Ézai 24 - Kazambale lé Sebe Sauunu 1979

Bale é dan we lɛdɔ lɛ tɛrɛ la bɛnnu gi

¹ Ka ye, Gakelebale é dan ’wii lɛ Juda tɛrɛ la yé é a kɛlɛ bwi nya; é dan a yara bua lɛ yé é ana munu ta saan.

² Balebanzan zé é dan kɛlɛ lɛ bélé munu zé zo; minwiinzan zé é dan kɛlɛ lɛ bélé mi wuozan zé zo; minwiin le zé é dan kɛlɛ lɛ bélé mi lee le zé zo; fɛdanzan zé é dan kɛlɛ lɛ bélé fɛlɔzan zé zo; drɔnpamimazan zé é dan kɛlɛ lɛ bélé drɔngyɛzan zé zo; vɛɛnpamimazan zé é dan kɛlɛ lɛ bélé vɛɛnsizan zé zo.

³ Wo dan ’wii lɛ tɛrɛ ta, wo dan fɛ si lɛ gla nya. Gakelebale léé, ’é kɛlɛ a zo, amalé é dan kɛlɛ lɛ.

⁴ Tɛrɛ ’ko kyɛ é dan dɔ lɛ yé é dan nyaa lɛ. Ana munu plɛplɛ zana a gi yé wo yuɛgi zun. Mununwiinzannu lé plɛplɛ ’ka lo.

⁵ Ana munu tɛrɛ sɛrɛ, naa, wo bélidɔwenu sɛrɛ, yé wo Bale déretawenu lɛgama, gipawe lé a glɛ ’ka lo, wa sɛrɛ, azama.

⁶ Amalé bale pale wo ma é dan wolé tɛrɛ sɛrɛ lɛ, yé ana munu é dan ’wolé wenyané ma ban ye lɛ; bɛwemalé tɛrɛ é dan ana munu ble lɛ yé wo ’léé é dan vo lɛ kiéné.

⁷ Dɔrɔ dɛrɛ a wuvɔna, dɔrɔyili ma yuru; munu lé wo gi ke é nanale turu, wa bawuruma flinna.

⁸ Flin gyɛle ginanale nya nyaa, ginanale vun wele nyaa, kɔnɔ gyɛle ginanale nya nyaa.

⁹ Wo ’ka nwɛ minian lɛrɛ vɔle nya é dɛrɛ lo; dɔrɔ plɛplɛ a kɔnɔn zo é minizan ’léé.

¹⁰ Fla lé mi ’ka a ta é dɛrɛ lo, é vo é ’bin nya; kɔn faa ’léé lɛ a é tanle, mi ’ka wɔraan a gi é dɛrɛ lo.

¹¹ Nwɛ ’ka lo, amalé wa wuvɔna flaworo dii. Ginanale faa san, ginanale yi a é gale ana tɛrɛ la.

¹² Fla vo é pla, wo duolinu ’wii yé wo vo é wuli nya.

¹³ É dan kɛlɛ lɛ tɛrɛ ’ko la munu va bélé ɔliviyili lé wa nyɔɔn, a zo, bélé dɔrɔ lé wa poro so, a gɔ ma sole zo.

¹⁴ Munu wo dére nwa, wo siaa ginanale nya; wo Gakelebale kɛlɛle blɛn ze vɔ wɛyi gɔnu la.

¹⁵ ’Ka Gakelebale tɔ bɔ fɛana lé san ke bina, ana; ’ka Gakelebale Izraɛl lé Bale tɔ bɔ wɛyi méléna tɛrɛnu ta.

¹⁶ Ko munu lé lɛrɛvɔle ’ma tɛrɛ glɛ sina yé wo léé: Mi tegele tɔ ’é nwa ma. Naa, maa léé: Maa a é sanleoo, maa a é sanle! We tɔntɔn kɛlɛ an lɛ. Fɛsiéglanyazan, éé fɛ sié gla nya, fɛsiéglanyazan é ébo no élé glawe kɛlɛle lɛ.

¹⁷ Tɛrɛlamunuoo tɛrɛlamunu, dɔnvɔmunu lé plale koo, wigyɛguru koo, séli koo, wo faa a ka ’lɛ.

¹⁸ Mi lé éé vlanburuwo dɔnvɔmunu lé plale lee, é dan dia lɛ guru gi, yé mi lé é si guru gi é dan vɔ lɛ séli gi. Naa, lagi gɔɔn lɛ so, tɛrɛ gane vɔnanu ma nyɔɔn.

¹⁹ Tɛrɛ faa; tɛrɛ ’wii; tɛrɛ vɔ dada;

²⁰ tɛrɛ vɔ dada bélé mi lé nwɛ a gyɛ, a zo; tɛrɛ nano bélé yɔlaban zo. Alé wenyané bɛn dɔ a nwiin; é dia yé é ’ka nwaan é dɛrɛ lo.

²¹ ’Bɛ bléyi va Gakelebale é dan we lɛdɔ lɛ laworona sunyanu gi la gi, yé é dan we lɛdɔ lɛ tɛrɛla minwiinzannu gi tɛrɛ la.

²² É dan wo faa zén lɛ ékeva luu nya bokɔn gi, é dan wo vɔ lɛ bwati gi, yé ’bɛ zuo yi kiɛre nya, é dan we lɛdɔ lɛ wo gi.

²³ Yara é dan moné gyɛ lɛ, yaragyɛwe é dan bɔ lɛ yiri ma; naa, lai sunyanu lé Gakelebale é dan pla lɛ munu nwiin Siɔn gɔ la, Jérusalɛm, ’té alé fuasan éé bié planplan alé mi segelenu yuɛ va.