Ézai 27 - Kazambale lé Sebe Sauunu 1979

¹ ’Bɛ yi ’ko la, léviatan lé ke bélé yiripan zo élé tawole fiéfié nya, Gakelebale é dan a gyɛ lɛ élé gwɔun yuyu plɛplɛ blɛn nya. Léviatan lé éé tawoo é plinle nya bélé ménénwunnu zo, é dan a gyɛ lɛ; wi blɛn lé ke wɛyi va, é dan ’bɛ gyɛ lɛ.

² ’Bɛ yi la, dɔrɔféi lé éé dɔrɔ zin no, ’ka a tɔ vɔ lɛrɛ nya.

³ Maa, Gakelebale, maa ɛ ke a tabinzan nya. An ’yi zén‐é a ta bléyi faa va, an yuɛ paan a va é yiéyi valé é béli, dé wo da a sɛrɛ.

⁴ ’Bɛ ’ka ’nana an ma lo, naa, dé maa ka ye danan valé léliyilinu nya, maa dan guli dan lɛ ka va; maa dan nwa lɛ ka ma, yé maa dan ka faa kyɛ ble lɛ ékeva,

⁵ ’té dé ka ’ka an si lɛ ka yɔɔna nya lo, yé kaa nana lo, yé kaa nana lo.

⁶ Bléyi do é dan bɔ lɛ yé Jakɔb suni é dan wɔra lɛ, Izraɛl punla é dan fɔn lɛ é ta yé a vwi é dan bi lɛ, yé a poro é dan tɛrɛ la ble lɛ.

⁷ Gakelebale élé munu bla, bélé fɛan zo lé é wo blazannu bla, a zoo? É wo gyɛ, bélé fɛan zo lé é wo gyɛzannu gyɛ, a zoo?

⁸ Gba, é we lɛdɔ wo gi wo vole lula nya; é go wo nya yirinwanazia fu plɛplɛ giéle nya.

⁹ ’Bɛ zo lé Bale é dan Jakɔb lé wenyané ’yibo lɛ; a ma we vole alé wenyanénu ma tɔnɔ é dan kɛlɛ lɛ ’ko zo: é dan yobannanu lé gɔlɛnu kɛlɛ lɛ é vun nya; Asataté miyilinu valé yiribɔnu, wo ’ka dan nwa lɛ é dɛrɛ lo.

¹⁰ Naa, mi do kpen ’ka fla plɛplɛ ta é dɛrɛ lo, é a é koro nya yé ana vo bélé bwi zo. É dan kɛlɛ lɛ diriné blena nya, éé yian ana ’té éé yilibɛnu laanu blé.

¹¹ Dé yilibɛnu ga, woo wo yélié yé lomu é da wo sɔn kyɛ nya. Munu ’ko ’wuo ’ka wo ta lo; amalé mi lé é wo kɛlɛ, a nyanai ’ka zén‐é wo ta lo. Mi lé é wo bɔra, é ’ka zin kɛlɛ lɛ wo lɛ lo.

¹² ’Bɛ bléyi va Gakelebale é dan yilinu nyɔɔn lɛ yé wo poro é dan dia lɛ; é sia yuu yorole ma fɔɔ Éjipiti lé yuu blɛn va, ’kaa Izraɛlnu, é dan ka sia lɛ do do.

¹³ A yi la, wo dan béli blɛn fɛn lɛ, yé munu lé wo vo lu la Asiri tɛrɛ la, ’bɛ valé munu lé wo yɔɔ Éjipiti tɛrɛ la, wo dan da lɛ yé wo dan dia lɛ ’wo bli la Gakelebale ’lɛ, gɔ sauun nwiin, Jérusalɛm.