Ézai 21 - Kazambale lé Sebe Sauunu 1979

Babilɔn guru zanale a gi ma yuɛzi we

¹ Balelawe lé Ézai a fe wɛyi bwi lé we ma, yee lo. Fu plɛplɛ si yirinwana bɛyilazia fɛan zo, a zo lé nyanézan si kanazénmigi bwi la.

² Yuɛzi giwe naané do da an va. Yaamitazan a yaana mi ta, fɛsɛrɛzan a fɛ sɛrɛna. Élam munu, ’ka go loru. Médi munu, ’ka fla mabɛn. Maa dan bamaflinle dɔ lɛ.

³ Bɛwemalé maa a kle blena an sowolɛ lee. Nyanéblele an kun bélé né yaa le lé nyanéblele zo. An plinle lé we ma lé an ’ka we maan lo; an ma nyɔɔnle lé we ma lé an ’ka fɛ yé lo.

⁴ An gi bɔrɔ paan, di kini an gi; an bli a béli tanle lɛ yé é nɔla an ma dikinié angiwe nya.

⁵ Wo fɛ dɔra, mitabin sunyanu a é dɔle, wa fɛ blena, ’té woo fɛ minian. Sunyanu nwiinzannu, ’ka nwa, ’ka nyɔnɔ gié ka botakuunfɛnu ma.

⁶ Naa, Mizan we fe an lɛ yé é léma: ’I go, ’i fla taginizan dɔ; dé é wean ye, ’é a fe.

⁷ É wisootazannu ye, ’té woo tawoo mi fié, mi fié. É sokofale tazannu ye, é nyɔgɔmé tazannu ye. É a nagini, é a nagini téiin.

⁸ ’Bɛ zuo yé é siaa bélé golizra zo. Mizan, an vo é dɔle flagɔrɔ ta loru é yiéyi bléyi faa va; maa a an dɔna béli faa wuo.

⁹ Yé bé ye, wisootazannu a dana, ’té woo tawoo mi fié, mi fié. É we fe é ziin yé é léé: Babilɔn diaoo, é dia! Alé miyilinu faa dia tɛrɛ va yé wo yéli nuu.

¹⁰ Anlé munuoo, anlé munu, wo ka sunwo bélé ’sa sunwole zo. We lé lai sunyanu lé Gakelebale, Izraɛl lé Bale a fe an lɛ, maa a fe ka lɛ.

É Duma mawe fe

¹¹ Balelawe lé Ézai a fe Duma ma, yee lo. Wo siaa an lɛ Séii tɛrɛ la yé wo léé: Flataginizan, i lé béli lé we ma nɔɔ? Flataginizan, i lé béli lé we ma nɔɔ?

¹² Flataginizan a zi pa léé: Tu é dan kini lɛ, yé béli é dan tan lɛ é ziin. Dé é sɔ ka lɛ léé, ka we laa, ’ka laa. ’Ka bli nɔla yé ’ka da é ziin.

É Arabi mawe fe

¹³ Balelawe lé Ézai a fe Arabi tɛrɛ ma, yee lo. Tawomunu lé ka si Dédan, ka dan béli do kɛlɛ lɛ Arabi lé bwi la.

¹⁴ Téma tɛrɛ la munu, ’ka go ’yi nya, munu lé ’yiminilɔrɔ ke wo gyɛna, wo lɛ, yé ’ka go fɛblele nya vɔ fli gi munu lɛ.

¹⁵ Gwɔunnu lé wo wo so é kɔlɛ gi koo, sa lé wa gana a vulile we ma koo, guli plɛplɛ koo, wo lee lé wo vɔ fli gi.

¹⁶ Naa, Mizan lé an lɛ léé: É vo lɛɛ do, nyanamapazan lé lɛɛ nyaale yɛrama, yé Kédaanu tɔbɔle faa é dan kɛlɛ lɛ ’bɛ zo.

¹⁷ Kédaa munu lé wo ke savulizannu lé nyanazannu nya, wo ’léé é dan vo lɛ sɛ. Gakelebale, Izraɛl lé Bale ɛ fe, azama.