Ézai 26 - Kazambale lé Sebe Sauunu 1979

Bale é dan guliwuo nɔ lɛ élé munu lɛ

¹ ’Bɛ yi la wo dan lɛrɛ vɔ lɛ Juda tɛrɛ la léé: Kolé fla plɛplɛ a; É a gɔrɔ kɛlɛ blɛn ko takuunfɛ nya.

² Wo flagɔrɔ lɛ so, ’Ka zi nɔ yarapawela bɛn tegele lɛ léé, ’wo wɔra.

³ Mi lé a bli ta ke plɛplɛ, I vole drɔɔ nɔ a lɛ. É pa bii ɛ ta, amalé é dan vo lɛ drɔɔ.

⁴ ’Ka pa Gakelebale ta, té ’bɛ glɛ é dɔ lo, Naa, Gakelebale a gɔlɛgɔ nya lɛɛfaama zé nya.

⁵ Munu lé woo nyanaan loru, é wo zana a gi, Yé fla lé a tɔ ke blɛn, é a zun, É a zun fɔɔ tɛrɛ va, É a kɛlɛ vun nya.

⁶ Wo dan a zɔn lɛ ’wo gane nya, Nyanégyɛmunu gane nya, nyanaizénlamunu gane nya.

⁷ We drɔle a mi tegele lé zi nya; Bii lé i ke tegele, i mi tegele lé zi ta bɔa ékema.

⁸ Gakelebaleoo Gakelebale, ko a i lɛbɛnna é ziin, ilé weblebɛ yɛrama. I sele ’é dɔ ko gi, i tɔ lɔrɔ ma lé ko flin‐é.

⁹ I lɔrɔ an boen gya béli tu la, An gi mi, an léli i ginian; Naa, dé i a we blena tɛrɛ la, Tɛrɛlamunu é dan we tegele dɔɔ lɛ.

¹⁰ Dé wo zin kɛlɛ mi naané lɛ, é ’ka we tegele dɔɔa a gi lo, É ébo no wenaané lɛ we drɔle kɛlɛtɛrɛ la, Yé Bale kɛlɛle blɛn ’ka a yuɛ gi bɔa lo.

¹¹ Gakelebale, i bɛ a plɛplɛ; Wo ’ka a gi dɔɔa lo. I fuu a i ta fɛan zo ilé munu mawe kɛlɛna, wo dan a ye lɛ yé ’bɛ é dan wo gyɛ lɛ yara nya; Kyɛ é dan i nyanézannu ble lɛ.

¹² Gakelebale i vole drɔɔ no ko lɛ; Naa, we faa lé ko kɛla, Bii ɛ ke a lɛsɔɔzan nya ko lɛ.

¹³ Gakelebale, kolé Bale, mi bɛnu pla ko nwiin turu, ’té bii ’ka ko nwiin lo, Naa, bii do kpen lé zin ma lé ko i tɔ laan.

¹⁴ Munu lé wo ga, wo ’ka vuoma é dɛrɛ lo; Munu lé wo go, wo ’ka nɔla é dɛrɛ lo; Naa, bii ɛ we lɛdɔ wo gi, bii ɛ wo kulu ga, Bii ɛ wo sele faa saan munu gi.

¹⁵ Gakelebaleoo Gakelebale, ’i munu kɛlɛ kiɛre; ’I munu kɛlɛ kiɛre, ’i tɔbɔle nagɔɔn, ’I tɛrɛ glɛ faa buru so é zuo.

¹⁶ Dé kleblele bɔ munu ma, wo i nagini; Dé i we lɛdɔ wo gi, wo kun bazorole ma.

¹⁷ Oo Gakelebale, dé ko a é sile i ma baa, Ko a bélé bɔnzan lé é vɔ lu zi, ’Té éé plɛn‐an, ’té éé siaan nyanéblele nya, a zo.

¹⁸ Ko bɔn si yé ko vɔ lu zi, Naa, dé ko né yaa, é kɛlɛ fu nya é pla. Munu ’ka si lɛ we gi lo, Yé munu taa ’ka pa lɛ lo.

¹⁹ Amalé, ’ilé migalenu vuo ma; ’I anlé migalenu nwa ma. Ka lé ka ke vun va, ’ka vuo, ka gi ’é nana, Naa, Bale lé fli a mivoéyuɛma fli nya, Yé é dan vɔ lɛ migalenu ta.

Weblele valé wenu dɔle ’wo pa gi

²⁰ Anlé munu, ’ka go kalé kɔn gi, ’ka kɔn lɛ tan ka zuo; ’ka yɔɔ bléyi sɛ nya, fɔɔ yé bliflile é gié.

²¹ Naa, ka ye, Gakelebale nwa é nyanana yé é dan we lɛdɔ lɛ tɛrɛlamunu gi wolé wenyané blɛnnu ma, yé tɛrɛ é dan mi nyɛ zanale ta bɔra lɛ; é ’ka dan migyɛle yɔɔ lɛ é dɛrɛ lo.