bɔvafɛ nya,

¹³ amalé wenyané blɛn ’ko é dan kɛlɛ lɛ ka lɛ bélé gɔrɔ torole lé é zan si yé é tɛnla, a zo; é dan zana lɛ gɔnɔ do ’té, bléyi do kpen nya,

¹⁴ yé é dan ’wii lɛ tuuntuun bélé bɔ zo, ’té a plené ’ka vo kyɛnyɛ sifɛ nya lo, ’té a do ’ka vo ’yitɔfɛ nya lo.

¹⁵ Naa, Mizan, Gakelebale, Izraɛl lé Mi Sauun léma: Dé ka nɔla an va yé ka flin an va, é dan kɛlɛ lɛ ka sile we gi nya; vole drɔɔ valé ka pale an ta, é dan kɛlɛ lɛ kalé plɛplɛ nya. Naa, ’bɛ ’ka sɔ lɛ ka lɛ lo.

¹⁶ Ka léé: Gba, ko dan vlan buru lɛ wisoonu nya, bɛwemalé ka dan fwi lɛ vlanburule nya. Yé ka léé: Ko dan vɔ lɛ gulidangoro lé éé sié, a gi, amalé ka zuobinmunu é dan ka zuo bin lɛ sile nya.

¹⁷ Dé mi do é bɛ nwa, mi wuru soru é dan fwi lɛ; dé mi soru ’wo bɛ nwa, ka faa é dan fwi lɛ fɔɔ yé ka lé ka vo, ka dan kɛlɛ lɛ bélé tɔmase do zo gɔ nwiin, bélé drapo zo gɔpané ta.

¹⁸ Duowo, Gakelebale a a va léé, é zin kɛlɛ ka lɛ, yé é dan nwa lɛ nyanai zénle ka ta we gi. Naa, Gakelebale a Bale lé éé we tegele kɛla, a nya. Munu faa lé wo bli ke a lɛ, wo gi a é nanale.

Bale é dan bɔ lɛ élé munu va — é dan we lɛdɔ lɛ Asirinu gi

¹⁹ Iin, ’kaa Siɔn munu lé ka ke é nyanale Jérusalɛm, ka ’ka dan wuvɔ lɛ é dɛrɛ lo. Dé ka siaa Bale lɛ, é dan zin kɛlɛ lɛ ka lɛ; dé é ka dére ’ma tɔɔn, ’té é we é kwakwa.

²⁰ Dé ka a nyané blɛn blena, Mizan é dan fɛblele nɔ lɛ ka lɛ; dé ka a kle blena é dan ’yi nɔ lɛ ka lɛ; wepaakagizannu ’ka dan yɔɔ lɛ ka lee é dɛrɛ lo, naa, munu lé woo we paan ka gi, ka dan wo ye lɛ.

²¹ Dé ka nɔla ka bɛyilaziaoo, dé ka nɔla ka bɛbolaziaoo, dére do é dan we lɛ ka zuo, ’té ka a maan, a fele nya léé: Zi lé ke ’ko, ’ka tawo yee zi ’ko ɛ ta.

²² Gɔɔlifu valé kyan lé ka sele kalé miyilinu ma, ka dan wo ye lɛ fɛ naané nya; ka dan wo vuli lɛ bélé bli zo, yé ka dan a fe lɛ wo lɛ léé: ’Ka si ko yuɛi mi.

²³ Yé Bale é dan lɛɛ da lɛ fɛwɔlɛ lé ka vɔ, a ta, yé kalé tɛrɛ é dan fɛ dɔ lɛ, yé a néné é dan ka bua lɛ, yé a bléyi duo nya kalé trubɛnu é dan fɛ ble lɛ trubɛ blena blɛn na.

²⁴ Dirinu valé sokofalenu lé woo féi paan wo nya, wo dan wɛfɛ ble lɛ; fɛ lé wa fɛɛ diadia valé guli nya, yee lé wo dan a ble lɛ.

²⁵ Yian nya lé wa mi kiɛre gyɛna, ’té kɔn plɛplɛnu éé diaan, ’bɛ yi nya lé ’yi é dan yoro lɛ gɔ torolenu valé gɔpanénu faa nwiin.

²⁶ Gakelebale lé munu lé é wo tuo bɛ, dé é sɔ vuru wo tuona ta, dé é wo tuonanu nyaa, ’té moné bile é dan kɛlɛ lɛ bélé yiri bile zo, yé yiri bile taa é dan pa lɛ fɔɔ gɔnɔ sɔrafié; yi do yiri bile é dan kɛlɛ lɛ bélé yi sɔrafié zé zo.

²⁷ Mi lé wa laan Gakelebale, yee lé é dan bɛ; é si baa, a bli a flina é baba, é a bélé kyɛ blɛn zo. A wɛwɛ a é baba; a nɛnɛ a bélé kyɛ lé éé fɛnu blé, a zo.

²⁸ A fulu a bélé yuu blɛn lé é zana ’é gɔ la, a zo, yé é bɔ mi bɔrɔ ma. É dan bɛnnu va fɛɛ lɛ; alé bɛnnu va fɛɛle ɛ ke mi guru zanale a gi nya. Yé é dan wo drɔ lɛ, bélé woo wisoodrɔfɛ plaan é nɛnɛ la fɛan zo, a zo.

²⁹ Ka dan lɛrɛ vɔ lɛ bélé fɛti kɛlɛzannu zo é béli; ka gi é dan nana lɛ bélé mi lé ke tawona béli fɛnle yɛrama, a zo, ka gole Gakelebale lé gɔ ma we ma, ka gole Izraɛl lé gɔlɛ ma we ma.

³⁰ Yé Gakelebale é dan élé tun dɔ mi gi dére we lɛ, a bli flile baba zama; a bɛ lé ke é nwale migyɛfɛ nya, é dan a nagɔɔn lɛ kyɛnɛnɛ lé éé fɛ blé, a méléna, yuu bɔrale é gɔ la koo, fu plɛplɛ giéle koo, goowɔlɛlɛɛ koo, wo méléna.

³¹ Asirinu ma é dan nyɔɔn lɛ Gakelebale dére ’male lee; Gakelebale é dan wo bla lɛ élé vlewɔlɛ nya.

³² Dé Gakelebale vlewɔlɛ duun do a blale yɛrama, wo dan flin valé kɔnɔ vun ’ma lɛ a gi; Gakelebale é dan guli dan lɛ a va é bɛ nwale nya.

³³ Maa miyilibanna ma’lɛrɛ ana mɔn Tofɛt; a ma a é ’lɛrɛle Asirinu nwiinzan lé we ma. A guru a, yé a laala a blɛn yé maa kyɛ zén yee miyilibanna ta di; maa, Gakelebale, maa dan kyɛ vɔ lɛ a ’léé an flin fu nya bélé povun kyɛ blɛn zo.