Ézai 25 - Kazambale lé Sebe Sauunu 1979

Bale tɔbɔ lɛrɛ

¹ Gakelebaleoo Gakelebale, i a anlé Bale nya; Maa dan i kɛlɛ lɛ blɛn, ’té maa i tɔ ma gya, Naa, i migisanmawenu kɛlɛ; Wenu lé wo dɔ i gi a bléyi ’lɛ, i wo lɛ sɔɔ yarapalale nya.

² Naa, i fla kɛlɛ gɔlɛzun nya, I fla plɛplɛ kɛlɛ é ’bin nya; Bɛnnu lé fla plɛplɛ guru zana a gi, Wo ’ka dan a pa lɛ é pa gi pelo.

³ Bɛwemalé mi plɛplɛnu i tɔ kɛlɛ blɛn, Yé bɛn plɛplɛnu lé flamunu kana i lee.

⁴ I kɛlɛ mi tɔɔtɔɔnu yɔɔna nya, Nyanaizénlamunu lé we tɔntɔn bɔ wo ma, i kɛlɛ wo yɔɔna nya. Munu vɔ i zi fu plɛplɛ giéle valé lɛɛ plɛplɛ dale we ma; I kɛla furɔ nya kyɛyee bɔ bléyi va; Naa, yaamitazannu lé fu fɛɛle A bélé fu plɛplɛ lé éé gɔrɔ zanaan, a zo.

⁵ I kyɛyee bɔle mi ma yi gaan tɛrɛ kyɛdɔle ta fɛan zo, A zo duo lé i boblɛnmunu lé fla bɔgyɛle yi gaan. Lafu lé furɔ éé kyɛyee bɔle keleé fɛan zo, A zo duo lé i kɔlɔ dɔa yaamitazannu lé guliwuovolɛ lɛrɛ vɔle gi.

Bale a fɛti ma’lɛrɛna

⁶ Lai sunyanu lé Gakelebale a fɛti ma’lɛrɛna munu faa lɛ, gɔ ’ko nwiin; nɛnɛ mlanvɔfɛnu koo, dɔrɔ kwa koo, wi zunnu koo, dɔrɔ kwa sésé koo, wo faa lé é a ma’lɛrɛna a fɛti kɛlɛfɛ nya.

⁷ Sɔ lé ke é zénle munu faa ’wuo ma, gyɛbosɔ lé ke é zénle bɛnnu faa ta, Bale é dan a si lɛ wo ta gɔ ’ko nwiin.

⁸ É dan gale yi ga lɛ lɛɛ faa zé nya ’té; Mizan Gakelebale é da mi faa yuɛyi si lɛ ’wo yara nuu; é dan yaragyɛwe si lɛ élé munu ’wuo ma tɛrɛ faa la. Naa, Gakelebale ɛ fe, azama.

⁹ ’Bɛ yi la, wo dan a fe lɛ léé: Ka ye, ko pale a kolé Bale ’ko, yee ɛ ta, yee ɛ ko sié we gi; ko pale a Gakelebale ’ko, yee ɛ ta; kaa gi ’é nana ma, ko gi ’é nana alé ko sile we gi we ma.

Bale é dan we lɛdɔ lɛ Moab gi

¹⁰ Naa, Gakelebale bɛ nyané a gɔ ’ko ɛ ta; wo Moab zɔn ’wo gane nya fɛ ’ko ɛ na, fɛan zo lé woo lɔɔ zɔn‐o ’wo gane nya kɔn fwina, a zo.

¹¹ ’Bɛna lé é dan é bɛ soi lɛ bélé ’yisizan éé ’yi sié fɛan zo, a zo. Naa, Gakelebale é dan alé boblɛn yi ga lɛ yé san lé é a vɔ nuu, é dan a sɛrɛ lɛ.

¹² É dan ilé gɔrɔ grɔgrɔ plɛplɛ dia lɛ; é dan a ’wii lɛ tuuntuun fɔɔ yé a vun é dɔ guru gi.