Ézai 28 - Kazambale lé Sebe Sauunu 1979

Bale we lɛ kini yirinwana bɛbolazia munu, Izraɛl lɛ

¹ Éfraim munu, nwɛgyɛzannu lé tɔkoro nɔnɔmi, we tɔntɔn kɛlɛ i lɛ. Bɛn ’ko, a vwi lé ke a ’lɛrɛfɛ nya, ’té a ma éé yuruan bɛ, ’té é ke é plale nwɛtanzannu lé pɛnguru gi tɛrɛ nyɔnɔzan nwiin bɛ, we tɔntɔn kɛlɛ a lɛ.

² Ka yua, mi plɛplɛ lé Mizan a pa zia, yee lé é dan bɛ; é a dana bélé goowɔlɛlɛɛ dale zo, bélé fɛsɛrɛfu plɛplɛ zo, bélé lɛɛ blɛn lé é da yé é ’yiyoro kiɛre so, a zo. Bale tɔkoro ’ko dia tɛrɛ va gla nya.

³ Éfraim munu, nwɛgyɛzannu lé tɔkoro nɔnɔmi, munu é dan a zɔn lɛ ’wo gane nya,

⁴ yé a vwi lé ke wo ’lɛrɛfɛ nya, ’té a ma éé yuruan bɛ, ’té é ke é plale pɛnguru gi tɛrɛ nyɔnɔzan nwiin bɛ, é dan kɛlɛ lɛ bélé bɔrɔyili poro lé é tana é bɔlunu ’lɛ, ’té dé é dia tɔɔn, ’té wa ble é kwakwa, a zo.

⁵ ’Bɛ yi la, lai sunyanu lé Gakelebale é dan kɛlɛ lɛ tɔkoro lé éé bié planplan, ’bɛ valé ’lɛrɛfɛ nɔnɔmi nya, élé munu pɔnénu lé wo vo, wo lɛ.

⁶ É dan we tegele kɛlɛbli vɔ lɛ, munu lé wo ke é nyanale weblena, wo gi; é dan plɛplɛ nɔ lɛ munu lé wo ’wo nyanézannu nyunu fɔɔ yé wo bɔ wo nya wolé flagɔrɔ ’léé, wo lɛ.

Ézai valé nwɛ gyɛ balelayezannu

⁷ Naa, Juda munu é ziin, wo dan vɔ lɛ dada nwɛ lé we ma, yé dɔrɔ ’lɛ plɛplɛ é dan wo yuɛgi nɔɔ lɛ. Balebanzannu valé balelayezannu, wo dan vɔ lɛ dada dɔrɔ ’lɛ plɛplɛ lé we ma. Nwɛ bɛn mini wo lɛ yé dɔrɔ ’lɛ plɛplɛ éé wo yuɛi nɔɔan. Woo balelawe fé dan dan dan; woo we blé yuɛgi blan nya.

⁸ Tablénu faa ta a é sɔɔlale munu féé valé fɛvoronu nya; fɛ zinna ’ka é dɛrɛ lo.

⁹ Wo léé: Woo we paan mi kyɛn gi yé é we dɔɔ? Woo we plaan mi kyɛn ɛ lɛɛ? Nénu lé wo si nyɔ ma é dɛrɛ, ’té wo si ’wo bu ma é dɛrɛ, wo léé?

¹⁰ Ézai lé ko lɛ léé, té bé kɛlɛ lo, té bé kɛlɛ lo, ’té éé a fé léé, bé kɛlɛ, bé kɛlɛ, gba gba, ma ma, ta ta.

¹¹ Eɛ, munu lé woo we fé bélé nunu zo, ’té wo dére a bɛn bɛ dére nya, Gakelebale é dan we fe lɛ munu ’ko lɛ wo lɔlu nya.

¹² Gakelebale a fe wo lɛ léé: Flinle lo; mi lé a wɔlɛ gi nyaa, ’bé vo, ’é flin; flinna lé ke ’ko. Naa, é ’ka sɔ lɛ wo lɛ léé, ’wo tɔné dɔ lo.

¹³ Weboen lé, wo Gakelebale dére ’ma ’wo vazia léé, té bé kɛlɛ lo, té bé kɛlɛ lo, bé kɛlɛ, bé kɛlɛ, gba gba, ma ma, ta ta, wolé tawole yé wo dia ’wo bani ma we gi, yé wo wɔlɛ ’wii wo gi, wo kunle valé wo yerele we gi.

¹⁴ ’Kaa lé ka ke é plale Jérusalɛm munu nwiin, mimawenanazannu, ’ka tɔné dɔ Gakelebale dére lɛ.

¹⁵ Ka léé, ’wo gi pa do ga va, ’wo kɛlɛ do mipagurunu nya; dé migyɛgyɛ bɔ mi kiɛre ma, é ’ka dan bɔ lɛ ’wo va lo; naa, dabli kɛlɛle a ’wo yɔɔna nya, yé viéwole a ’wo tayɔɔfɛ nya, azama.

¹⁶ Bɛwemalé, Mizan Gakelebale léé: Ka ye, maa Siɔn gane vɔ gɔlɛ do nya. Wo gɔlɛ ’ko nagini, yé wa ye kɔnsungɔlɛ zin nya yé é a é vɔle gligli. Mi lé é gɔlɛ ’ko si ’é dɔlafɛ nya, é ’ka dan fwi lɛ lo.

¹⁷ Maa dan we drɔle kɛlɛ lɛ yili drɔle prɔɔné nya, yé maa dan we tegele kɛlɛ lɛ fɛ danmabawɔrɔ nya. Dabli kɛlɛle lé ke ka yɔɔna nya, goowɔlɛlɛɛ é dan ’bɛ sɛrɛ lɛ. Viéwole lé ke ka tayɔɔfɛ nya, ’yi blɛn é dan zén lɛ ’bɛ ta.

¹⁸ Ka gi lé ka pa do ga va, maa dan ’bɛ sɛrɛ lɛ. Ka ’ka dan nana lɛ mipagurunu nya é dɛrɛ lo. Dé migyɛgyɛ da é dan ka ’wii lɛ.

¹⁹ É dan gié lɛ yifaama, bladi nyanadi. Bléyi faa do do lé éé giéan, éé ka kunwo, dé ka gun ’ma é pla, kana é dan zén lɛ ka gi.

²⁰ Yialasaa é dan kɛlɛ lɛ kpégéléné, mi lé é yia a ta, a ma; mi tasɔ é dan kɛlɛ lɛ kpégéléné, é ’ka sɔa mi ta lo.

²¹ Naa, Gakelebale é dan nwa lɛ, é nwa Pérasim gɔ ma fɛan zo, a zo. A bli é dan fli lɛ, a bli fli Gabaɔn pɛnguru gi fɛan zo, a zo. We lé é dan a kɛlɛ lɛ, ’bɛ a ’é bɛ; nyanama lé wo ’ka a gi maan lo, yee lé é dan a pa lɛ.

²² Sin, té kabo nɔ mimawenanale lɛ lo, dé é da ka yerebale fɔnɔ ka ma. Naa, é a Bale gi léé, é dan tɛrɛ ’ko faa sɛrɛ lɛ; maa ’ma Mizan, lai sunyanu lé Gakelebale ta a zo.

Bale lé wedɔɔle

²³ ’Ka an ban ka tɔné nya, ’ka an dére ’ma. ’Ka tɔné dɔ, ’ka an dére ’ma.

²⁴ Mi lé ke gona fɛwɔlɛ vɔna, éé bwi woo yifaamaa? Éé tɛrɛ fun‐aan yifaamaa?

²⁵ Dé ana bɔ ékema faa, é ’ka ’sa nwɛɛn‐an goo wuo loo? É ’ka vun gya é bale nya yé éé zianbɛ vɔa a ma yé éé buu suruan a glɛ la loo?

²⁶ Alé Bale a kɛlɛbɛ paa a gi, é we ’konu gɔɔn a lɛ.

²⁷ Wo ’ka ’sa sunwo foliɛwɔlɛ nya lo, yé wo ’ka goo zɔn gorogane nya lo. Naa, woo ’sa sunwo yili nya yé woo goo zɔn‐o nwuni nya.

²⁸ Woo buruwɔlɛ sunwo, naa, wo ’ka voo a sunna yifaama lo. Wa sunwo gorogane valé wisoo nya, naa, wo ’ka a wɔlɛ wiima lo.

²⁹ ’Bɛ é ziin, ’bɛ si lai sunyanu lé Gakelebale va; alé weplale mi lɛ a zevɔwe nya; alé wedɔɔle a blɛn.