Ézai 2 - Kazambale lé Sebe Sauunu 1979

Vole drɔɔ lé a glɛ ’ka lo

¹ We lé Amosi be Ézai a fe balelawefele nya Juda munu valé Jérusalɛm ma, yee lé ke ’ko:

² Dé bléyi voéla bɔ, Gɔ lé Gakelebale lé kɔn ke a nwiin, Alé we é dan mini lɛ gɔblɛnnu ta, Yé a tɔ é dan mini lɛ gɔpanénu lɛ, Yé bɛnnu faa é dan yoro lɛ a vazia.

³ Munu é dan go lɛ ana é bu nya é bu nya, yé wo dan a fe lɛ léé: ’Ka da, kaa go Gakelebale lé gɔ nwiin Jakɔb lé Bale lé kɔn ’léé, Yé é ’élé we paa kaa gi, Yé kaa tawo alé zinu ta. Naa, bélidɔwe é dan si lɛ Siɔn, Yé Gakelebale dére é dan si lɛ Jérusalɛm.

⁴ É dan bɛnnu lé we ble lɛ, Yé é dan kɛlɛ lɛ milɛgɔnɔ kiɛre lé we yuɛgibozan nya. Wo dan wolé gwɔunnu foli lɛ gwanénu nya, Yé wo dan wolé dinnu foli lɛ sénblanu nya; Bɛn do ’ka dan gwɔun sia lɛ wo bɔlu bɛn bɛ ma é dɛrɛ lo, Wo ’ka dan gulidanle draan lɛ é dɛrɛ lo.

⁵ Jakɔb lé munu, ’Ka da, kaa tawo Gakelebale lé san va.

Mi lé ébo tɔbɔle yi é dan ga lɛ

⁶ Naa, Gakelebale sɔn vɔ élé munu, Jakɔb lé munu ma. Wo yirinwanazia munu lé yonu ble yé wo ’wobo nɔ yo kɛlɛle lɛ bélé Filisitinu zo, yé wo gi pa do bɛn bɛnu va, amalé Gakelebale sɔn vɔ wo ma.

⁷ Gɔɔlifu valé kyan a wolé tɛrɛ la di yé wolé fɛwezannu ’ka nyaan lo. Wisoo a é fanle wolé tɛrɛ la kaii, yé wolé gulidangoronu nɔnɔ ’léé ’ka lo.

⁸ Miyilinu a é fanle wolé tɛrɛ la; woo diaan ’wo bɛ kɛlɛfɛnu ’lɛ, fɛnu lé wo wo nyaa woboan, woo diaan wo ’lɛ.

⁹ Mi kiénénu é dan tua lɛ yé mi blɛnnu lé plɛplɛ ta é dan zana lɛ. I ’ka dan wo ma we vo lɛ lo.

¹⁰ ’Ka wɔra gɔlɛkoro gi yé ’ka yɔɔ nyéné gi, léé, kana blɛn lé Gakelebale a zén‐é munu gi koo, alé fuasan bile planplan koo, ’ka so wo lee.

¹¹ Mi lé éé mi naginian é yuɛ zuo glan‐un, Bale é dan ’bɛzan ta zana lɛ yé Bale é dan boblɛnzan kɛlɛ lɛ kiéné. ’Bɛ yi la Gakelebale do kpen ɛ dan kɛlɛ lɛ blɛn.

¹² Naa, yi do ana lai sunyanu lé Gakelebale zé nya, ’bɛ yi la é dan nwa lɛ boblɛnzannu faa valé mi gini é yuɛzuozannu ma, yé miomian ébo kɛlɛ blɛn, Bale é dan nwa lɛ ’bɛzan ma, a tuale we gi.

¹³ Sɛdrɛyilinu faa lé wo ke Liban tɛrɛ la, ’té wo ke é torole é baba, wo koo, sɛnéyilinu faa lé wo ke Bazan tɛrɛ la koo,

¹⁴ gɔ blɛn torolenu faa koo, gɔpané wuovɔlenu koo,

¹⁵ kɔn kiilii torolenu faa koo, fla zi gɔrɔ gliglinu faa koo,

¹⁶ Taasis munu lé ’yitagoronu faa koo, yuɛibɔfɛnu faa koo, Gakelebale é dan nwa lɛ wo ma.

¹⁷ Boblɛnzan é dan kɛlɛ lɛ kiéné yé mi gini é yuɛzuozan ta é dan zana lɛ. ’Bɛ yi la Gakelebale do kpen ɛ dan kɛlɛ lɛ blɛn.

¹⁸ Miyilinu faa ta é dan saan lɛ.

¹⁹ Munu é dan wɔra lɛ gɔlɛkoronu gi, ’té woo goo fɔɔ tɛrɛwɔlɛ ma, léé, kana blɛn lé Gakelebale a zén‐é munu gi koo, alé fuasan bile planplan koo, yé wo so wo lee, bléyian va lé é nwa yé é di kini tɛrɛlamunu gi, a bléyi va.

²⁰ ’Bɛ yi nya, gɔɔlifu miyilinu valé kyan miyilinu lé munu a kɛlɛ ’wo banyo nya, wo dan wo vuli lɛ koblinu valé bannu lɛ;

²¹ yé wo dan wɔra lɛ gɔlɛfeegyɛnanu valé gɔlɛkoronu gi, kana blɛn lé Gakelebale a zén‐é munu gi koo, alé fuasan bile planplan koo, wo sole wo lee we gi, bléyian va lé éé nwaan yé é di kini tɛrɛlamunu gi, a bléyi va.

²² Té ka pa blami ta lo; flinfu do kpen ɛ ke a gi. Blami a mɛ nyaa?