Ézai 20 - Kazambale lé Sebe Sauunu 1979

Balelayezan porole kɛlɛ tɔmase nya

¹ Asiri munu nwiinzan blɛn Saagɔn Taatan nwunvɔ yé é go Azdɔd mabɛn lɛ, yé é a si lɛɛan nya,

² yee lɛɛ ’ko gi Gakelebale we fe Amosi be Ézai lɛ yé é lé a lɛ léé: ’I go, ’i bɔlɔ si i gyɛn yé ’i sawala si i gane ma. É a kɛlɛ a zo, yé é tawo é porole, ’té sawala ’ka a gane ma lo.

³ Yé Gakelebale léé: Fɛan zo lé an wuozan Ézai tawo é porole, ’té sawala ’ka a gane ma lo, lɛɛ yaa gi, é a tɔmase valé weyɔɔle bɔrale nya Éjipiti munu valé Étiopi munu ma we nya;

⁴ a zo duo lé Asiri munu nwiinzan é dan go lɛ Éjipiti munu valé Étiopi munu nya luu gi, yé wo kɛlɛ lulazannu nya, yé miboronénu valé mi segelenu wo dan tawo lɛ é porole, ’té sawala ’ka wo gane ma lo, ’té wo péli la a é pla, yé yara é dan Éjipiti munu gyɛ lɛ.

⁵ Yé Juda munu lé wo pale ke Étiopi munu ta, ’té wo wobo tɔ bɔa Éjipiti munu gi, kana é dan zén lɛ wo gi, yé yaragyɛwe é dan bɔ lɛ wo ma.

⁶ Yé wɛyi bɛ do la munu é dan a fe lɛ yi ’ko la léé: Munu lé ko bli ke turu wo lɛ, ’té é dɔ ko gi léé, wo dan bɔ lɛ ko va yé wo ko si Asiri munu nwiinzan blɛn lee, yé we ’ko bɔ ’bɛnu ma, ko dan so lɛ Asirinu lee kaa?