Ézai 3 - Kazambale lé Sebe Sauunu 1979

Jérusalɛm bɔ gyɛ

¹ Fɛnu faa lé mi éé paan a ta, é valé wolé fɛ faa pun sina, Mizan, lai sunyanu lé Gakelebale é dan wo si lɛ Jérusalɛm munu valé Juda munu lee. Wolé fɛblele sinanu faa koo, wolé ’yi’wuonu faa koo, Gakelebale é dan wo si lɛ wo lee.

² Nyanazannu koo, gulidanzannu koo, weblezan valé balelayezan koo, ’monédɔzan valé mi segele koo,

³ mi yɔ fié wɔlɛ vu nwiinzan valé flanwiinzan koo, weplamilɛzan koo, blabozan baba valé yokɛlɛzan baba koo, é dan wo si lɛ wo lee.

⁴ Maa dan pɛniɛnu kɛlɛ lɛ wo nwiinzannu nya, yé nénu é dan pla lɛ wo nwiin.

⁵ Yaale mi ta é dan kɛlɛ lɛ munu méléna. Wo dan yaa lɛ wo ke ta, yé mi faa do do é dan yaa lɛ é bɔluzan ta. Pɛniɛ é dan guli vɔ lɛ mi segele lɛ, yé boazan é dan guli vɔ lɛ tɔzan lɛ.

⁶ Mi do é dan é bwe tunu lɛ é ti lé kɔn gi, a fele nya léé: Sɔ a i lee, ’i kɛlɛ ko nwiinzan nya; ’i we sɛrɛle ’konu si i nwiinkɔné nya yé ’i wo ma’lɛrɛ.

⁷ ’Bɛ yi duo la é dan a zi pa lɛ a lɛ léé: Maa ’ka ka bélizan nya lo; fɛblele valé sɔ ’ka anlé kɔn gi lo. Té ka an kɛlɛ minwiinzan nya lo.

⁸ Jérusalɛm guru zana a gi yé Juda tɛrɛ sɛrɛ; naa, wo péli vɔ Gakelebale ma wo dére valé wo kɛlɛwenu nya, yé alé fuasan ’ka kana zén‐é wo gi lo, azama.

⁹ Wo yara dɔbɛ éé wo ma we fé, yé wo ’wolé wenyané zana dɔɔan bélé Sɔdɔm munu zo, yé wo ’ka a ta yɔɔan lo. Wa we tɔntɔnnu ma’lɛrɛna ’wobo lɛ, amalé wo gale nyɔ.

¹⁰ ’Ka fe léé, mi tegele bɛ ma é dan kɛlɛ lɛ néné; a gi é dan nana lɛ é kɛlɛwenu tɔnɔ ma.

¹¹ Mi nyanénu gale nyɔ; wolé we ’ka dan vɔ lɛ a ma lo, naa, wo dan ’wo panyanama ma ban ye lɛ.

¹² Nénu éé yaan anlé munu ta yé lomu a é plale wo nwiin. Anlé munu, kalé zigɔɔnzannu a ka saanna, yé zi lé ka ke tawona a ta, wa sɛrɛna.

Bale élé munu lé we ble

¹³ Gakelebale da ézé fe lɛ, é nwa munu lé we blele we ma.

¹⁴ Gakelebale a weblena élé munu va mi segelenu valé wo nwiinzannu va; é léé: Ka dɔrɔféi ble. Fɛnu lé ka si nyanégyɛzannu lee gla nya, wa kalé kɔnnu gi nuu.

¹⁵ De ɛ se kɛlɛ ka lɛ, ka anlé munu zɔn ka gane nya, ’té ka nyanégyɛmunu yuɛi kyɛ dɔaa? Mizan, lai sunyanu lé Gakelebale ɛ fe.

¹⁶ Gakelebale léma: Siɔn lomu a boblɛnzannu nya, yé woo tawoo ’wo bɔrɔ séléblaané soile nya, ’té wo yuɛ la galaan; woo tawoo ’nyané nyané ’nyané, ’té wo gane ma zowoloné éé wé;

¹⁷ bɛwemalé Mizan é dan Siɔn lomu gyɛ lɛ palo nya, Gakelebale é dan wo poro lɛ.

¹⁸ ’Bɛ yi la gane ma zowoloné koo, gane ma séli valé gane ma kyannu koo, Gakelebale é dan wo si lɛ wo ma;

¹⁹ Tɔné ma kyan koo, bɛ ma kyan valé ’wuomasɔnu koo,

²⁰ ’wuo ma kyanbalenu koo, gane ma kyanbalenu valé kyɛsidinu koo, lasikɔrɔ kuonénu valé sɛbɛwɔlɛnu koo,

²¹ bɛmakyannu valé nyémakyannu koo,

²² sɔwezannu valé varɔ grɔgrɔnu koo, varɔ blɛnnu valé fɛpabalanu koo,

²³ vlinvlinnu valé varɔ yéréyérénu koo, ’wuo ma nɔɔnnu valé ’wuomasɔ torolenu koo, Mizan é dan wo faa si lɛ wo lee.

²⁴ Fɛvɔnle gin é dan kɛlɛ lɛ lasikɔrɔ pa gi; gyɛla é dan kɛlɛ lɛ kyɛsidi pa gi; palo é dan dɔra lɛ nwintanle pa gi; bɔlɔ prɔɔné é dan kɛlɛ lɛ varɔ blɛn pa gi; wo dan tɔmase pa lɛ wo ma kyɛ nya, wo nɔnɔmi pa gi.

²⁵ Ilé gɔnénu é dan dia lɛ gwɔun ’léé; guli é dan kalé nyanazannu gyɛ lɛ.

²⁶ Siɔn flagɔrɔ ’léé wo dan dunnu lɛ yé wo dan gyɛ bo lɛ; Siɔn munu é dan nyana lɛ tɛrɛ va wo leekoro nya.