Ézai 22 - Kazambale lé Sebe Sauunu 1979

É Jérusalɛm mawe fe

¹ Pɛnguru lé woo yuɛzi yé ana, balelawe lé Ézai a fe a ma, yee lo. Jérusalɛm munu, mɛ we ɛ bɔ yé ka faa é go kɔn nwiin?

² Fla bɔ gyɛ, ’té a vun éé wé, ’té a tamunu gi éé nanaan. Ilé munu ’ka dan zamaga wo lɛ gwɔun koo, gulidanmunu koo, wo lee lo.

³ Ilé zilɛmunu faa wo dan vɔ lɛ fli gi ékeva é pla, ’té wo ’ka sa gana lɛ wo ma lo. Dé i tamunu vɔ fli gi baaoo, wo dan wo faa kun lɛ luu nya duowo.

⁴ Bɛwemalé maa léé: Té ka an nagini lo; ’ka an vo, an wuvɔ kaii; té ka kwa kuli léé, ka an tɔrɔ paa anlé munu guru zanale a gi we ma lo.

⁵ Naa, kolé gibɔrɔpayi lé kyɔ, ko ’wiiyi lé, tun dɔ ko gi yi lé; Mizan, lai sunyanu lé Gakelebale ɛ yi ’ko bɔ ko ma, pɛnguru lé woo yuɛzi yé ana, ana. Wo fla zi gɔrɔ zana a gi, nyané ble siaalenu bɔ gɔ ma.

⁶ Élam munu sawɔlɛ din si; goronu lé gulidanmunu ke wo gi koo, vɔwisootazannu koo, wo bié. Kii munu wo botakuunfɛ bɔra.

⁷ Kalé pɛnguru zinnu fan gulidangoronu nya yé vɔwisootazannu dɔ guli bale ta ilé flagɔrɔ ’léé.

⁸ Juda bɔavafɛ ’ka é dɛrɛ lo. Yi ’ko la ka dan go lɛ gulidanfɛ nagini lɛ wo yɔɔkɔn gi pɔrɔ gi.

⁹ Ka dan David lé flagɔrɔ sona a ma nagini lɛ, yé ka tɛrɛ zia ’yiguru gi ’yi ta dɔ.

¹⁰ Ka Jérusalɛm lé kɔnnu nɔnɔ, yé ka wo zana flagɔrɔ ma’lɛrɛle wolé briki nya we ma.

¹¹ Ka ’yi téégifɛ kɛlɛ flagɔrɔ fié méléna, yé ka ’yiguru kyɛn lé ’yinu zén ’bɛ gi. Naa, mi lé we ’konu faa sɔ a lɛ, ka ’ka bɔn‐in bɔrɔan ’bɛzan ma lo; yé mi lé é wenu ’ko ma’lɛrɛ ana mɔn, ka ’ka ’bɛ yé lo.

¹² Mizan, lai sunyanu lé Gakelebale é dan ka laa lɛ ’bɛ yi la, léé, ’ka wuvɔ, ’ka gɔlɛ gyɛ, ’ka nwin bo, ’ka bɔlɔ zén ka ta.

¹³ I yua, wa zanagyɛna, ’té wo gi éé nanaan, ’té woo dirinu bɔrɔ boo, ’té woo ’blanu gya, ’té woo wi blé, ’té woo nwɛ minian, yé wo léé: Kaa fɛ ble, kaa nwɛ mini, naa, tɛlɛ, kaa dan ga lɛ.

¹⁴ Lai sunyanu lé Gakelebale a gɔɔn an lɛ léé: Dé ka ’ka tan ga lɛ lo, maa ’ka ka ma we vo wenyané ’ko lé we ma lo. Mizan lai sunyanu lé Gakelebale ɛ fe.

É we pla Sɛbina lɛ

¹⁵ Mizan, lai sunyanu lé Gakelebale léé: ’I go minwiinzan leezan ’ko va; Sɛbina lé ke minwiinzan bɔavazan nya alé kɔn gi, ’i go a va, yé bé fe a lɛ léé:

¹⁶ Ilé mɛ fɛ ɛ ke ’ko, i de ɛ ke ’ko yé i miguru bo ’koo? É a guru bona ’ébo lɛ, fɛna loruna; é a ’ébo nyanana bona gɔlɛ gi.

¹⁷ Bé ye, Gakelebale é dan i vuli lɛ bélé din zo; é dan i po vɔ lɛ

¹⁸ yé é dan i burula lɛ bélé balɔn zo tɛrɛ blɛn la. ’Bɛna lé i dan ga lɛ, ’bɛna lé ilé gulidangoro nɔnɔminu é dan go lɛ, bii lé, i izan lé kɔngimunu gyɛ yara nya.

¹⁹ Maa dan i bin lɛ ilé nyanama pana. Gakelebale é dan i si lɛ i dɔna.

²⁰ ’Bɛ yi la, maa dan an wuozan Ilkija be Éliakim laa lɛ;

²¹ maa dan ilé varɔ zén lɛ a ta, yé maa dan ilé kyɛsidi dɔ lɛ a gyɛn. Maa dan ilé se kɛlɛle nɔ lɛ a lɛ; é dan kɛlɛ lɛ Jérusalɛm valé Juda munu ti nya.

²² Maa dan David lé kɔn lé lakléwɔlɛ nɔ lɛ a lɛ; é dan a lɛ so lɛ, yé a lɛtanzan ’ka lo; dé é a lɛ tan, a lɛsozan ’ka lo.

²³ Maa dan a dɔ lɛ gligli bélé pɔnté lé laso kua a ma, a zo. É dan kɛlɛ lɛ é ti lé kɔngimunu tɔbɔmafɛ nya.

²⁴ Fɛnu faa‐an wa ti lé kɔngimunu tɔ bɔa a ma, a kulu la mi blɛnnu valé mi kiénénu koo, alé kɔngifɛnu faa, bɔ pla valé kyanbɔnu koo, wo faa lé we a yee ɛ lee.

²⁵ Lai sunyanu lé Gakelebale léma: ’Bɛ yi la, pɔnté lé ke é vɔle laso gi, maa dan a so lɛ. Wo dan a bla lɛ yé é dan dia lɛ, yé munu faa lé ke a lee bélé kɔné zo, wo dan sɛrɛ lɛ. Gakelebale ɛ fe a zo, azama.