Ézai 29 - Kazambale lé Sebe Sauunu 1979

We lé é dan bɔ lɛ Jérusalɛm ma

¹ Ariɛl, fla lé David a kɛlɛ é nyanana nya, we tɔntɔn ’é kɛlɛ a lɛ ma. ’Ka vo fɛtinu kɛlɛna lɛɛ ma lɛɛ ma; ’ka wo lɛ sɔɔ yé ’ka péli bɛ sia ma.

² Maa dan Ariɛl mabɛn lɛ. Wo dan wuvɔ lɛ yé wo dan dunnu lɛ, yé fla ’ko é dan kɛlɛ lɛ an lɛ bélé balebanna lé wa laama Ariɛl, a zo.

³ Maa dan sunyanu nyana lɛ i zi fɛfaana; maa dan sunya palunu dɔ lɛ i zi; maa dan tɛrɛ zun dɔ lɛ gulidanmunu dɔlafɛ nya.

⁴ Maa dan i zun lɛ, yé i dére é dan we lɛ tɛrɛ va; yé maa ’ka dan a ’ma lɛ tegele lo. I dére é dan bɔra lɛ tɛrɛ gi bélé miléli dére zo, yé i dan gun gyɛ lɛ vun va.

⁵ I nyanézannu é dan kɛlɛ lɛ di bélé vun zo. Gulidanzannu ’ko, wo dan kɛlɛ lɛ kiɛre bélé ’sapɛɛ lé fu a sié, a zo, yé ’bɛ é dan bɔra lɛ wo ma fiaa bléyi do kpen nya.

⁶ Lai sunyanu lé Gakelebale é dan da lɛ ka va, ’té zagelenu éé baan, ’té tɛrɛ ma éé nyɔɔn‐an yé ’té vun blɛn éé wé, ’té barikoko valé fu blɛnblɛn éé giéan, ’té kyɛnɛnɛ éé fɛnu blé.

⁷ Bɛn kiɛrenu lé wo dan guli dan lɛ Ariɛl va, yé wo guli vɔ yee valé élé fɛna plɛplɛ lɛ, ’té wa fɔnɔ bɛ, wozé é dan kɛlɛ lɛ bélé nyɛgyɛle zo é béli.

⁸ Mi lé lɔrɔ ke a gyɛna, yé é a ye nyɛfla léé, é fɛ ble, ’bɛ zuo é vuo, ’té a bɔn gi a é pla; mi lé ’yiminilɔrɔ ke a gyɛna, yé é a ye nyɛfla léé, ’é ’yi mini, ’bɛ zuo é vuo, ’té a lai a é gale, bɛn kiɛre lé wo dan guli dan lɛ Siɔn gɔ ma munu va, wozé é dan kɛlɛ lɛ bélé ’bɛ zo.

Wo tɔné sia welɛkini dérenu ta

⁹ Kwakwa ’é vɔ ka ta yé ka gi ’é vuru; ’ka yuɛ lɛ tan, ka yuɛ ’é ’wii; glinni vɔ wo ’wuo gi, naa, nwɛ pagi kaan lo; woo vɔa dada, naa, dɔrɔ ’lɛ plɛplɛ pagi kaan lo.

¹⁰ Naa, Gakelebale é dan yi vɔ lɛ ka yuɛ la, ’bɛzama. É kalé balelayezannu yuɛ lɛ tan yé é sɔ zén kalé fɛnayezannu ’wuo ma.

¹¹ We faa lé maa a gɔɔnma ka lɛ, é a bélé sɛbɛ lé wa ’léé béé, a giwe zo; dé wa nɔ sɛbɛdɔɔzan lɛ, dé wa fe a lɛ léé, bé ta fe, é dan a fe lɛ léé, an ’ka bɔa a tafele lɛ lo, wa ’léé béé, azama.

¹² É ziin, é a bélé sɛbɛ lé wa nɔ mi lé é ’ka bɔa sɛbɛ tafele lɛ lo, a lɛ, a zo; dé wa fe a lɛ léé, bé ta fe, é dan a fe lɛ léé, an ’ka sɛbɛ dɔɔa lo.

¹³ Mizan léma: Dé munu ’ko bié an sɔnɔ, woo an tɔ bɔa ’wo ’léé valé ’wo lɔlu nya, naa, wo bli a é sile an ma baa, yé kana lé wa wo an lee, é a munu lé gɔnɔlawe nya é pla.

¹⁴ Bɛwemalé maa dan munu ’ko bla lɛ é ziin we blɛnblɛnnu valé gyɛzorowenu kɛlɛle nya; wolé wedɔɔmunu lé wedɔɔle é dan nyaa lɛ, yé wolé ’wuoatazannu lé ’wuoatawe é dan san lɛ.

Bli vole bléyi voéla lɛ

¹⁵ Munu lé wo ’wo bɔn‐in danmawe kɛlɛ kyeen gi a yɔɔle Gakelebale lee we ma, ’té wo ’wolé we kɛla gunutinu va, ’té wa fé léé, de ɛ ’wo yee? de ɛ ’wo dɔɔ? we tɔntɔn ’é kɛlɛ wo lɛ ma.

¹⁶ Ka a Bale lé zi gisɛrɛzannu nya. Bɔdɔzan valé bɔtɛrɛ lé we bɔ ékemaa? Gba. Fɛ a fé ’é kɛlɛzan ma léé, é ’ka ’é kɛlɛ lɛ loo? Yé bɔ a fé ’é dɔzan ma léé, a ’wuo ’ka a ta loo?

¹⁷ É vo bléyi sɛ nya yé Liban gɔ é dan nɔla lɛ tɛrɛ lé éé fɛ dɔa di, a nya, yé ’bɛ tɛrɛ é dan kɛlɛ lɛ bélé pɔrɔ lé a gi gunu ke, a zo.

¹⁸ ’Bɛ yi la, tɔnéwiizannu é dan sɛbɛ gi dérenu ’ma lɛ yé gunu ’ka dan kɛlɛ lɛ yuɛwiizannu yuɛi é dɛrɛ lo, yé wo dan yɛrɛ ye lɛ.

¹⁹ Wenaanébɔmazannu gi nanale lɛ é dan si lɛ Gakelebale lé we ma, yé Izraɛl lé Mi Sauun é dan kɛlɛ lɛ nyanégyɛzannu lé ginanamazan nya.

²⁰ Naa, glazan ’ka dan kɛlɛ lɛ ana é dɛrɛ lo, wenanazannu é dan nyaa lɛ; munu lé woo voo é yuɛma weple kɛlɛle we ma, wozé glɛ é dan dɔ lɛ.

²¹ Munu lé woo we dɔa mi bɛnu nwiin weblena, ’té woo diaan dɔmizuozannu zi flagɔrɔ ’léé, ’té woo weanwiinlozannu lé se sié wo lee dabli nya, woo lé.

²² Bɛwemalé Gakelebale lé é Abraam tabo, é lé Jakɔb kululazannu lɛ léé: Sin, Jakɔb yuɛ ’ka dan tana lɛ é dɛrɛ lo. Sin, a yara nyɔnɔ é dan kɛlɛ lɛ ana yifaama.

²³ Naa, dé alé nénu an panyanama ye ’wo va, wo dan kana lɛ an tɔ ma, wo dan Jakɔb lé Mi Sauun kɛlɛ lɛ lɛamazan nya, yé wo dan kana lɛ Izraɛl lé Bale lee.

²⁴ Munu lé saanbli ke wo gi, wo dan kɛlɛ lɛ ’wuoatazannu nya, yé wo dan we paa lɛ gungyɛmunu gi.