Ézai 23 - Kazambale lé Sebe Sauunu 1979

É Tii mawe fe

¹ Balelawe lé Ézai a fe Tii ma, yee lo. Taasis lé ’yitagoronu, ’ka wuvɔ. Taasis guru zana a gi; kɔn ’ka ana é dɛrɛ lo, wɔrana ’ka é dɛrɛ lo. Wa sina Kitim tɛrɛ la aan wo, wo we ’ko ’ma.

² ’Kaa wɛyi gɔlamunu lé ka fua ble Sidɔn lé yaawomunu lé woo goo wɛyi ta, ’té woo dan, wolé we ma, kwakwa ’é vɔ ka ta.

³ Wo go ’yi blɛn zi, yé wo da Nil yuu gɔ la ’sa nya, ’té woo gɔɔli yé a ma; fla ’ko a bɛnnu lé flɛi nya.

⁴ Sidɔn munu, yara ’é ka gyɛ. Wɛyi we fe, wɛyi lé plɛplɛ we fe yé é léma: An ’ka tan vɔ lɛ lu zi lo, an ’ka tan né yaa lɛ lo; an ’ka fɛblele nɔ lɛ pɛniɛnu lɛ lo; an ’ka blɛnnu pa lɛ lo.

⁵ Dé Éjipiti munu we ’ko ’ma, dé wo Tii zanale a gi we ’ma, wo ma é dan nyɔɔn lɛ.

⁶ ’Ka go Taasis; ’kaa wɛyi gɔlamunu, ’ka wuvɔ.

⁷ Kalé ginana fla lé ke bɛɛ? Wa pa ana mɔn yé wo go baa nyanana dɛrɛ kɛlɛle we ma.

⁸ Tii lé éé tɔkoro no munu lɛ, ’té yaawomunu ke a nwiinzannu nya, ’té a ta flɛdanzannu fua ble é mini tɛrɛ bɛnu faa ta, de ɛ fe léé, we ’ko é dan bɔ lɛ a maa?

⁹ Lai sunyanu lé Gakelebale ɛ fe, fɛ faa lé woo bié, wolé boblɛn yigale we gi, tɛrɛ la mi blɛnnu faa kɛlɛle kiéné we ma.

¹⁰ Taasis munu, ’ka nɔɔ kalé tɛrɛ faa la bélé Nil yuu zo; ka kɔn ’ka é dɔle é dɛrɛ lo.

¹¹ Gakelebale é bɛ soi wɛyi ta; é a kɛlɛ léé, bɛntɛrɛnu ma ’é nyɔɔn. É a béli dɔ léé, Kanaan tɛrɛ la guliyɔɔkɔnnu ’é zana.

¹² É léé: Sidɔn munu lé ke blɛn sɛrɛle zo, ka gi ’ka dan nana lɛ é dɛrɛ lo. ’Ka nwa, ’ka go Kitim tɛrɛ la. Dé ka go ’bɛna boen‐oo, ka ’ka dan flinle ye lɛ lo.

¹³ Kalidénu lé wo ’ka bɛn nya é vinin lo, ’té woo nyanaan bwi gi yé Asiri mi wolé fla pa, ka ’ka wo yé loo? Wo kɔn torolenu dɔ, yé wo Tii lé fuakɔnnu zana a gi, yé wo wo kɛlɛ é ’bin nya.

¹⁴ Taasis lé ’yitagoronu, ’ka wuvɔ, kalé fla plɛplɛ sɛrɛ, azama.

¹⁵ ’Bɛ bléyi va, munu gi é dan san lɛ Tii ma, lɛɛ yɔ yaa wɔlɛ vu; ’bɛ é dan kɛlɛ lɛ minwiinzan blɛn do plale nya munu nwiin. Lɛɛ yɔ yaa wɔlɛ vu nyaala nya, Tii lé we é dan kɛlɛ lɛ bélé bɔrɔdɛ le lé wa tɔ vɔ lɛrɛ nya, a zo. Wa vɔ lɛrɛ nya léé:

¹⁶ Bɔrɔdɛ le lé wo gi san i ma, ’Ilé kɔnɔ si, ’i gié flaworo dii, Bé gyɛ é zima yé ’i lɛrɛnu vɔ I sele dɔle munu gi we ma.

¹⁷ Lɛɛ yɔ yaa wɔlɛ vu nyaala nya, Gakelebale é dan we kɛlɛ lɛ Tii lɛ; é dan élé nyanama naané ma ban ye lɛ é ziin; é dan élé bɔrɔdɛwe kɛlɛ lɛ tɛrɛ la bɛnnu faa va.

¹⁸ Naa, a gooli valé a banwofɛ lé é a ye élé wenyané ma, é dan kɛlɛ lɛ Gakelebale zé nya, é ’ka dan a téé lɛ lo, yé é ’ka dan a tadɔ lɛ lo. Munu lé woo nyanaan Gakelebale ’lɛ, a gooli é dan kɛlɛ lɛ wolé fɛblele kiɛre valé wo tasɔ nɔnɔmi mafɛ nya.